الموضوع: كل واحد يحكى حكاية نصب اتعرضلها فعلا فى شراء العربيات عشان الكل يستفيد ونحارب النصب

نصيحة يا اخونا الواحد يستخير ربنا قبل ما يجيب عربية ويدعي دعاء الاستخارة، ويركز أوي في الكلام اللي بيتقاله، ويتقل لما يشوف عربية تعجبه، أنا كان معروض علي دايو نوبيرا 97، كاملة ايرباج وabs وكله، على 42 واقفة عند معرض عندنا في مدينة نصر، انا بقالي فترة باشوفها، اتصلت بصاحب المعرض قالي 42 ألف، قلتله آخرها والحكاية وبتاع، حسيت انه بيتكلم بقلب جامد عن العربية، قلتله هي بتاعتك ولا بتاعة زبون، قالي "بتاعتي" قلتله هي ديه معاقين وعليها حظر؟ قالي ياباشا لا معاقين ولا غيره، العربية زي الفل، وانا باديك حاجة نضيفة عشان انت جاري والكلام الهلس ده، قلتله هاجيلك بكرة اشوفها واتفقت على المعاد، وروحت وخدت معايا حمايا، العربية كانت مش موجودة، قلتله فين العربية قالي جاية دلوقتي، لاقيت واحد جاي بيها، اللي هو صاحب العربية، يعني بتاع المعرض طلع مش صاحب العربية، وديه أول كدبة، العربية شكلها حلو من برة بس لما تدقق فيها تحس ان فيها حاجة غلط، اتكلمنا مع صاحب العربية، قال نتفق على السعر، حمايا قاله الفلوس موجودة، احنا بس عاوزين نطلع على سمكري جنبنا يشوفها، قاله لأ وبتاع والعروسة متروحش لحد، والراجل شكله قلق، المهم حمايا اصر وخدنا العربية، العربية طبعا رشةبرة نضافة، طلعنا على السمكري فتح العربية وبص عليها شوية ونزل تحتها، بعدين سألته بيني وبينه ايه رأيك، قالي انا مش مرتاح للعربية، طبعا صاحب العربية عمال يقول فبريكا ومرفوعة وبتاع، ومش عاوز يقول ابدا عاملة كام كيلو، المهم السمكري قال لحمايا على جنب متخدهاش، واحنا راجعين سألناه الرخصة باسمك، قال لأ ديه معاقين - وديه تاني كدبة - واحنا بنجدد باسم المعاق، وكان متنرفز جدا لما اتكلمنا في حتة الورق والمرور وكده، والعربية فيها توكيلات وبتاع، واتنرفز أوي لما حمايا قاله ولما هي العربية مريحاك وبقالها معاك كذا سنة، منقلتش باسمك ليه وخلصت نفسك من القصص ديه، المهم رجعنا المعرض واتكلمنا بس الراجل كان قليل الذوق وشدينا معاه، المهم عمي رجع للسمكري عشان يستفهم برضه ومنبقاش ظلمنا الراجل، قاله العربية واخدة خبطة جامدة جدا من قدام، ولحامات في كل حتة، والعربية طالع ميت.... أبوها مشي، وهلك، ومرشوشة لما عميانة، والعربية ديه جت لي قبل كده وانا قلت للي جابها لأ، بس مكانش الراجل ده، وهما بقالهم فترة مش عارفين يبيعوها...... الكلام ده كان من 3 شهور، والعربية لحد دلوقتي واقفة عند المعرض، كل شوية حد يجي يتفرج واهي واقفة مكانها... وربنا يوقعنا في الكويس دايما

