الموضوع: مشكلة شخصية مش لاقيلها حل

المشاركة الأصلية كتبت بواسطة ayman20100

انا ما اهتمتش اقرا تعليقات الناس على كلامك وتقريباً جريت بسرعة في القرايه لاني حسمت الرأي تقريباً بعد ما قريت الكلام الى مكتوب منها عنك في الفيس لصاحبتها
والسؤال
انت هتأمن على عرضك وكرامتك وكرامة والدتك ازي معاها تاني
انت انهارده بصحتك وبنتك صغيرة لو كبرت في السن او تعبت بعد الشر هتصونك وتقف جنبك ولا لاء
انت عاوزها ترجع وهي سابتك شهور طويلة ومش معترفة بالغلط وانت مش فارق معاها ولا فارق معاها بنتها والاسرة
لو رجعتها وعيشت هتعيش في نار وعذاب وشك ومش هتبقى مطمن على نفسك او والدتك او تربية بنتك
ده خلاصة الكلام

المشاركة الأصلية كتبت بواسطة friendship7897

والله مش عارفة أقول أيه

لأني واحدة ست ، ونفسي أدافع عن زوجتك ، وأطلعها هي اللي صح ، وأنت اللي غلط !!!

لكن للأسف مش لاقية أي مخرج لها – بس بعد حكايتك والله شاهد على مصداقيتك – زوجتك نمرودة ، وأهلها كمان .

هم وجدوك شاريها علشان بنتك فبيلعبوا بيك ، وإليك بعض الحقائق :-

1) هل فيه بديل لوالدتك ؟ حسب كلامك لا يوجد ... إذن مش هرجع في كلامي ولا إتفاقي علشان أي حد ضد أمي .

2) فترة البعد طويلة جداً ، ودي نتيجتها الجفاء والإعتياد على عدم وجودك ووجودها .... إذن إن لم يظهرو شرائهم لك كشرائك لهم فلا رجعة .

3) بنتك في جميع الأحوال هتتربي ( ربنا يخليها لك ) ويما بنات وأولاد أتربت من غير أب أو من غير أم أو من غير الإتنين ، ولا تنسى رسول الله صلى الله عليه وسلم وإصبح أفضل خلق الله .

4) إستهترها ببيتها وأنت في أشد الظروف ( مرض عينيك وتأخيرك ، وهي بتلعب جيم ) – أنا مش قادرة أصدق ما تقوله ، وأنا مش أقصد أكدب كلامك ، ولكنه إستفهام وإستعجاب !! ، ومش عارفة أحد الأعضاء الأفاضل يقول لك كل الستات كدة ... إزاي ؟ لا طبعاً – كلكم راع وكلكم مسئول عن رعيته ( المرأة راعية في بيت زوجها ومسئولة عن رعيتها ) ؟

5) والدتك واضح أنها مش عايزة تحملك ولا تحملها أكتر من طاقتكم ، لدرجة إنها وقت الفسحة بتحرم نفسها منها علشان تريح مراتك وتسيبكم على راحتكم .

6) والدها اللي أستحمل أخته الأرملة وقدر موقف مراته ، مش قادر يقنع أبنته بالرضا والقناعة علشان نفسها وبنتها .... فهو رجل مش متناقض فقط – لا – هو راجل مش قادر يحكم على بنته أصلاً – دا هيقدر يقرر الصح من الغلط – لا أعتقد .

7) حقوق بنتك وحقوقها المادية توصل لها رسمي كل أول شهر علشان ما تكنش قليل أمام نفسك ، وبلاش عند في الحتة دي بالذات ، ورسمي علشان ميرفعوش قضية بنفقة البنت ونفقتها وتبدأ من أول ما سابت البيت ( لا قدر الله ) ، وممكن تكون رسمي عن طريق حوالة وتحتفظ بإيصالات الحوالات مثلاً .

8) أجل فكرة الطلاق مؤقتاً يمكن يفعل الله أمراً كان مفعولاً ويرزقك بهداها من حيث لا تعلم .

9) وفي الأول والأخر اللي نصيبك ليك ولها هتشوفه ، لو نصيبك ترجع لها هترجع لو كل الناس قالت لك لا ، والعكس .

10) إذا أراد الله شيئاً فإنما يقول له كن فيكون – يعني متشغلش تفكيرك ب إزاي وأمتى وسيبها لتدبير ربنا .

11) ربنا يعينك ويقويك ويرشدك على الصح .

