تقرير عن مميزات وعيوب اللوجان الشكل الجديد 2015

**corsair** · 27-04-2015 04:08 PM

المشاركة الأصلية كتبت بواسطة eng. Mostafa

الف شكر ليك, امبارح روحت فرع الدقي, واتكلمت معاهم وشوفت ال 3 عربيات, وللأسف فترة الاستلام لاقيتها كبيرة 5 شهور للوجان و6 للسانديرو, و7 للاستيب واي

فاختارت النيو لوجان وحجزتها والحمد لله, بس للأسف الاستلام في خلال خمس شهور, اهو الواحد يكون دبر مقدم اكتر عشان يقلل الفايدة, بس يا رب سعر العربية ميعلاش فيهم يا رب

وألف شكر ليك, المرحلة الجاية بقي هبدأ اقرأ المانيوال بتاع العربية, انا حجزت النيو لوجان الاوتوماتيك الفئة التانية

الف مليون مبروك يا بشمهندس مصطفي وربنا يديك خيرها ويكفيك شرها وشر طريقها وتستلمها علي خير بأذن الله وان شاء الله سعرها مش هيزيد بس ربنا يكرمك ويكون نزل الموديل 2016 ومتستلمش موديل 2015

**khairat hammad** · 27-04-2015 06:08 PM

طب ونظام التقسيط بتاعهم ايه ممكن توضحهولي من فضلك مهندس /مصطفي ؟؟

**Ahmed mustafa** · 28-04-2015 01:09 AM

الحمد لله
تم حجز لوجان الفئة الثانية اوتوماتيك من التوكيل والتسليم في اخر شهر 7 ان شاء الله
هل المواعيد بتاعتهم مضبوطة ولا ممكن يأخروني اكتر؟

**eng. mostafa** · 28-04-2015 12:11 PM

المشاركة الأصلية كتبت بواسطة ahmed mustafa

الحمد لله
تم حجز لوجان الفئة الثانية اوتوماتيك من التوكيل والتسليم في اخر شهر 7 ان شاء الله
هل المواعيد بتاعتهم مضبوطة ولا ممكن يأخروني اكتر؟

ده فرع ايه اللي الاستلام اخر شهر سبعة؟ يعني بعد 3 شهور؟ انا مديني التسليم بعد خمس شهور من فرع الدقي

**eng. mostafa** · 28-04-2015 12:12 PM

المشاركة الأصلية كتبت بواسطة corsair

الف مليون مبروك يا بشمهندس مصطفي وربنا يديك خيرها ويكفيك شرها وشر طريقها وتستلمها علي خير بأذن الله وان شاء الله سعرها مش هيزيد بس ربنا يكرمك ويكون نزل الموديل 2016 ومتستلمش موديل 2015

طيب هتفرق ايه 2015 عن 2016؟؟

**eng. mostafa** · 28-04-2015 12:18 PM

المشاركة الأصلية كتبت بواسطة khairat hammad

طب ونظام التقسيط بتاعهم ايه ممكن توضحهولي من فضلك مهندس /مصطفي ؟؟

بص يا سيدي, انت المفروض بتدفع 25% من قيمة العربية, وبتقسط الباقي من سنة لخمس سنوات, بس بشرط ان مرتبك تلته يجيب قيمة القسط, يعني مثلا لو مرتبك 6 الاف جنيه, فانت مسموحلك بقسط شهري الفين جنيه في الشهر, قيمة الفايدة مركزتش فيها اوي بصراحة, بس بالنسبة لو هتدفع 50% فهي هتكون 9.5% تقريبا

بالنسبة للاجراءات بقي, فانت هتروح تحجز العربية وتدفع 5 الاف جنيه من مقدم العربية, وهتملي ابليكايشن وهتدفع 100 جنيه استعلامات, وتجهز ورقة بمفردات مرتبك ووصل نور وكشف حساب بنكي لاخر ست شهور, وهيتصل بيك ويجيلك الشغل تديله الحاجات دي, وان شاء الله تصدر الموافقة

**africano19_5** · 29-04-2015 12:19 PM

بصراحة كلمة رائع فى تقرير حضرتك قليلة انا من الاقصر ولما قريت موضوعك بجد خلتنى اقرر اشترى اللوجان وعلى طول كلمت الفرع الرئيسى وعرفت منهم ان ليهم فرع بالاقصر امام مكتبة مبارك عندنا وليهم كمان مركز صيانة وده طمنى اكتر انا دلوقتى عاوزك تنصحنى انا هروح فى شهر 7 عشان احجز العربية فيا ترى احجز مانوال واللا اوتوماتك واى فئة كمان والسعر هيكون اد ايه والعربية دى مناسبة لينا فى الاقصر خاصة انى من احدى قرى الاقصر ومشاويرى مش هتبقى كتير معلش هضايقك بسؤال كمان ايه حكاية الكاوتش بتاع العربية ولو نوع ردئ ايه العمل لو فى اى شئ تحب تقولهولى قبل ما اجيبها كل اذان صاغية لانك بالفعل خبير واحنا بنتعلم من حضرتك فاضل حاجة كمان معلش انا عاوز تليفون حضرتك ولك عظيم الشكر واسف للاطالة