هام جدا الكشف على العربية فى مركز خدمة معتمد

المشاركة الأصلية كتبت بواسطة velkouf

مرة كنت بشترى عربية لادا نيفا قابلت صاحبها فى سوق السيارات اتفرجت على العربية تمام
وشوفت الرخصة تمام بس مشوفتش بطاقة الراجل علشان اتاكد من الاسم
المهم اتفقنا نتقابل بليل علشان نخلص
فوجئت ان العربية مش باسمة ومعاة توكيل ادارة فقط
وطبعا كانت خبرتى فى العربيات على قدى
المهم اقنعنى انا و صاحبى ان توكيل الادارة يحق لة البيع و ادارة شؤن السيارة امام الجهات الحكومية
ودفعت الفلوس واستلمت العربية و بقيت مبلغ عند التسجيل
المفاجأة ...........العربية بدون نمرة ورا( ماشية بنمرة واحدة من قدام)
فين النمرة الخلفية ياباشا
الراجل قالى اخ نستها عند السمكرة هجيبهالك بكرة واحنا بنسجل وقعد يحلف ان الراجل قفل لان الوقت متاخر وهيجيبها بكرة
طبعا صدقناة لسذاجتى وخدت العربية ومشيت
اسبوعين وانا بجرى وراة علشان الورق و النمرة ومفيش رد و العربية مرمية تحت البيت
والحمد لله كنت واخد صورة من بطاقتة من وراة طبعا لانة رفض واكتفى بكتابة البيانات فى العقد الابتدائى
طلعت يوم الساعة 6 الصبح على بيت الراجل وقعدت اسأل لحد ماوصلت بيتة وصحيتة الساعة 7 صباحا
رجلى على رجلك يامعلم لحد مانخلص
انا مش هسيبك وعملتلة قتيل
الحقيقة المرة......................
الراجل شارى العربية بالتقسيط من واحد ومدفعش و صاحبها الاصلى متخانق معاة وواخد النمرة علشان ميتحركش بالعربية وكمان العربية عليها 1500 مخالفات و الاهم توكيل الادارة مالوش لازمة مجرد يمشى بالعربية بس
قولت لة ماليش فية الفلوس او العربية
مفيش فلوس اتصرفت
خلاص تعالى نطلع على صاحب العربية
روحنا عندة الساعة 8.30 وحلفت ميت يمين مش هسيب الاتنين الا لما نخلص
وفعلا الراجل جاب النمرة اول ماشاف الفلوس وراح عملى توكيل و عند المخالفات اتصدم لما عرف المبلغ
قولتلة انا هدفع المخالفات و الباقى من 3000 هديهولك انت خلاص عملت التوكيل
خد الاصل و اشرب ميتة
وفعلا دفعت 1000 بعد التظلم امام وكيل النيابة و الراجل خد 2000 الباقيين وادانى النمرة و التوكيل
وكفى المؤمنين شر القتال

بأمانة جدع إنك مسبتش حقك، لأن فيه ناس كتير في موقفك ممكن تستعوض ربنا في الفلوس

.. انا هحكي قصتي وانا بشتري عربيتي
الحكايه من اولها مكنتش مريحة وشكلها نصب
واحد كان عارض عربيه على كونتاكت كار المهم كلمته قلي انا معرض .. بالرغم من اني كنت ضد اني اشتري من معرض قلت مش هخسر حاجه اروح ابص
رحت بصيت علي العربيه وعجبتني جدا وكانت نضيفه
خدتها وفحصتها عند عصام وصفا قالي العربية كانت واخده خبطة ومغيره فوانيس واكصدام..عادي شئ ميعبش في العربيه ممكن تحصل معايا في اي وقت
المهم رجعت المعرض واتفقت علي السعر وقلتله بكره نتقابل في المرور نخلص..هات صاحب العربية ونحول وياخد فلوسه
قالي لا انت بكره تجيب الفلوس وتاخد العربية وهنديك عقد ابتدائي واحنا هنخلصلك كل الورق..
المهم الفار ابتدى يلعب وكلمت كذا حد من صحابي اخد رايه قالولي لا طبعا وده شكله فلم نصب
رجعت المعرض واتكلمت مع صاحب المعرض ازاي انت هتبعلي عوبية وانت مش المالك ولا معاك توكيل
المهم فضلوا يقنعوني ان ده اسلوب بيع المعارض لانهم يعتبروا وسيط وبياخد حسنته ومينفعش يقابل الزبون بالمشتري
الصراحه الوضع كله كان مويب جدا بس الكان مطمني شوية ان الرخصه كانت موجودة والمفتاحين الاصليين
رحت جبت الفلوس وجازفت بالرغم الفلوس ربنا العالم كانت جاية ازاي
رحت ادتهم الفلوس ناقصه 10 الاف لحد ميجبولي عقد بيع مسجل وخدت العربية وكنت فرحان بيها بشكل لا يوصف وغسلتها كيمواي واخر دلع
تاني يوم اتكلم محدش يرد..اتصل محدش يرد لحد ما اعصابي باظط
ويوم ياجل يوم اصل الراجل عنده ظروف اصل اصل
قلت انا لبستها..
بس الحمدلله صدقوا وربنا سترها معايا وجابولي العقد ورحت نقلتها باسمي وجابوا الملف للمرور النا تابع ليه..بس لقيت فيها 3 توكيلات

