الموضوع: عملت صيانة ال 100 الف عند auto21 وحاسس ان سحب العربيه ضعف

السلام عليكم يا جماعه:
انا عملت صيانة ال 100 الف لمازدا 2008 اوتوماتك عند اوتو 21 اللي عند الوفاء و الامل و من ساعتها حاسس ان العربيه مبقتش تسحب زي الاول هل حد اتعامل معاهم قبل كده لاني بصراحه حاسسهم نصابين...هوا غير الاتي

عير البوجيهات
فلتر هوا
فلتر بنزين
زيت موتور وفلتر زيت موتور و حطلي زيت توتال 10000 بس محستوش ريح العربيه ف غيرته بعد 1000 كيلو و رجعت ل موبيل 10000

عير زيت الفتيس من غير ما يغير الفلتر بتاعه و حط برضه توتال و من ساعتها بحس بنتشه خفيفه اوي ما بين النقلات و بتظهر و تختفي ما كانتش بتحصل قبل ما اغير الزيت كانت الاول بتنقل و مش بعرف انها نقلت غير من الرقم اللي علي العداد
و لما بحط الفتيس علي الاستبترونيك و انقل انا ما بيحصلش اي نتشه

زود زيت الباور

دلوقتي سحب العربيه قل جامد بس ساعات ربنا بيهديها و تفوق بس برده مش زي الاول
العربيه و هي واقفه علي p او n ساعات يبقي فيه رعشه في الموتور و ساعات مش بتكون موجوده

لما بحرق علي العربيه فوق ال 4000 rpm بشم ريحه غريبه زي ما يكون حريق ني او مش عارف ممكن يكون ايه

استهلاك البنزين حاسه زاد و خصوصا ان مش بحرق كتير بس بمشي ف رانج 120:140

ال rpm بيكون علي 3500 او 3200 علي سرعة 120 و انا مشغل التكييف هل ده عادي و لا كده ال ار بي ام عالي عن ال طبيعي عند السرعه دي

هل ممكن يكون ركبلي قطع غيار رديئه فهي اللي جعلت الاداء يقل يعني فلتر هوا نوعه وحش و فلتر بنزين نوعه وحش و بوجيهات مش بتحرق كويس فعلشان كده العربيه سحبها ضعف

والفتيس هل علشان ما غيرش الفلتر حصل كده ولا نوع الزيت برده وحش و لو هغيره احط ايه انا عرفت كذا نوع زيوت فتيس ينفعو معاها منهم حجات ف شيل و موبيل و فالفولين بس يا ترا ده هيحل مشكلتي ...هي مش نتشه ملحوظه بس علشان انا بركز اوي بحس بيها يا ريت حد يفيدني اروح بيها فين و لمين يكشف عليها كشف محترم ارجو الافاده
و اسف ان كنت طولت عليكم