دكتور أيمن أنا بصراحه محتار بين السوزوكي سويفت و النيسان صني و ميال للسوزوكي بس وسع صالون النيسان جميل جدااااااا لكن الصاج بتاع العربيه الصني ناس كتير بتشتكي منه أنه خفيف جدا تنصحني بايه
عرض للطباعة
دكتور أيمن أنا بصراحه محتار بين السوزوكي سويفت و النيسان صني و ميال للسوزوكي بس وسع صالون النيسان جميل جدااااااا لكن الصاج بتاع العربيه الصني ناس كتير بتشتكي منه أنه خفيف جدا تنصحني بايه
ماحدش يتوقع ان عفشة الارتيجا هتكون أريح من السويفت عشان الارتيجا أعلى .. اعتقد انه العكس
واعتقد ان كل عربيات سوزوكي عفشتها مش بنعومة التويوتا او الهوندا .. مش بقول انها وحشة اطلاقا لكن هو ده تصميمهم للعفشه عشان يحسنوا الثبات مقابل علو العربيه عن الارض وبرضو دي تعتبر ميزه وعيب في نفس الوقت في شوارعنا
اللى هايحدد الحيرة ... احتياجاتك إيه ... هل احتياجاتك ومن ضمن أولوياتك عربية كبيرة عشان الأسرة مثلا كبيرة وشنطها كثير وبتسافر مع الأسرة بالشنط دي كثير
ولا عربية تمشي في المدينة وتشيل أربع أفراد براحتهم وممكن شوية شنط بسيطة معاهم من شوبنج مثلا أو كدة ... وتنفع في السفر بدون شنط كثير برضه
أنا بحب السوزوكي عن النيسان عموما ... عشان كدة بفضل السويفت عن الصني طبعا ... بس أنا احيتاجاتي ممكن تكون مختلفة عن حضرتك عشان كدة إجابة السؤالين اللى فاتوا دول هي اللى هاتحددلك
وعموما السويفت صعب تقارنها بالصني لأن برضه الصني 1600 سي سي إلا من ناحية السعر (حتى في دي الصني أغلى بكثير) ... لكن السويفت تقارن بالتيدا مثلا ... سواء من ناحية الحجم أو الموتور بغض النظر عن السعر
معلش يا جماعه كام سؤال من فرجتى على العربية علشان البياعين ساعات بيفتو فى المعارض و ساعات يقولك مش عارف اصلا و فى نفس الوقت ممنوع ادارة السيارة !! و الاسئلة دى يجاوبها المجرب و لا تسأل الطبيب :)
هى العربية فيها نظام فرامل ebd ؟ اصلهم فى المعرض شاورولى على جهاز الـ ebs فقط على اليمين فى حوض الموتور.
