الموضوع: نيسان بلوبيرد سيلفى تحفة نيسان فى مصر

حاجه شديده

على فكرة انا قلت قبل كدة ان احنا جبنا البلوبيرد ... وهي مريات كهربا و ماتورها 1800 مش
1600 ... وبجد عربية جااااااااااامدة جدا جدا جدا ... الي عايز يحكم عليها يروح يشفها بنفسو

مبروك ياباشا على العربيه الف مبروك

ياسلام لو كده موضوع على زوقك وتحطلنا فيه صور العربيه

الف مبروك مره تانيه

الله يبارك فيك .... ان شاء الله هصورها وهعملها موضوع كويس لان الناس فكراها صني ومش عاجبهم سعرها لانهم مش بيبصو لامكانيتها ولا حجمها ولا شكلها ... للعلم هيا أكبر من الكورولا الجديدة في الحجم...وأجمد منها في الشكل برضو ومهما احط صور فهي في الحقيقة أحسن بكتييييييير

السلام عليكم وكل عام وانتم بخير...
بالنسبه للسياره النيسان ليفينا:
بصراحة انا كنت متردد جدا قبل شراء السياره بسبب تقفيلها فى مصنع نيسان الصين ولعدم وجود السياره فى الشوارع المصريه حتى اتمكن من سؤال من جربها من قبل.
ولكن نظرا لانى لدى اسرة واطفال فكنت محدد تفكيرى فى سياره فئة ال Suv او المينى فان. باتالى كانت اختياراتى محصوره فى التالى:
- بيجو 307 Sw بس دى خارج حدود الميزانيه + مشاكل الجير بوكس المعروفة فى كل السيارات الفرنسيه حتى احدث الموديلات.
- تويوتا أفانزا .. مع كل تقديرى للتويوتا بس ال أفانزا شكلها مش مقبول بالنسبه لى + موتور 1500 . على فكره انا فى اعتقادى الشخصى ان السياره الاوتوماتيك والمكيفه والباور ستيرينج لازم يكونو (على الاقل) فى عربيه 1600 سىسى.
عموما، هاتكلم شويه عن النيسان ال ليفينا فى نقاط: (علما بان السياره حتى الان قطعت 1100 كيلو فقط يعنى انطباعى لم يكتمل بعد)
ميزات:
- نفس محرك التيدا ونفس ناقل الحركه
- صوت المحرك هادئ جدا حتى مع زياده التحميل على المحرك.
- عزم قوى جدا فى اول سرعتين و عزم طبيعى فى السرعتين الاخيرتين.
- عدم شعور الركاب بنقلات الفتيس نهائيا حتى مع الكيك داون.
- حتى الان لم اسافر بالسياره ، أقصى سرعه وصلت ليها حتى الان 120 كيلو على الدائرى ، حتى هذه السرعه اشعر بأنها ثابته الى حد كبير جدا يعنى مش خفيفه زى عربيات كتير، سوف أعرفكم بأخبارها على السرعات العاليه لاحقاً.
- شكلها الخارجى جميل جدا بشهادة كل من شاهدها.
- المفتاح الذكى : بصراحة دا اختراع هايل جدا ، خلى المفتاح فى جيبك و اقفل وافتح و دور العربيه على راحتك دون استخدام المفتاح نهائيا، حتى البابين الاماميين والشنطه فيهم زرار صغير جدا يمكنك من فتح السياره بلمسه بسيطه ما دام المفتاح الذكى فى جيبك.
- فيها اثنين إير باج فى المقعدين الاماميين.
- جنوط مقاس 15 (اربعه فقط) والاستبن جنط اسود عادى بنفس المقاس.
- بها حساس لاضائة الانوار اوتوماتيكيا عند الوجود فى مكان غير مضئ.
- سقف السياره عالى جدا بالنسبه لارتفاع رأس جميع الركاب.
- مساحة تخزين واسعه جداً من غير الحاجه لثنى الكنبه الخلفيه.
- على الرغم انها تقفيل مصنع نيسان الصين الا ان ادق التفاصيل فيها لا توحى بانها صينى على الاطلاق ، تقفيلها متقن وخالى تماما من العيوب الواضحه فى السيارات صينيه الصنع.
- بصفه عامة .. توكيل نيسان ومراكز الخدمة هى من احسن الموجود فى مصر.
- فيه ميزه اخيره وغريبه شويه بالنسبه لحضراتكو وهى ان السياره غير معروفه فى الشوارع المصريه ، يعنى الناس بتتفرج عليها فى الشارع كما لو كانت رولز رويس مثلاً وكتير من الناس بتسألنى عنها والبعض فاكر انى جايبها معايا من خارج مصر.يعنى قدامى حوالى سنه هاكون راكب عربيه مميزه ومش منتشره فى الشوارع وانا شايف ان دى ميزه الى حدٍ ما. :)

ندخل على العيوب:
- سعر اعادة البيع ، طبعا هو غير معروف حاليا لكن من المتوقع انه يكون (ضايع) نظرا لحداثة السياره فى السوق المصرى و نظرا لانها ليست (كورولا او لانسر) زى ما حضراتكو فاهمين طبعا :)
- تجهيزات غير موجودة فى السياره ، مثل: مصابيح القرائه فى مقدمة السقف الداخلى ، مسند يد فى الكونسول بين المقعدين الاماميين ، مفتاح التحكم فى مستوى الاضائه الاماميه للسياره ، مصدر كهرباء ثانى (غير ولاعة السجائر) ، مخدع بالكنبه الخلفيه ، صندوق التابلوه لاتوجد فيه لمبة اضائه ، لا توجد فتحة سقف.
- بمنتهى الامانه ، هذة هى فقط عيوب السياره.
بصفه عامه :
انا مقتنع بهذة السياره مش بس علشان انا اشتريت واللى حصل حصل ، بس هى فعلا سياره مقنعه فى ادائها واناقتها وعزم محركها القوى فعلاً.

عموما ارجو ان اكون قد اعطيت فكره واضحة عن النيسان ليفينا ، واذا فى اى حد مهتم بالموضوع ده وعنده اى اسئله اخرى فأنا مستعد للمزيد من التوضيحات.

مع الشكر والتقدير لكل من قرأ هذا الموضوع.
و سلام الله عليكم جميعاً.

ٍسامح عز.