الموضوع: بحمد لله استلمت سوزوكي سويفت 2015 هاتشباك

المشاركة الأصلية كتبت بواسطة scientist9508

بسم الله الرحمن الرحيم

أخونا الفاضل d . A .\ ayman

سبق لك منى الشكر على تقريرك الرائع عن كل الموديلات الجديده للسوزوكى والذى قرأته بعناية بالغه و لك منى الآن كل المباركه و التهنئه على هذه التحفه الجديده و أما عن هذه الخبطه فأرجو من الله أن يكون قد دفع عنك شر أعظم و ان ما حدث هو عين أصابت الرائعة الجديده و الحمد لله على سلامتك قبل أى شىء و على بساطة الضرر الحادث فى السياره.

إن إتسع صدرك لى فأرجو أن تجيب على أسئلتى الآتيه:

1 - حضرتك ذو خبرة واسعه و أكيد تعلم عن مودرن موتورز ما يعلمه الكثير . . . ألم تشعر بالخوف أو حتى بالقلق من التعامل معهم؟ . . . أم أن هناك من سيقوم بعمل الصيانات للسياره بخلاف مودرن موتورز؟

2 - ما هى مسافة التليين الدقيقه لهذه السياره؟

3 - هل السياره مصممه على إستخدام وقود 95 و تم تعديلها لتتقبل وقود 92 مثلها مثل أكثر السيارات الجديده؟

4 - لماذا قمت بتشغيل المكيف على الرغم من أنها فى مرحلة التليين؟

5 - ما هو معدل الإستهلاك الفعلى للوقود داخل المدينه و خارجها؟

6 - ما هى جودة و كفاءة صوت الكاسيت داخل السياره؟

7 - بما أنك قمت بتشغيل المكيف . . . فكيف أداؤه؟

8 - ما مدى نعومتها فى المطبات؟

9 - هل تكنولوجيا تصنيع المحرك تجعله معقد و مستحيل الإقتراب منها خارج التوكيل؟

10 - ما مدى وضوح أبعاد السياره أثناء القياده فى الزحام و أثناء ركنها؟

11 - لماذا فضلت حضرتك الهاتش باك فوق السيدان؟

أعتذر عن الإطاله و لكننى كنت متشوق لأن يجيب محترف مثل حضرتك على أسئلتى

أهداك الله كل خيرها و كف عنك كل شرها

السلام عليكم و رحمة الله و بركاته

1- أنا ممكن أفضل مع التوكيل كام صيانة كدة لغاية 20 ألف ... وبعد كدة أكمل برة ... وعموما كل الصيانات العادية زي تغيير الفلاتر ومراجعة الزيوت وتغييرها أنا ساعات بعملها بإيدي ... المشكلة بقى في المشاكل الكبيرة الاستثنائية .. ودي اتعلمت على مدى سنوات سواقتي للعربيات إنها في جميع الأحوال الواحد بيدوخ بسببها شوية لغاية ما يعرف حلها سواء في التوكيل أو برة التوكيل .زز ونسبتها بإذن الله في العربيات الجديدة تكاد تكون منعدمة إذا ما أحسنا التصرف

يعني أنا مريت بمشكلتين كبار في الألتو اولانية كانت سخونة المحرك على السرعات العالية والثانية عداد السرعة كان بيفصل قراءة السرعة ومعاه طبعا عداد الكيلومتر ... والإثنين بعد دوخة مع كل مشكلة استمرت عدة أشهر سواء في التوكيل أو خارجه ... ما حدش عرف سبب المشكلتين غيري أنا وأنا بفكر فيهم لأن أنا اللى فاهم العربية وعارف أنا غيرت إيه جديد وركبت إيه ممكن يكون سبب المشكلة ولو حضرتك دورت في مواضيعي هنا في القسم هاتلاقيني كنت عامل موضوعين منفصلين عنهم بالتفصيل الممل

