الف شكر لرد حضرتك الواضح والدقيق وواضح انه في اختصاص شغل حضرتك
بس ممكن توضيح عن الحاجات المطلوبه مني
يعني هل لازم اتابع القضيه واحضر الجلسه ويا تري ححتاج لمحامي يتابع ولا لاء
وفيه حاجه في ايدي اني اعملها لتحريك الموضوع
ولا كده خلاص وهما حيتصرفوا لاني قعدت 3 ايام كعب داير في الموضوع ده وحكيته باختصار شديد جدا ولسه بعاني من مشاوير القسم والنيابه علشان التليفون اللي عندهم ده بحاول اخده علشان الزبون عاوز واحد بداله وعاوزه نوكيا كمان
بس طبعا علشان مخسرش سمعتي حجيبهوله واللي يقبل علي نفسه يقبل
ومره تانيه بشكر حضرتك علي تعبك معايا
لا شكر على واجب.... متابعة الموضوع من حقك بس لازم تكون عارف رقم المحضر بتروح النيابة و تقدم طلب استعلام عن التصرف فى المحضر رقم كذا و بيردوا عليك بالتصرف اللى تم فيه إما الاحالة للمحكمة و إما الحفظ و إما بيكون المحضر لسه تحت التصرف , و بالنسبة للموبيل فمن حقك استلامه بتروح تقدم طلب لوكيل النيابة لاستلام الموبيل و بيأشر على الطلب بتسليمه ليك بعد اخذ الايصال اللازم منك بانك استلمته , و بالنسبة للمتابعة و حضور الجلسة و المحامى فكل ده مش لازم الا فى حالة واحدة هى حالة انك هتدعى مدنى يعنى تطالب بالتعويض عن الضرر اللى اصابك , و انا اعتقد ان المطالبة بالتعويض فى حالتك مش هتكون مضمونة لان موبيلك هيرجعلك و بالتالى مفيش ضرر عاد عليك - ده بالنسبة للمطالبة بالتعويض , لكن مساءلة المتهم فى الشق الجنائى ماشية بدون اى تدخل من حضرتك , بل ده انت حتى لو رحت النيابة او المحكمة و حبيت تتنازل فده ما ينفعش لان التنازل عن حقك لوحدك يجوز لكن التنازل عن حق المجتمع فى الاقتصاص من السارق لا يجوز , مع تحياتى