هل فيها نظام امان للمارش بعدم اعادة ادارة المحرك بالخطأ اثناء دورانه فعليا ؟
بالنسبة الى الشاشة الديجيتال بالتابلوه : هل يوجد لمبة بيان اذا كانت شنطة العربية مفتوحه و لا لأ ؟ و هل يوجد بها درجة الحرارة خارج السيارة ؟
ما وظيفة الزرار الاسود اللى فى جانب رأس عصا الفتيس الاوتو ( زرار صغير لونه اسود ) ؟
هل يا د/ ايمن حضرتك كملت 1000 كم بالسيارة و عملت صيانه و لا لسه ؟ و لو ماكانش هل فيه اى انطباع او تجربة جديدة تفيدنا ؟
عذرا للأطالة و شكرا مقدما
بالنسبة للفرامل ... حسب موقع سوزوكي ... New gen. ABS with EBD AND Brake assist ... يعني فيها EBD, و BA كمان ... وعشان كدة أنا حاسس إنها حساسة أكتر من الفرامل المعتادة بتاعة العربيات الياباني موديلات قبل 2010 اللى ركبتها كلها
للأسف مافيهاش نظام أمان للمارش ... لأني شغلتها بالغلط وهي شغالة (ما شاء الله صوتها هادي جدا بالذات لما يكون حواليك شوية دوشة مش بتحس إنها شغالة) ولاقيتها بتدي مارش وهي شغالة
بالنسبة للشاشة الديجيتال والتابلوه .. نفس لمبة باب العربية هي هي بتنور برضه لو الشنطة مفتوحة ... درجة الحرارة الخارجية مش متاحة غير مع التكييف التاتش اللى التوكيل شاله منها وحط مكانه التكييف العادي وبالتالي مافيش درجة الجرارة الخارجية
الزرار اللى في جنب الفتيس ... ده زرار الأوفر درايف ولما بتدوس عليه بينور لمبة في التابلوه معناها إنه شغال ... ولما بيشتغل بيلغي النقلة الرابعة بتاعة الفتيس (يعني بيخلي الفتيس ثلاث نقلات فقط) ومش بينقل أي نقلة تانية للنقلة الأعلى غير لما توصل للعزم الأقصى بتاعها
أنا كملت ألف كيلو فعلا بس لسة ما عملتش الصيانة عشان مش لاقي وقت بصراحة ... بإن الله أول ما أعمل الصيانة أكتبلكوا هنا تقرير عنها
دلوقتي ابتديت أمشي بيها براحتي شوية وأقرص على الموتور واستخدمت زرار الأوفر كمان كام مرة ... ما شاء الله هي استجابتها كويسة جدا وسحبها كويس على حجمها وثباتها في المناورات والملفات الحادة مقبول جدا جدا ورائع من عربية مخصصة أصلا للمدينة ... كل ده بالتكييف لأني لغاية دلوقتي ما مشيتش بيها من غير تكييف إلا مرات قليلة جدا فجرا
لية ملحوظة سلبية إن الكاسيت بتاعها صوته شعيف جدا بالنسبة لواحد بيعشق الصوت المجسم القوي زيي .. بس بإذن الله ليها كذا حل منهم تركيب AMPLIFIER مثلا أو حاجة زي كدة ... أنا عيرتلها السماعات بتاعتها بأربعة JBL ممتازين بس لسة خرج صوت الكاسيت مش قد كدة ... برغم إنه نقي وحلو لكن ضعيف ومش بيدي بيز كويس
بحمد الله العربية عملت دلوقتي 1200 كيلومتر تقريبا ... بس لسة ما عملتش الصيانة عشان مش لاقي وقت
حتى كانت عايز أكتب المشاركة دي من أسبوع بس مش ما كنتش لاقي وقت :)
التفويلة دي اتسمت بقيادة عنيفة بعض الشيء ومعدل حرق على الغيارات بصورة متكررة وسرعات عالية وصلت في بعض الأحيان لـ 130 ك/س على طريق السويس (بس الدنيا كانت رايقة الحمد لله) وفي اغلب الأحيان 120 ك/س
وطبعا بالإضافة لزحمة وسط البلد وكوبري أكتوبر وزمسيس ونفق شبرا
وطبعا برضه كله بالتكييف
وبفضل الله عملت برضه 580 كيلومتر قبل ما احتاج بنزين مرة ثانية واللمبة تنور
580 كيلومتر
41 لتر
580/41=14.14 كيلومتر لكل لتر وقود
يعني 283 كيلومتر / 20 لتر وقود
يعني الفرق مش كبير قوي
في انتظار تقرير الصيانه أنشاء الله
انا عامل الموضوع ده للديزاير يا جماعه للى ليه أسئلة او للى يحب يشارك :)
http://www.nilemotors.net/Nile/439246-2015.html
مبروك والعربيه ده متميزه
بعد ما العربية عملت حوالي 1300 كيلو كلمت مودرن موتورز فرع الهايكستب علشان أحجز ميعاد الصيانة
المهم حجزت ميعاد يوم الثلاثاء ... وبعد الحجز تم الاتصال بي يوم الاثنين مساء لتذكرتي بإن موعد الحجز بتاعي في الصباح الباكر الساعة 11
المهم روحت على فرع الهايكستب الساعة 11 بالضبط كنت هناك
فوحئت إنهم عزلوا عربيات سوزوكي في ناحية وعربيات نيسان في ناحية تانية بس مكان الانتظار والاستقبال بتاع سوزوكي مش متوضب كويس وغير لائق وضيق بس التكييف بتاعه كان أفضل من الاستقبال القديم اللى بقى بتاع نيسان فقط اللى كله زجاج والشمس ضاربة فيه مخلية التكييف مالوش لازمة بالرغم إنهم زودوا عدد المكيفات عن زمان بصورة واضحة
المهم سألت عن تركيب الإنذار وحساسات الركن الخلفية قالولي عند مهندس الاكسسوار في استقبال نيسان روحتله اسمه المهندس محمد صلاح وهو رجل ذوق ومحترم جدا ... وخدت منه قائمة بالأسعار والكماليات اللى متوافرة حاليا ...
