الموضوع: رجال الاعمال .. مهم

هتلاقى كلام كتير علمى بحت عن تعريف رجل الاعمال لكن انا هجبلك الخلاصه
رجل الاعمال=تاجر

المشاركة الأصلية كتبت بواسطة ياسر مصطفي

بجد الموضوع ده كنت عايز اكتبه من زمان
ونفسي بجد حد يرد عليا بفضفضه اكتر
رجل الاعمال او المستثمر
ايه الفرق بينهم ؟؟
ورجل الاعمال بيدير شغله ازاي يعني بيعمل ايه ..؟؟
لو انا واحد معايا فلوس كتير وعايز استثمرها
يعني بشوف في الافلام ده رجل اعمال كبير
بس مش عارف بيدير شغله ازاي
او اصلا هوا شغله عبارة عن ايه .؟؟؟؟؟؟؟؟
مناقصات بيدخلها وبترسي عليه طيب وبعدين
معلش ممكن تكون أسألتي غبيه شوية بس بجد عايز افهم
دورت كتير بس لاقيت ازاي ابقي رجل اعمل وكله كلام تنمية بشريه مش اكتر
كتبت الكلام ده بمنتهي البساطة وياريت حد يفهمني ويرد عليا


شكراً لكم

بص يا سيدى المستثمر ده راجل بيختار اداه للاستثمار بيحط فيها فلوسه و تجيبله دخل يختلف باختلاف الوسيلة يعنى سعادتك لو حطيت الف جنيه فى بنك كوديعة تبقى مستثمر صحيح مستثمر صغير اوى بل برضه مستثمر .
المستثمر غالبا لا يدير فلوسه بنفسه يعنى حد تانى بيديرهاله ممكن يبقى بنك لو عنده ودائع فيه او صندوق استثمار لو عنده اسهم مثلا او الشركة لو هو شريك فى الشركة دى
نيجى بقى لرجل الأعمال ، هو الى بيدير الشغل لنفسه او لمستثمرين أخرين و طبعا علشان يعمل كده لازم يبقى عنده الخبرة الكافية لأدارة الاموال سواء كان مشروع صناعى او تجارى او خدمى
طبعا ممكن رجل الأعمال يبقى نفسه مستثمر لو هو بيدير فلوسه بنفسه و طبعا سيبك من الأفلام و حكاية التنمية البشرية و كورسات الادارة لازم يبقى عندك خبرة فى مجال معين الأول علشان الحجات دى تفيدك لانها وسائل مساعدة انما فى الأول لازم يكون عندك خبرة علشان تدير العمل فى مجال معين و تكون فاهم كل كبيرة و صغيرة فيه و عارف كل اسراره و دى محتاجة سنين طويلة من الخبرة
بعد كده يبقى عندك دراسة قوية للمشروع مالية و فنية من حد قوى علشان يشوف الحجات الى انت مش شايفها .

المشاركة الأصلية كتبت بواسطة ياسر مصطفي

ربنا يخليك بجد افتدني جداً . وياريت نكمل الموضوع على الاساس ده وازاي اكتسب الخبرة المطلوبة لو ما اتوفرش ومقدرتش اشتغل مع رجل اعمل . وبردوا عايز اعرف موضوع المناقصات وهل رجل الاعمال هوا اللي بيفتح شركة استيراد وتصدير

الخبرة هى مهارة و قدرة على حل معظم المشكلات الى تقابلك يعنى هديلك مثل انت عايز تستورد لعب اطفال مثلا ايه الخبرة الى هنا
١ خبرة فى تكوين شركات استيراد لو هتعمل انت شركة و لو هتستعين بشركة تانية يبقى الخبرة فى اختيار افضل الشركات و اكثرهم ثقة علشان ميضحكش عليك
٢ خبرة فى البضاعة الى هتيجبها و ازاى ناوى تسوقها يعنى هتفتح محل و لا توزع على المحلات و لا تشتغل مع تجار الجملة و لا مع تجار التجزئة و هتبيع اجل و لا كاش و لا قسط و هتعرف تحصل فلوسك ازاى مت التجار لو بعت اجل
٣ خبرة فى المصدر الى هتشترى منه و ايه احسن الموردين و الجودة عاملة ايه و السعر حده الادنى و الاعلى و الفرق فى المواصفات الفنية و ازاى هتتفاوض على كل ده و لازم تتاكد من الشهادات الفنية و الصحية و البيئية للمنتج
٤ خبرة فى اجراءات الجمارك و التعريفة الجمريكية و المخلص و الورق المطلوب و الفاتورة الجمركية و شهادة المصدر و الاعتماد المطلوب
٥ خبرة فى الاجراءات البنكية و فتح الاعتماد المستندى و العمولات
طبعا انت مش هتعمل كل ده بنفسك بس لازم تكون فاهمه كويس قوى لان اى مشكلة انت الى لازم تحلها لانها شغلك و فلوسك و محدش هيبقى قلبه عليك و كل نقطة من الى انا قولتهم قيها كمية تفاصيل و مشاكل فوق ما تتخيل
مع الوقت و التجربة انت بتتعلم و تكتسب الخبرة بس معظم الناس بتشتغل الاول مع مستوردين يفهموا القصة سنين طويلة و بعد كده يستقلوا بشغلهم
طبعا انا قولتلك ابسط مجال و هو الاستيراد و التجارة التصنيع بقى فيه تعقيدات اكتر بكتير و اى مجال لازم يكون كده و على فكرة كل ما زادت صعوبة الدخول الى مجال معين و الشغل فيه كل ما زادت ارباحك و كل ماكانت اسهل كل ما ارباحك قلت او تعمل خساير يعنى بالبلدى كده لو عملت فرن فى منطقة مفيهاش و لا فرن قتعد و تبيع و تحط رجل على رجل بس لو عملت فرن فى منطقة فيها ١٠٠ فرن يبقى هتكافح كل يوم علشان تنافس و تبيع
بس نصيحة امعى تحاول تتعلم بفلوسك لانك ممكن تخسرها قبل ما تلحق تتعلم حاول تتعلم مع حد و تاخد خبرة المجال الى انت عايزه و الاستثناء الوحيد لو عندك فكرة عبقرية بجد محدش ينافسك فيها ساعتها الكلام ممكن يختلف لو لقيت حد عنده خبرة يساعدك

المناقصة هى ان الشركة او الهيئة او الحكومة تطلب توريد سلعة معينة بمواصفات معينة بادنى سعر متاح طبعا الى بيتقدم للمناقصة مستوردين و تجار كل واحد بيحط تكلفة السلعة زائد هامش ربح و بتنافسوا مع بعض
طبعا العملية دى هى كمان عايزة خبرة على الاقل تعرف مين منافسيك و قدرة كل واحد على تخفيض السعر و الا عمرك ما هتفوز بمناقصة واحدة