المحل اتسرق وعاوز مشوره قانونيه

**SHNORY** · 18-10-2008 09:25 PM

يوم الاحد اللي فات جالي تليفون من واحد صاحبي بيقولي الحق المحل بتاعك مفتوح وانا مستنيك قدامه
المهم اخدت العربيه وطبعا انتم عارفين في اللحظات دي كل حاجه في الدنيا بتكون ضدك من شوارع واقفه زغباوه سواقين المهم وصلت المحل لقيت الطبلتين بتوع الباب مقصوصين دخلت لقيت الموبيلات والفلوس مش موجودين اتسرق حوالي 7 اجهزه موبايل وشويه فلوس وكروت
كل ده مش مهم المهم عندي اجهزه الزباين لان اللي جايب جهاز خرده بيبقي ساعتها جهازه جاي من التوكيل وسليم بس جايبهولي اتفرج عليه
المهم علشان مطولش عليكم
روحت القسم عملت محضر وبدات المغامره بقي
طبعا في الحالات دي بنشتري اجهزه تانيه للزباين من غير ما يعرفوا حاجه غير بعد ما يستلموا الاجهزه
وفي وسط المسروقات كان فيه جهاز نوكيا n82صيني نزلت ادور في السوق علي شبيه ليه ملقيتش
لحد ما لقيت واحد عند واحد صاحبي في منطقه بعيده شويه عننا اسمها نادي الصيد كلمته فقالي ان فيه واحد جاره عاوز يبيعه وروحت اخدته منه
لقيته نسخه من الموبايل اللي اتسرق فقولت الحمد لله
يومها بالليل بتاكد منه لقيته انه الموبايل المسروق من عندي
فتحته لقيت الشغل اللي احنا عاملينه موجود بالحاجات اللي مغيرينها
مكدبتش خبر واخدت بعضي تاني يوم (الثلاثاء) وروحتله وقولتله يجيبلي الراجل وباستجواب الراجل قال انه شاريه من محطه الرمل
قولتله الموبايل ده مسروق من عندي وانا مش عاوزك انت انا عاوز اللي سرق ولازم تيجي معانا توريني اشتريته من مين
الراجل بصراحه كان متعاون اوي (لازم يكون متعاون ماهو اخد تمن الموبايل) وروحنا للفاترينه اللي باعت الموبايل ودخل عليه هو وواحد صاحبي وقاله انه عاوز يشتري الموبايل من الراجل ده بس عاوز ورقه مبايعه
فالراجل كتب ورقه المبايعه ومرضيش يمضي عليها واخدناها ومشينا
تاني يوم روحت قسم العطارين وعملتله محضر ونزلنا بحمله جابته واعترف انه شاريه من واحد ب40 جنيه (منه لله الموبايل تمنه ميقلش عن 400 جنيه) وقال انه كان ناقص بطاريه وضهر وهو جابله بطاريه (البطاريه والضهر كانو موجودين عندي ف المحل )
وعليها الظابط قاله يا تجيبلي اللي باعلك يا تشيلها انت وقعدت حوالي ساعتين ونص في القسم لحد ما خلصنا المحضر وانا روحت وهو بات هناك في الاوبرج
تاني يوم اتكرر نفس الموضوع في النيابه ووكيل النيابه قاله يا تجيب اللي اشتريت منه يا تشيلها انت وقالولي تعالي يوم السبت استلم الموبايل (لانه اتحرز في القضيه )
روحت النهارده وكانت الفاجعه
لقيتهم بيقولولي انهم مشوا الراجل من القسم بس ممضينه علي محضر انه ييجي وقت ما يطلبوه
الدنيا غيمت قدامي بس فيه ناس قالولي انهم لازم يمشوه علشان يجيبلهم اللي باعله ويكملوا التحريات بتاعتهم وان الموضوع كده منتهاش
فياريت حد في المنتدي يكون ليه خبره قانونيه ويفهمني هل القسم فعلا حيكمل معاه التحقيق ولا الموضوع خلص علي كده
انا كفايه اني جيبتلهم القضيه والمتهم ولا اروح انا اكمل شغلهم ولا ااخطف الراجل واجبره يجيب اللي اشتري منه
يا ريت لو حد يفيدني في ايه اللي حيحصل بعد كده وايه المطلوب مني للمتابعه
ولكم جزيل الشكر
__________________

**shanodaa** · 18-10-2008 10:03 PM

كل الخطوات اللي انت عملتها صح وتمام بس محتاج وسطه يمشي الموضوع بهتمام
واكيد الراجل ده ها يجيب الجاني

**bemocarlo** · 19-10-2008 03:24 AM

الراجل ده حرامي لانه بيتعامل مع اللصوص بس انته 10 علي 10 .
bemo,ire

**mahamedaraby** · 19-10-2008 07:12 AM

هو استاهبل وخلاص يعنى واحد شارى موبايل ب 40 جنيه ما هو اكيد مسروق يعنى مالفروض فعلا هو يشيل الليله علشان اشترى حاجه وهو عارف انها مسروقه

بس ان شاء الله ربنا هيعوضك خير وتلاقى الحارمى اللى عمل كده

**hazem_khidr** · 19-10-2008 08:12 AM

ما يقدرش يحبسوه لانه ببساطه مافيش عليه تهمه
هما الكلمتين دول بيخوفوه بيهم بس
ممكن لو كان اخد قلمين كان قال مين اللي باع له التليفون دا
بس علشان ما يدخلوش في مواويل التعذيب و الداخليه شبعانه منها اليومين دول
افرجوا عنه بس مش حيسبوه
اطمن حيوصلوا ان شاء الله للسارق
طالما فيه محضر مفتوح ما يقدروش يوقفوا التحريات فيه

بس محتاجه شويه متابعه منك

**waleedrahmy** · 19-10-2008 08:33 AM

انت راجل من ظهر راجل أي واحد غيرك كان قال عوضي علي الله وبعد عن وش المحاضر والاقسام ولا عملته مع الراجل المتعامل مع اللصوص ده تمام عشان عمره ما حايعملها تاني شوف وساطة عشان الموضوع يفضل صاحي

**amir** · 19-10-2008 12:22 PM

ربنا يكون في عونك و يعوضك خير
انت راجل فعلا و اللي عملته ده حاجه كويسه ياريت الناس كلها تعمل زيك
و اللي حصلك ده ممكن يحصل في اي بلد في العالم بس الفرق انك انت في بلدنا لازم تقوم بدور الحارس و العساس و الظابط
كان الله في عونك