ودي صورتها
http://i856.photobucket.com/albums/a...T/DSC_0001.jpg
وبعد الاتفاق على تركيب الإنذار وحساسات الركن الخلفية حددلي ميعاد استلام العربية الساعة 4 العصر وتكون جاهزة بإذن الله
ملحوظة كمان على قسم الاستقبال ... هم تقريبا قرفانين وزهقانين من كثر عربيات السوزوكي الفان وإن أكثر اللى العملاء اللى جايين سواقين وأسلوبهم طبعا مش محتاج شرح أفظع من سواقين التاكسي اللى منصور عملهم فرع لوحدهم بعيد عن الملاكي بسبب خناقاتهم اللى كل شوية ...
مهندس الاستقبال كان رايح يتعامل معايا بشيء من نفاذ الصبر والزهق .. وشوية كدة وابتدى يتعدل ويبتسم ويتعامل كويس .. بص على العربية وفتح الكبوت وقالي الموتور عايز غسيل عشان تراب وشحم السفر قلتله ماشي وحسبه علي بسعر 40 جنيه
المهم سيبت العربية ومشيت
على الساعة 3:40 دقيقة كلموني عشان العربية خلصت ... كنت أنا عموما خلاص على البوابة داخل تاني ..
دخلت لقيت العربية مغسولة ومركونة في البارك عند قسم الاستقبال
استلمت العربية وشرحلي خصائص جهاز الإنذار والسينسور بارك وسلمني العربية وروحت عشان أدفع ... دفعت سعر الزيت والفلتر فقط زيت 295 وفلتر 63 .. ده طبعا غير سعر الإنذار والحساسات الموضحين في الصورة وتم إضافتهم على سعر الفاتورة النهائية
ملحوظة مهمة جدا لأي حد هايعمل صيانة السويفت سواء الهاتش باك أو الديزاير
العربية في الكتالوج مكتوب إنها بتاخد زيت موتور 3.1 لتر ... بعد ما دفعت وخلاص مافيش حد غيري في التوكيل تقريبا لأن الكل كان مشي على الساعة 5 .. خدت بالي إنهم محاسبيني على 4 لتر زيت مش ثلاثة .. قلت أروح أبص على مقياس الزيت لاقيته معدي الماكس بشوية .. يعني فعلا هم حاطين لتر زيت زيادة .. يعني فرغوا جركن الزيت كله وخلاص بدون أي حساب للمواصفة بتاعة العربية وحجم موتورها
طبعا الموضوع ده غايظني جدا لأن زيت زيادة يعني حمل على الموتور وحمل على طرمبة الزيت نفسها
عموما هم كلموني إنهاردة عشان يعملوا تقيين لمستوى جودة الخدمة والصيانة وشرحتلهم النقطة دي والله أعلم هاياخدوها بمحمل الجد ولا لأ
المهم بقى إن أي حد رايح يعمل الصيانة يركز في الموضوع ده وينبه على مهندس الصيانة إ، العربية بتاخد 3.1 لتر زيت من الكتالوج مش أكثر ... حتى لو هاتحاسب على سعر جركن الزيت كله (لأن هم ماعندهمش غير جراكن 4 لتر بتاعة توتال) يبقى تاخد باقي الزيت معاك في الجركن .. مش يتحط في العربية وخلاص
.............
