الموضوع: نيسان سنترا تصل مصر اليوم -حصريا علي نايل موتورز

صنى سوبر صالون مصري هندى صيني 125 ألف + كثير من المشاكل +تصميم خارجى .......... +موتور 1500 99حصان
نيسان سنترا ياباني تجميع تايلاندى يعنى تقريبا أصلى 175 أعلى فئة و الله العظيم دى تستاهل تمنها و أكتر و بحسابات الورقة والقلم
بس هي بتخاطب العقل أكتر و على فكرة العربية دى حيبقى ليها سوق مش بطال وممكن في حالة نجاحها و أن شاء الله تنجح و تكسر الدنيا أن تقضى على هذا الكائن الخرافى العجيب اللى أسمه صنى اللى بينتشر في مصر و يتكاثر و يتكاثر زى ما تكون العربية دى فظيعة أو ببلاش من يومين كنت في بورسعيد بأزور أهلى و لقيت العربية منتشرة هناك أنتشار جامد جدا زى ما يكون اللى بيتقال عنها في المنتدى كلام خيالى و أن الناس اللى في المنتدى بيفتروا عليها و أن لا صلة بين اللى بيتقال في المنتدى و اللى بيتقال عن العربية خارج المنتدى

المشاركة الأصلية كتبت بواسطة borio1704

معرفش حضرتك عندك خلفية عن الصناعة في مصر ماشية ازاي ولا ﻷ..

بس كنت عايز أوضح معلومة صغيرة لحضرتك..

كل المواد المستوردة اللي بتدخل في صناعة منتج بيتم إعفاءها من الجمارك.. واللي بيحصل إن بييجي لجان من الرقابة الصناعية في وزارة الصناعة علشان تشوف الكمية اللي دخلت البلد دي على أساس إنها "مكونات صناعية" دخلت كلها في التصنيع ولا ﻷ..

ولو حصل إن فيه بواقي مواد خام أو قطع غيار ( حتى لو خردة ) بيتم حسابها علشان يتاخد عليها جمرك.. وبيتم تحصيلها بشكل سنوي ..

كل ده علشان تبقى مضمونة إنها دخلت فعلا في التصنيع وتبقاش باب خلفي للاتجار

بس في المقابل... ما عملوش رقابة على سعر المنتج النهائي ( اللي هو العربية )

واللي بيحصل فعليا إن الشركة بتنزل سعر العربية عن سعر المستورد بحوالي 10% علشان يبقى اسمه منتج مصري ويلاقي إقبال من المصريين


هتييجي تقوللي: طيب ماهم عندهم حق.. الاستثمارات اللي ادفعت في المصنع يجيبوا تمنها ازاي؟؟

هأقوللك: وأنا إيه ذنبي إني أشتري عربية المفروض تكون أرخص من سعرها ده بحوالي 40 ألف جنيه؟؟.... هو ليه ما يزودش الإنتاج ويصدر؟؟؟؟


بص.. من الآخر... مصانع السيارات فاتحة في مصر بس علشان السبوبة بتاعت الجمرك

وصدقني.. لو الجمرك اتلغى مش هتلاقي مصنع سيارات واحد شغال فيكي يا جمهورية مصر العربية.



...

كامل احترامى يا بشمهندس أحمد لكلام حضرتك و لكن أسمحلى أعلق على الموضوع ده بصفة درايتى به نظراً لطبيعى عملى.....زى ما زميل سابق أفاد مفيش حاجة أسمها معفاه من الجمارك فى مصر إلا لو كانت منطقة حرة او بعض الهيئات الرسمية الخاصة.....غير كده حضرتك بتاخد تخفيض جمركى على مكونات الأنتاج حسب تصنيفها
بمعنى: البلاستيك الخام عليه 3% جمارك فقط لو دخل كمكونات انتاج لتصنيع منتج محلى، المعادن عليها 5% ، المواتير مصنفة أنواع فى منها 5% و فى منها أعلى و هكذا.....
باقى القطع اللى بتشتريها جاهزة من مصر بتكون واخدة نفس المعاملة و لكن ضايف عليها ربحه زائد انه ضايف عليها 15% ضريبة مبيعات مثال الكراسى و الزجاج و البطارية و هكذا.....
لما المنتج بيكمل و تحسب كلفته بتضيف كمان عليه 15% ضريبة مبيعات ده طبعاً غير المكسب
فعلياً التصنيع فى مصر بتوفر فيه حاجتين ليس أكثر:
- تخفيض جمركى على مكونات أنتاج حسب تصنفيها ( و ليس إعفاء جمركى)
- أيدى عاملة رخيصة ( و للأسف مصر مأصبحتش فيها أيدى عاملة ماهرة رخيصة و بمقارنة إنتاجية العامل المصرى بنظيره فى بلاد أخرى نجد أنه أصبح غير رخيص لضعف الأنتاج اليومى له) و دى حقائق لا تقبل التجميل

تحياتى