النهاردة في الشارع لقيت واحد بيسأل تاكسي، رايح امبابة ياوحش؟ التاكسي رد عليه عادي جدا.. لاحظت فعلا ان الرجالة دلوقتي بأت تنده بعضها بيا وحش و يا باشا و يا جميل.. افتكرت زمان لما كان حد يبحب يحترم حد كان بيقول له يا حضرت.. أو يا حضرت المحترم.. ده غير ان أفندي ده كان لقب فعلا مش تريقة او تبكيت زي دلوقتي.. لما حد يقول لحد يا أفندي يبقى يقصد تقطيم و تبكيت و بالمثل يا هانم.. برضه بتدي نفس المعنى.. في حين انها زمان كانت لقب في حد ذاته و لا بد تكون زوجة بك أو باشا :)

طبعا دلوقتي كل الناس بأت يا باش مهندس.. بدءً من الميكانيكي مرورا بالسمكري و انتهاء بأي حد.. مش فارقة. طبعا يا دكتور دي أساسي لكل الدكاترة و الصيادلة و صعب حد يقول لحد يا دكتور إلا لو كان طبيب او معاه دكتوراه. أما أستاذ فمش عارفة ليه محدش بأه يحب يتنادى بيها.

اما بالنسبة للنساء حاليا فالسائد هو يا مدام او يا آنسة.. الألطف بالنسبة لي هو يا أستاذة للناس الأغراب تماما.. أصلي مش فاهمة خالص ليه النساء بتتنادى بألقاب على حسب حالتهم الاجتماعية.. ايه المغزى يعني؟ إنما أكتر لقب بيغيظني ان حد يناديني بيه هو يا أبلة.. بس دول ممكن سواقين الميكروباص همه اللي ممكن ينادوني بيها لو سايقة جنبهم :D

أول مرة حد يناديني بعلا باشا كان هنا في نايل موتورز :D

انتوا بأه بتهتموا بالألقاب؟ و هل بيفرق معاكوا لو حد ناداكوا بلقب ما ينطبقش عليكوا؟ أو بتحبوا لقب معين الناس تندهكوا بيه؟