تقييمي للعربية بعد الصيانة
ما شاء الله في فرق جامد في العفشة وحسيت إنها أريح بكثير بعد التربيط وأصوات كتير اختفت
تم تزييت وتشحين كل مفصلات أبواب العربية والكبوت والشنطة
تم غسيل الموتور زي ما قلت
نعومة العربية أعتقد بقت أفضل
سحبها أفضل بكتير
الإنذار
====
1- لما بتنزل من العربية حتى لو سيبتها مفتوحة الإنذار بيشتغل لوحدة بعد دقيقة واحدة يعني لو أي باب اتفتح الإنذار بيضرب ... يعني لو نزلت من العربية وجيت تركب تاني لام تفتح العربية تاني حتى لو كانت مفتوحة
2- صوته لذيذ ومش مزعج قوي ومش ضعيف برضه
3- أول باب السائق لما بيتقفل بيدي صوت سريع صغير للتذكرة بقفل السيارة
4- بيتم تشغيله على ريموت السيارة نفسه
5- ليه حساس يمكن ضبطه لدرجة الحساسية المطلوبة لأي مؤثر خارجي عشان الإنذار يضرب البسرينة بتاعته
أعتقد بس كدة لو افتكرت حاجة تاني هاكتبها بإذن الله
حساسات الركن
==========
تم تركيب أربع حساسات في الإكصدام الخلفي بعد رشهم بنفس لون السيارة وتركيب شاشة صغيرة جدا على التابلوه أمام السائق بتوضح درجة قرب الجسم الخلفي من السيارة وبتبدأ تنور لما الجسم يكون على قرب 1 متر وتنور تماما لما الجسم يكون على بعد 50 سم مع صوت متقطع في الحالة الأولى وصوت متصل في الحالة الثانية
بس حسيت إن سرعة استجابة التنبيه للجسم العائق خلف السيارة بطيئة شوية عن اللى متعود عليه في البروتون مثلا أو غيرها من السيارات
........................
بعد الحوار مع المهندس / محمد صلاح .. عرفت منه إن فيه إكسسوارات أخرى للسيارة ستصل في المدة القريبة القادمة منها الكونسول مسند الذراع اللى في النص للسائق وهايكون شعره في حدود 400 جنيه لكن الكلام غير مؤكد
......................
في النهاية القييم النهائي بالمقارنة ببعض التوكيلات الأخرى
هم أفضل بمراحل من عز العرب والكلام ده قلته في قسم بروتون أول ما اتعاملت مع عز العرب بعدهم وإتأكدت برضه لما اتعاملت معاهم بعد عز العرب ... والفروق مش في الإستقبال والنظام وسرعة إنجاز العربية فقط ولكن في كفائة الفنيين المكلفين بصيانة العربية وإحساس الواحد إن العربية اتعمل فيها شغل
أفضل من منصور بكتير لنفس النقاط السابقة
غبور اتعاملت معاه زمان أيام ما كانت مصر كلها بتشتم فيه معرفش دلوقتي هل اتحسن ولالأ ... بس لو التقييم على غبور اللى اتعاملت معاه زمان يبقى مودرن موتورز أفضل منه برضه بمراحل
التقييم ده مجرد رأي شخصي لتجاربي مع التوكيلات دي .. يعني استحالة يبقى مقياس عام لتوكيل عن الآخر