**corsair** · 30-04-2015 03:54 PM

المشاركة الأصلية كتبت بواسطة ahmed mustafa

الحمد لله
تم حجز لوجان الفئة الثانية اوتوماتيك من التوكيل والتسليم في اخر شهر 7 ان شاء الله
هل المواعيد بتاعتهم مضبوطة ولا ممكن يأخروني اكتر؟

الف مبروك يا استاذ احمد وان شاء الله تستلم علي خير وربنا يديك خيرها ويكفيك شرها وبعدين موضوع الاستلام ده غير مضمون بالمره يا يزيد يا يقل وده طبعا حسب الطلبيات اللي جايه لان بيبقي في اولويه لتسليم الموزعين عن تسليمك انتا شغل مصالح بينهم

المشاركة الأصلية كتبت بواسطة eng. Mostafa

طيب هتفرق ايه 2015 عن 2016؟؟

مش هتفرق في حاجه غير في الموديل فقط وساعة لما تحب تغير وتبيع فرق السنة في الموديل هيفرق معاك فلوس زيادة

**corsair** · 30-04-2015 04:07 PM

المشاركة الأصلية كتبت بواسطة africano19_5

بصراحة كلمة رائع فى تقرير حضرتك قليلة انا من الاقصر ولما قريت موضوعك بجد خلتنى اقرر اشترى اللوجان وعلى طول كلمت الفرع الرئيسى وعرفت منهم ان ليهم فرع بالاقصر امام مكتبة مبارك عندنا وليهم كمان مركز صيانة وده طمنى اكتر انا دلوقتى عاوزك تنصحنى انا هروح فى شهر 7 عشان احجز العربية

انا بجد سعيد جدا بكلام حضرتك ده في حقي وانا والله يهمني اني افيد الناس في المقام الاول وربنا يتمم لحضرتك حجزها علي خير ونكون أول ناس تباركلك عليها

فيا ترى احجز مانوال واللا اوتوماتك واى فئة كمان

لو الطريق عندك زحمه ومقرف زي عندنا هات الاوتوماتيك لكن لو الدنيا لذيذه ورايقه يبقي هات المانيوال هتوفر معاك في المصاريف واستهلاك البنزين عن الاوتو ولو هتجيب مانيوال متتنازلش عن الفئة التالته علشان فرامل ال abs والنظام ده موجود من الفئة الاولي في الاوتوماتيك وسعر الفئة التالته مانيوال دلوقتي في التوكيل 97500 والاوتوماتيك سعرها 98000 للفئة الاولي و 103 للفئة الثانية

والسعر هيكون اد ايه والعربية دى مناسبة لينا فى الاقصر خاصة انى من احدى قرى الاقصر ومشاويرى مش هتبقى كتير

العربية مناسبة جدا للطرق الوعرة والمطبات لانها عاليه بالقدر الكافي وواسعه من الداخل هتريحك في قعدتها وشنطتها كبيرة ما شاء الله انا ليا قرايب في المنيا قرية مغاغا والمكان هناك المطبات فيه مينفعش عربية عادية تطلعه كانت معايا الفيرنا قبل النيولوجان كنت بنزل كل اللي معايا في العربية علشان اخد المطب وكانت بتحك بردك لكن في اللوجان الحمد لله تفاديت الموضوع ده

معلش هضايقك بسؤال كمان ايه حكاية الكاوتش بتاع العربية ولو نوع ردئ ايه العمل لو فى اى شئ تحب تقولهولى قبل ما اجيبها كل اذان صاغية لانك بالفعل خبير واحنا بنتعلم من حضرتك فاضل حاجة كمان معلش انا عاوز تليفون حضرتك ولك عظيم الشكر واسف للاطالة

اللوجان القديمة كانت بتنزل بنوع كاوتش اسمه باروم وان ده كان كاوتش سئ جدا وكل النيولوجان دلوقتي بقا بينزل بكاوتش gt او باروم تو وده افضل كتير من النوع القديم وانا كل اللي اقدر اقولهولك انك تتابعنا قبل الاستلام علشان نقولك تتصرف ازاي وتبص علي ايه العربية في المجمل جميلة جدا علي قد سعرها مفيش عربية خاليه من العيوب والمشاكل لكن لما مشاكلها تكون غير مؤثرة في الاداء يبقي تجيبها وانتا مطمن والتوكيل بتاعها كويس جدا ومبيتأخرش في اي مشكله تقابل اي حد وده رقم تليفوني 01282321455 أخوك احمد ممدوح

**Ahmed mustafa** · 01-05-2015 04:09 PM

المشاركة الأصلية كتبت بواسطة eng. Mostafa

ده فرع ايه اللي الاستلام اخر شهر سبعة؟ يعني بعد 3 شهور؟ انا مديني التسليم بعد خمس شهور من فرع الدقي

هو فرع الدقي اللي جنب نادي الصيد اعتقد ان الفرق عشان انا حجزت قبل حضرتك باسبوعين تقريبا بس انا كتبت على المنتدى متأخر شويه
واسف على التأخير في الرد بقالي فترة مش بادخل على المنتدى