الموضوع: بحمد لله استلمت سوزوكي سويفت 2015 هاتشباك

بسم الله الرحمن الرحيم

أخونا الفاضل D . a .\ AYMAN

سبق لك منى الشكر على تقريرك الرائع عن كل الموديلات الجديده للسوزوكى والذى قرأته بعناية بالغه و لك منى الآن كل المباركه و التهنئه على هذه التحفه الجديده و أما عن هذه الخبطه فأرجو من الله أن يكون قد دفع عنك شر أعظم و ان ما حدث هو عين أصابت الرائعة الجديده و الحمد لله على سلامتك قبل أى شىء و على بساطة الضرر الحادث فى السياره.

إن إتسع صدرك لى فأرجو أن تجيب على أسئلتى الآتيه:

1 - حضرتك ذو خبرة واسعه و أكيد تعلم عن مودرن موتورز ما يعلمه الكثير . . . ألم تشعر بالخوف أو حتى بالقلق من التعامل معهم؟ . . . أم أن هناك من سيقوم بعمل الصيانات للسياره بخلاف مودرن موتورز؟

2 - ما هى مسافة التليين الدقيقه لهذه السياره؟

3 - هل السياره مصممه على إستخدام وقود 95 و تم تعديلها لتتقبل وقود 92 مثلها مثل أكثر السيارات الجديده؟

4 - لماذا قمت بتشغيل المكيف على الرغم من أنها فى مرحلة التليين؟

5 - ما هو معدل الإستهلاك الفعلى للوقود داخل المدينه و خارجها؟

6 - ما هى جودة و كفاءة صوت الكاسيت داخل السياره؟

7 - بما أنك قمت بتشغيل المكيف . . . فكيف أداؤه؟

8 - ما مدى نعومتها فى المطبات؟

9 - هل تكنولوجيا تصنيع المحرك تجعله معقد و مستحيل الإقتراب منها خارج التوكيل؟

10 - ما مدى وضوح أبعاد السياره أثناء القياده فى الزحام و أثناء ركنها؟

11 - لماذا فضلت حضرتك الهاتش باك فوق السيدان؟

أعتذر عن الإطاله و لكننى كنت متشوق لأن يجيب محترف مثل حضرتك على أسئلتى

أهداك الله كل خيرها و كف عنك كل شرها

السلام عليكم و رحمة الله و بركاته

مفيش اخبار عن ديزاير ؟؟؟

الحمدلله على كل حال . وألف مبروك على العربية وربنا يديك خيرها ويكفيك شرها .

حضرتك انا حاجز بردة من 20 يوم تقريبا لون احمر من التوكيل
هل تقريبا الاحمر علية اقبال كبير فعلشان كدة فية تأخير ؟
و هما كلموا حضرتك قبل الاستلام بفترة أد اية ؟
و هل لو كلمتهم دلوقتي أسال عن تغيير اللون ممكن استلم اسرع
و سؤال كمان بعد اذن حضرتك هو حضرتك استلمتها من فرع اية لان تقريبا احنا جيران انا في التجمع برضة

قدر الله وما شاء فعل، الحمد لله انك بخير.
اللهن بارك لك فيها

المشاركة الأصلية كتبت بواسطة d . A .\ ayman

الحمد لله استلمت سوزوكي سويفت 2015 هاتش باك من الوكيل بعد الحجز بمبلغ 98900

مبدئيا هو الحجز على العربية دي وعلى الإرتيجا كبير جدا ... ومسئول المبيعات الذوق جدا جدا الأستاذ / أحمد حسام وراني عدد الحاجزين اللى وصل لغاية 5 شهور قدام .. لكن بيقولي إن التوكيل أكيد بإذن الله هايطلب كميات أكبر من العربية لأنهم ما كانو متوقعين الإقبال ده عليها بحيث يقللوا فترة الحجز أقل من المدة الكبيرة دي اللى وصلت نص سنة

المفروض إن الاتفاق كان الاستلام بعد شهر ونص - شهرين لكن أنا استلمت بعد شهر تقريبا ... عشان كدة أعتقد إنه بيحاول يقرب المسافات شوية

وأنا قاعد كان بيكلم حد تاني عشان ييجي يستلم واحدة إرتيجا ... والمشكلة إن المعارض حاجزة أعداد كبيرة جدا منها برضه ... والأوفر برايس برة وصل 10 آلاف جنيه

ثاني حاجة العربية ضغط العجل بتاعها مش مضبوط والتوكيل ما اهتمش يعيد ضبطه بعد ما وصلت من الميناء ... لأن العربية كانت بتخبط جامد جدا في المطبات بطريقة زيادة قوي نزلت أشوف ضغط العجل لاقيته مضبوط على 45 !!! ... يعني أول ما تاخد العربية أول حاجة هاتعملها تراجع ضغط العجل وتحط بنزين

العربية معاها الكتالوج بتاعها واحد بالعربي وواحد بالإنجليزي (عشان الكلمة اللى ما تفهمهاش بالعربي تروح تقراها بالإنجليزي) .. والكوريك وشنطة العدة الصغيرة فيها مفتاح العجل والرافعة بتاعة الكوريك والقطعة الحديد بتاعة القطر وكمان الإريال بتاع الراديو ... فقط لا غير ... ولا دواسات ولا أي حاجة

ما شاء الله لا قوة إلا بالله ... العربية قيادتها جميلة جدا وأول ملحوظة للواحد وهو سايقها إنها عالية عن الأرض ... وكمان قعدتها عالية يعني وانا نازل منها كنت عامل حسابي إني هاقوم أقف من على الكرسي على الأرض زي أي سيدان عادية .. لكن لاقيت نفسي بانزل من كرسي عالي للأرض زي ما يكون الواحد راكب كروس أوفر عالية مثلا أو جيب

كام ملحوظة كدة أول ما ركبت ما كانتش باينة في مواصفاتها ..

