إستشارة لأهل القاهرة -أسهل طريق للمطار

**ahmedwagdy03** · 16-07-2014 06:13 PM

تحياتى أهل القاهرة و الجيزة . أخوكم من إسكندرية و محتاج مساعدتكم فى أفضل و أسهل طريق للمطار فى شهر رمضان الصباح . آخر مرة نزلت القاهرة بالسيارة كانت 2006 و بعدها مرة واحدة 2009 إضطرارى لعدم وجود طيران مباشر.

المهم مضطر أروح من إسكندرية لمطار القاهرة لإحضار أخى و محتار آخد أى طريق و عندى عدة إختيارات و أرجو النصيحة :

1- الأول : من إسكندرية الصحراوى أكمل للدائرى الجنوبى طريق المريوطية لغاية جوزيف تيتو بس خايف من موضوع الإنفلات الأمنى و قطاع الطرق و بالذات رمضان الصبح .بصراحة متعقد من اللى الواحد بيسمعه و بيقراه لدرجة إنى من أيام الثورة أطول مشوار كان لمطار برج العرب لإن الطريق مؤمن و بطلت سفر

2-الثانى : من إسكندرية الصحراوى أخد الدائرى الشمالى يعنى إتجاه المعتمدية و ده بالذات قلقان منه بسبب حوادث التثبيت عند القليوبية

3-الثالث : أكمل فى المحور لغاية كوبرى 15 مايو ثم نفق الأزهر ثم صلاح سالم ثم المطار . بصراحة أول مرة أكمل بعد 15 مايو و معرفش أخبار الزحمة إيه بس أعتقد إن الطريق ده أمان

4-الرابع : بعد كوبرى 15مايو أطلع 6 أكتوبر لغاية صلاح سالم ثم العروبة ثم المطار

أرجو حد من الإخوة الكرام يفيدنى أحسن طريق فيهم

**mk3** · 16-07-2014 06:47 PM

انا مش سامع عن حوادث تثبيت دلوقتى لكن بما انك قلقان متاخدش اى طريق علوى بمعنى اول اسكندريه الصحراوى ثم ش الهرم ثم صلاح سالم طبعا الطريق تحت مزعج

**HOSSAM99** · 16-07-2014 07:13 PM

أسهل طريق لحضرتك هو الدائري (دائري المريوطيه ) و متنزلش نزلة المطار اليمين - لأ - كمل و لف و أدخل طريق المطار بعد النزله هاتلاقي العلامات الإرشاديه بتشير للدوران لدخول المطار دي أفضل
ربنا يسلم طريقك
بالتوفق

**Sameh samy** · 16-07-2014 08:11 PM

تاخد الصحراوي وتعدي من تحت المحور وتلف ترجع تاخد المحور لحد الدائري ومن الدائري للمطار دة اسرع طريق ليك

**mohamed_selim** · 16-07-2014 08:51 PM

انت رايح الساعه كام؟

**amrelsaqqa** · 16-07-2014 09:01 PM

المشاركة الأصلية كتبت بواسطة سامح سامي

تاخد الصحراوي وتعدي من تحت المحور وتلف ترجع تاخد المحور لحد الدائري ومن الدائري للمطار دة اسرع طريق ليك

اشمعنا ، مش المحور كدة كدة له طلعتين واحدة اتجاه الشيخ زايد وواحدة اتجاه ميدان لبنان وانت جاي من البوابات ؟

**abdulkhaleq** · 16-07-2014 09:19 PM

مافيش تثبيت والكلام ده الحمد لله دلوقتي
لو انت جاي بدري انزل ميدان لبنان وكمل 15 مايو زي ماقلت ثم كوبري اكتوبر
قبل الزحمه وكده ياعني
يا اما الطريق التاني وانت جاي من المحور اطلع الدائري اتجاه المريوطيه وخد وصلة المعادي وكمل زي ما انت هتوصل للمطار ان شاء الله