نصيحة محدش يعمل النا عملته لانه اسمه سذاجة بس ربنارالعالم بحالي..انا كل مفتكر اني حطيت نفسي تحت رحمتهم اضرب نفسي بالجازمة
الاستعجال وحش والحاجات ده المفروض الواحد ميجازفش فيها

عارف ان الموضوع قديم بس بصراحه عجبنى جدا وقرأته كله واخوكم للحق اتنصب عليه فى سيارتين مره واحده والله, الموضوع بدأ برجوعى من هولنده وماكنتش عارف حشتغل ايه بالضبط ففكرت انى اتاجر فى السيارات المستعمله(وانا ماعنديش خبره فى السيارات)ولكن لجأت لواحد قريبى يعمل سائق تاكسى وكان شغال ميكانيكى قبل كده, المهم اتفقت معه على اننا نشترى السيارات ونصرف عليها ونظبطها ونبيعها ونكسب فيها بمايرضى الله وبدون ضحك على الناس لان الفلوس دى هى اللي حنأكل عيالنا منها, المهم بعد شويه جانى وقالى ان فيه معرض فى فيصل او الهرم (شارع الملكه) صاحبه سنى وشيخ وقرر انه يقفل المعرض ولذلك بيبيع عربيتين بأرخص من تمنهم (سياره رينو ميجان 2009 وسياره باسات 2001)المهم انى رحت قابلت التجار وطبعاً ذقونهم طويله جدا وواضح انهم متدينين ورسموا عليا الدور انهم بيقفلوا المعرض وبيصفوا اعمالهم لانهم مسافرين هجره الى لندن, المشكله الكبرى انى كنت ليا فتره كبيره خارج مصر وكنت نسيت الناس بتكذب اذاى هنا, فصدقتهم ورحنا عند بنزينه فى الهرم كشفنا على العربيتين وطبعاً قالوا انهم عشره على عشره وكله تمام, المهم انى دفعت الفلوس وخلصت كل حاجه وبعد استلام العربيات بدأت المشاكل الرهيبه تظهر وخصوصا فى الرينو ميجان التى توقفت تماما وانا كنت مسافر بها الى الاقصر واضطرينا نشحنها على سياره ونش الى القاهره لنكتشف المصيبه فى التوكيل انها مغيره نصف امامى ومحتاجه تقريبا نغير كل شيئ وبعد ماصرفت عليها تقريبا 16 الف جنيه خسرت من تمنها 30 الف جنيه (لانى رفضت ان ابيعها لاى شخص قبل ان اخبره بكل مافيها ولذلك فضلت عارضها للبيع لمدة 7 شهور الى ان اتى راجل صاحب محلات فى عباس العقاد وشكلى صعبت عليه وقرر ان يشتريها وقال انها مش حتسافر ولكن حيشتريها علشان توصل ابنته الى المدرسه وفعلا دفع 45 الف واشتراها...والثانيه كلفتنى حوالى 8 الاف جنيه ولما بعتها اخدت نفس المبلغ اللي دفعته فيها والله...) يعنى باختصار خسرت فيهم مبالغ كتيره جدا غير حرقة الدم لدرجة انى دخلت المستشفى بسبب العربيات دى وغير التعامل مع الصنايعيه وفعلا حولت حياتى الى جحيم, ويعلم الله انى تعبت على كل مليم فى الغربه ولكن قدر الله وماشاء فعل, واغرب شيئ انا مش قادر افهمه حتى هذه اللحظه انى اكتشفت ان قريبى سائق التاكسى اللي المفروض انه شريكى بالنصف حسب الاتفاق بينا هو الذى باعنى واتفق مع الشيخ المزيف صاحب المعرض واخد منه عموله 3 الاف جنيه وان البنزينه اللي كشفنا عندها على العربيات كانت من اختيار الشيخ صاحب المعرض وليس قريبى السائق كما اقنعنى, وطبعا الشيخ كان عامل فيها مستعجل على البيع لانه مسافر يوم الاتنين الصبح على لندن لاكتشف بعد كده انه لا سافر ولا نيله......اسف للاطاله, ولكن انا الان اشترى سياره لابنتى الطالبه فى كلية هندسه ورينا يسترها ومايتنصبش علينا تانى