... الإشارات بلمسة واحدة لذراع الإشارات تدي ثلاث ومضات متتالية وبعد كدة تقف لوحدها

... والكاسيت بخاصية زيادة حجم الصوت كل ما السرعة زادت وتقليله كل ما السرعة بقت بطيئة

... الفوج لايت بيطفي لوحده أول ما تطفي نور التابلوه حتى لو الزرار بتاعه مفتوح

... الفرامل حساسة شوية عن اللى أنا متعود عليه في العربيات الياباني عموما

... أهم حاجة بقى إن الدركسيون حساس جدا يعني لمسة يمين أو شمال تلاقي العربية بتروح معاك - طبعا لسة ما جربتش الموضوع ده على سرعات هايبقى عامل إزاي

... الكراسي بتاعتها مريحة ما شاء الله وقاعدة السائق واسعة وحلوة وفرشها جودته مقبولة

... مرايات الجنب جميلة جدا وواسعة وجايبة مساحة رائعة من الطريق في الخلف ... بعكس مراية الصالون كالمعتاد صغيرة بالنسبة لي (يادوب جايبة مساحة الزجاج الخلفي بالعافية)

... مقابض اليد اللى في السقف المخصصة للركاب فوق شباك كل باب ... اللى هي لما تمسك فيها وتيجي تسيبها تقوم خابطة في السقف وتعمل صوت يخض اللى جنبك دي ... فيها ميزة حلوة إنها لما بتسيبها بترجع لمكانها بالراحة من غير خبط

... نور الصالون أول ما تفتح العربية بالريموت بينور لمدة 15 ثانية أو لغاية ما المفتاح يتحط في الكونتاكت ... وانت نازل من العربية بيفضل منور لمدة 15 ثانية برضه بعد غلق الأبواب أو أول ما تقفل السنتر بالريموت

... التكييف ما شاء الله أدائه جميل في الحر اللي احنا فيه ده وصوته هادئ عن المعتاد

والحمدلله إنهاردة وأنا راجع من العمل على طريق محور المشير طنطاوي في اتجاه التجمع وماشي ثالث حارة من اليمين وسرعتي حوالي 60 - 70 كيلو / س ... فوجت باللى بيتهبد فيا من ورا والعربية رفعت العجل الشمال ورا ونزلت تاني ... آجي على جنب وأنزل أشوف فيه إيه لاقيت المنظر ده

http://i856.photobucket.com/albums/a...t/dsc_0093.jpg




واحد راكب فيرنا وطبعا طاير على الأقل 120 مش عارف بقى فقد السيطرة ولا ماله لبس فيا من الخلف في العجلة الشمال وعمل اللى انتوا شايفينوا ده ربنا يسامحه بقى

الحمد لله العربية ما لفتش مني ولا قلبت برغم إن سرعتي برضه مش قليلة والخبطة كانت جامدة لدرجة إن هو عربيته اتعجنت من الربع الأمامي اليمين ومن تحت بالذات والجنط الحديد بتاعه اتعجن على الكاوتش المطاط والمقص بتاعه اتكسر ... وطبعا بعد الخناق والبهدلة والاعتذار شوية والمسكنة شوية وانتظار الشرطة اللى عمرها ما بتيجي إلا لما حد يموت (ده لو جت برضه) وفي الآخر مشيت ... قدر الله وما شاء فعل

أحلى حاجة إني قبل ما اتخبط على طول واحد جه جنبي راكب سويفت موديل 93 ويزنق علي وعمال يشاورلي عشان أنزل الزجاج وأكلمه وفي الآخر بيقولي هي العربية دي بكام وعاملة إيه معاك!!!!! ... ياعم طيب مش كدة ومش في الشارع اللى عرضه 50 متر ده والعربيات طايرة فيه ... المهم مالحقتش بعد ما مشي أقول حتى المعوذات مافيش خمس دقائق لاقيت اللى لابس فيا من ورا :ka_che1[1]: والحمد لله

في الآخر الواحد بعد ما يسترجع الموقف يقول الحمد لله على كل شيء والحمد لله على إني ما اتقلبتش ولا لفيت حوالين نفسي في الطريق اللى مليان طيارات على الأرض ده

ده لينك فيه صور للعربية ومواصفاتها للي ما يعرفهاش ...

http://www.nilemotors.net/nile/43066...post3875662688

وأي استفسار أنا تحت أمر الجميع طبعا

استاذ ايمن معلش هى الكنبة الخلفية قابلة للطى ولا لا و جزء واحد ولا جزئين و هل فعلا الكتينة بتعتها جنزير مش سيور ولا ديه اشاعة