الموضوع: ساعدوني . العربية بتاكل بنزين

أنا شايف إن بالنسبة للي حضرتك بتوصفه ممكن يكون كويس (12.5 لتر/100 كم كويس لاستهلاك في وسط البلد)

هو فيه حاجات كتير ممكن تأثر على استهلاك البنزين... والموضوع أساسا معتمد بشكل كبير جدا على طريقة سواقتك... وخلي بالك.. لو مشاويرك بالعربية قصيرة فده يبقى طبيعي جدا.

عموما.. لو عايز الاستهلاك يقل ... خلي مشاويرك بالعربية طويلة شوية (أعلى من 15 كيلو) علشان العربية تسخن كويس واستهلاك البنزين يقل



بالنسبة للعوامل اللي ممكن تأثر على استهلاك البنزين فهي كالتالي:

أولا.. الزحمة...
لإنك بتبقى معشق الأول أو التاني بالكتير..

ثانيا.. طريقة السواقة...
الضغط بشدة على دواسة البنزين علشان تاخد تسارع عالي بيزود استهلاك البنزين بجنون

ثالثا... استخدام الفرامل...
طبعا غريبة إن الفرامل تزود الاستهلاك... إنما استخدام الفرامل معناه إنك مضطر تدوس بنزين تاني علشان تزود سرعتك.. وده بيزود الاستهلاك

رابعا.. الأوزان الزيادة...
أي أوزان مالهاش لازمة في العربية بتزودلك الاستهلاك بدون داعي

خامسا... المعوقات الميكانيكية...
والمقصود بيها أي شيء بيسبب مقاومة على أداء الموتور .. زي الفرامل القافشة... اسطوانة الدبرياج المفوتة.. مساعد أو مقص معووج... باختصار لازم العربية تكون حالتها الميكانيكية زي الفل.

سادسا: المعوقات الكهربية...
زي مشاكل في الحساسات أو برمجة الكمبيوتر أو أسلاك البوجيهات وأي شيء له علاقة بدايرة الإشعال.

سابعا... نوع الوقود..
يعني ما ينفعش تحط بنزين 80 في عربية عايزة بنزين 90.. وأبسط نتيجة هتكون زيادة الاستهلاك لإن أداء العربية مع البنزين الـ80 أقل وبالتالي حتضطر تدوس بنزين أكتر علشان تاخد أداء مرضي من العربية... ده غير الآثار السلبية على الموتور


ثامنا... مشاكل دورة الوقود ...
زي انسداد في فلتر البنزين أو فلتر الهوا.. أو مشاكل في طلمبة البنزين... كل ده بيزود الاستهلاك

تاسعا... مشاكل في دورة الاحتراق..
يعني لازم تتأكد إن البنزين بيتحرق كويس ويخرج من العادم مستريح... فلازم تتأكد من فلتر الهوا... وإن علبة البيئة في الشكمان مش مسدودة



...