العربيه اللي بابا جيبهالك مش لعبه
العربيه اللي بابا جيبهالك مش لعبه تجري بيها علي الطرق السريعه و تلعب بيها وتهدد حياة الناس.
ده مش كلام انشاء.....الشهر اللي فات كنت مسافر مع عيلتي لمطروح و ماشي بأمان الله علي سرعة 100 (أنا مبحبش أجري بالأخص وولادي معايا).
بعد الحمام بشويه عربيه سيراتو جايه صاروخ بتجري من جنب الطريق عامت من اللي كان سايقها و خبطت عربيتي...أنا كنت شايفه في المرايه وهو عمال يتمرجح و يلعب...
المهم خبطني من ورا و أستمر في سحل عربيتي قدامه لغاية لما أتقلبت مرتين علي السقف , العربيه أدمرت كليا
الناس ساعدونا علي الطريق و طلعونا من العربيه وهو وقف شويه صغيرين وبعدين خد عربيته و هرب
حتت عيل عنده 18 سنه و معاه ولد تاني أده و بنتين نفس السن
مراتي وولادي طلعوا بشوية كدمات محترمه(كلنا كنا رابطين الحزام- حتي الأطفال ورا) و أنا الحمد لله عندي مجموعة كسور متعدده في الكتف و الترقوه و أحتجت اعمل عمليه معقده في الكتف مع أحتمال حدوث عجز في مفصل الكتف بنسبه من 10 ألي 25 %
الحمد لله رب العالمين
و حسبي الله و نعم الوكيل