**ahmedwagdy03** · 17-07-2014 09:10 AM

المشاركة الأصلية كتبت بواسطة mohamed_selim

انت رايح الساعه كام؟

المفروض أكون فى المطار حوالى 11.30 ص .يعنى إن شاء الله أطلع من إسكندرية 6ص

**mohamed_selim** · 17-07-2014 10:12 AM

٦ص توصل عند بوابات القاهره على ٩ص
اى طريق هيكون زحمته متساويه فى الوقت ده

خليك فى طريق وسط البلد ... هتعدى بعد البوابات من تحت المحور و تاخد يوترن و ترجع تطلع المحور و تمسكه طوالى هتعدى تجت الدائرى و تعدى فوق النيل و الزمالك و بعد الزمالك تنزل كورنيش ماسبيرو و تكمل لحد تحت كوبرى اكتوبر تخش شمال فى ضهر المتحف هتلاقى طلعه للكوبرى متطلعهاش و تمشى من جنبها ٢٠٠ متر و تخش شمال و تمسك اليمين هتلاقى طلعه للكوبرى اقصى اليمين (خلى بالك يمين قوى ده شارع رمسيس هتعديه و مش هتخش يمين غير بعده و هتلاقى الطلعه فى ضهر المبنى اللى على اليمين ... انت هتكون شايف الكوبرى فوقك و الطلعه لازقه فيه) المهم هتمسك اكتوبر لحد نزلة صلاح سالم او الاوتوستراد ... تنزل اى واحده و تخليك طوالى اى نفق او كوبرى يقابلك تاخده ... لو صلاح سالم هتعدى كوبرى و كوبرى و نفق و كوبرى و كوبرى تنزل طوالى على المطار و تشوف انهى صاله و تمشى مع اليفط
لو الاوتوستراد هو كوبرى واحد فى الاخر خالص و بعديه بحوالى ٣ كيلو دخله للمطار الجديد على اليمين

توصل بالسلامه و على اى حال بطلنا نسمع عن تثبيت على الدائرى بس الله اعلم مفيش ولا بطلو يقولو بس الاكيد ان التثبيت كان على دائرى شبرا مش المعادى

**ahmedwagdy03** · 17-07-2014 01:21 PM

المشاركة الأصلية كتبت بواسطة mohamed_selim

٦ص توصل عند بوابات القاهره على ٩ص
اى طريق هيكون زحمته متساويه فى الوقت ده

خليك فى طريق وسط البلد ... هتعدى بعد البوابات من تحت المحور و تاخد يوترن و ترجع تطلع المحور و تمسكه طوالى هتعدى تجت الدائرى و تعدى فوق النيل و الزمالك و بعد الزمالك تنزل كورنيش ماسبيرو و تكمل لحد تحت كوبرى اكتوبر تخش شمال فى ضهر المتحف هتلاقى طلعه للكوبرى متطلعهاش و تمشى من جنبها ٢٠٠ متر و تخش شمال و تمسك اليمين هتلاقى طلعه للكوبرى اقصى اليمين (خلى بالك يمين قوى ده شارع رمسيس هتعديه و مش هتخش يمين غير بعده و هتلاقى الطلعه فى ضهر المبنى اللى على اليمين ... انت هتكون شايف الكوبرى فوقك و الطلعه لازقه فيه) المهم هتمسك اكتوبر لحد نزلة صلاح سالم او الاوتوستراد ... تنزل اى واحده و تخليك طوالى اى نفق او كوبرى يقابلك تاخده ... لو صلاح سالم هتعدى كوبرى و كوبرى و نفق و كوبرى و كوبرى تنزل طوالى على المطار و تشوف انهى صاله و تمشى مع اليفط
لو الاوتوستراد هو كوبرى واحد فى الاخر خالص و بعديه بحوالى ٣ كيلو دخله للمطار الجديد على اليمين

توصل بالسلامه و على اى حال بطلنا نسمع عن تثبيت على الدائرى بس الله اعلم مفيش ولا بطلو يقولو بس الاكيد ان التثبيت كان على دائرى شبرا مش المعادى

شكرا أ محمد سليم و شكرا لكل الأخوة اللى إهتموا بالرد .

شكلى كدة حامشى على الوصفة بتاعتك

تحياتى للجميع