ملحوظة : أنا عشت مع حماتي أكتر من أربع سنوات في بداية زواجي وكان عندي 22 سنة ، وكانت كبيرة جداً في السن وفاقدة السمع ، ومع ذلك أستحملتها علشان آلاقي اللي يستحملني لما أوصل لسنها ،وكانت زي ما أنت وصفت لو أختلافنا أنا وزوجي تتدخل لو طلبنا منها التدخل ولصالحي وضده ، ولا تنام حتى يتم الوفاق .

المشاركة الأصلية كتبت بواسطة maka

انت فى ابتلاء واختبار تقرب الى الله و باذن الله يفك كربك و يصرف عنك الحزن و الضيق والمشاكل

خد والداتك و اخرجوا و اتفسحوا و زوروا الناس لان انت طول ما هتقعد فاضى الفكر و الزهق هياكل دماغك

لو موسم العمرة لسه شغال و عندك مقدرة اطلع انت ووالدتك

بالنسبة لزوجتك انت شارط عليهم شرط الاقامة مع الوالدة قبل الزواج و هم من خالفوا الاتفاق

وباذن الله تفرج عن قريب

المشاركة الأصلية كتبت بواسطة mastr_n

كان الله فى عونك وربنا يصلحلك الحال ان شاء الله

عايز الخلاصة ؟
اسمع ياسيدى حاول توصلهم انك بتدور على عروسة وانك جاد فى الموضوع
تجاهلم تماما ودوس على فلبك وماتلاوحش تشوف بنتك خالص وكأنها مش بنتك ولا فى دماغك اى حاجة

ساعتها والله العظيم هايجروا عليك ويطلبوا الصلح قولهم لا بنتكم ماتلزمنيش ومش هاطلقها وهاسيبها زى البت الوقف وهاتجوز اللى تقدرنى وتقدر الجواز والعيشة وقولهم انا بقى هاربيها بطريقتى

والله هايتجننوا اكتر وهايجروا ناعم معاك بس ماتنساش تستشير محامى يضمنلك حقوقك علشان ماياخدوش محضر عليك

ساعتها بقى انت هاتقرر انهم فعلا خافوا من موضوع الجواز دة وعايزين الصلح فعلا يبقى عفا الله عما سلف وتبداء صفحة جديدة بس ماتزعلش منى ترجع وتربيها بطريقتك يعنى مافيش دلع ولا خروج ولا اى حاجة الا لما تقتنع فعلا انها ندمت على تصرفتها ورجعت انسانة جديدة

بس خلى بالك انا حكمت بكدة على كلامك اوانك موفرلها حد ادنى من الحرية الشخصية فى بيتها وعايشة عيشة كريمة

صدقنى الحل دة based on true story حصل فعلا من واحد معرفتى ومراتة وعمل كدة لحد لما هيا تابت هيا واهلها وعرفت ان الله حق

ان شاء الله ربنا يصلحلك الحال قريب ان شاء الله

المشاركة الأصلية كتبت بواسطة kemoztanta

هي اكيد بتقول " مش واخدني خدامة ليه ولوالدته " وانت متمسك ب" انا اتفقت معاهم كدا قبل الجواز "
تحت اى ظرف والدتك ملهاش حد غيرك واللي بتعمله هو الصح لانك لو عملت العكس وراضيت زوجتك علي والدتك مصيبة وكارثة كبيرة
الخلاصة : الموضوع دا لازم يخلص بالانفصال " مش هتعرفوا تعيشوا مع بعض تاني الا اذا هي جت واعتذرت وتخدم والدتك اكتر منك .. غير كدا " انسي انك تعيش حياة هادئة " وبعدين واحدة قعدت شهور ومقويه اهلها عليك ولا حست بأي ندم رغم الغلط الواضح " قلبها جامد وعنيدة" و بصراحة دي ممكن تعمل فيكم حاجة من كتر السواد اللي جواها من الظروف اللي هي عايشة فيها وحاسه ان انت ووالدتك السبب فيها.. والله انا لو مكانك هخاف منها واخاف اكل من ايديها اى حاجة

المشاركة الأصلية كتبت بواسطة aboomar22

انا مش هقول اكتر من اللى الاخوه قالوه انما فرصة انى اعطي نصيحة لكل مقبل على الزواج لما تدخل بيت شوف مين صاحب الكلمة الست ولا الراجل لو لقيت الست يبقى الجوازة دي هتجبلك وجع الدماغ لو هتناسب ناسب راجل يعرف الاصول وتعرف تتكلم معاه

المشاركة الأصلية كتبت بواسطة ahmed1981

أهم حاجة إبعد عن الظلم
الظلم ظلمات يوم القيامة


ـ

+11111111111111