وده كان رد لي على سؤال زميل لينا في نفس مضمون سؤال حضرتك

بالنسبة للصيانة في التوكيل ... أنا أصلا ماقابلتش مشاكل قبل كدة مع التوكيل في صيانة الألتو غير إنه مضيعة للوقت والفلوس بدون فائدة ... بس لما اتعاملت مع توكيلات تانية بعد كدة زي توكيل ميتسوبيشي وعز العرب اللى واخد 7 ماركات من أفظع وأجمل ماركات العربيات في الدنيا عرفت أن مودرن موتورز ناس طيبين قوي جنبهم

وكمان من القصص اللى الواحد بيقراها هنا في المنتدى يبان إن كل التوكيلات في مصر شغالة بمزاجها بدون أي احترافية في شغلها ... وهدفها الأول والأخير هو سرقة العميل فقط لاغير ... وبتختلف بقى درجة الذوق اللى بيسرقوا بيها العميل

في ناس عندهم ذوق وهم بيسرقوكي زي توكيل كيا مثلا ... وفي ناس وقحين وهم بيسرقوكي زي منصور .. وفي ناس هبل وهم بيسرقوكي زي غبور ... وفي ناس أصلا حرامية وهم بيسرقوكي زي عز العرب اللى بياخد قطع أصلية من عربيات زيرو ويركب بدالها قطع مستخدمة أو استيراد أو مضروبة وبعلم العميل ورضاه ... وفي ... وفي ...

ولما بيكون في مشكلة حقيقية في الضمان يجب أن يتحملوها بيكون التصرف على حسب حجم المشكلة ... لأنها لو كبيرة هايعمل من بنها ويبقى الغلط عند العميل بقى سوء استخدام أو استهلاك طبيعي أو أي حاجة

ده أنا شوفت مرة توكيل من التوكيلات بيقول على الطنابير اللى عايزة تتغير إن ده استهلاك طبيعي بعد 10000 كيلو فقط مشيتهم العربية!!!!!!!!!!!!!!!!!!!!! وعايز يحمل قيمتها على العميل ... وكمان ممكن قوي ياخد القديمة يخرطها ويركبها لعميل تاني وياخد ثمنها منه برضه

2- مسافة التليين الدقيقة هي كما في الكتالوج 600 ميل بالضبط ... أو 960 كيلومتر

3- حسب الكتالوج السيارة تعمل بنوع وقود برقم أوكتيني 91 بحد أدنى خالي من الرصاص

4- التليين ليس له علاقة بتشغيل المكيف ... وكتالوج السيارة لم يشترط ذلك

5- لسة بصراحة ما حسبتش الاستهلاك الفعلي ... بس الاستهلاك على الكمبيوتر متوسط لغاية دلوقتي من 16 لـ 20 كيلو / لتر ... وبإذن الله بعد التفويل مرة أو أثنين هاقول خدت كام

6- الكاسيت صوته نقي وجميل والقائمة بتاعته مش صعبة وبيقرأ فولدرات الويندوز سواء على الاسطوانة أو الفلاش ميموري ... ولكن البيز مش قوي بالدرجة اللى أنا بحبها وده طبيعي لأن السماعات قطرها صغير برضه

7- أداء التكييف كويس جدا ما حستش إنه ضعيف أو مضايقني خلال اليومين اللى فاتوا ... مع ملاحظة إني كائن شتوي وبحب البرد جدا

8- أول ما خدتها وطلعت بيها من التوكيل روحت زودت بنزين ونسيت أضبط ضغط العجل .. وطول الطريق للبيت كنت حاسس بيها بتخبط جامد قوي في المطبات وبطريقة مزعجة والعفشة ناشفة قوي ... عقبال ما وصلت البيت كانت النقطة مضايقاني شوية ... لما وصلت قلت لنفسي أنا ليه ما بصتش على ضغط العجل وجبت المقياس بتاع ضغط العجل ولاقيت الضفط مضبوط على 45 !!!! ... طبعا سيبتها تبرد لغاية تاني يوم وضبطه على 29 زي ما هو مكتوب على القائم بتاع باب السائق الأربع عجلات ... ولاقيتإحساس تاني خالص وبقت كويسة جدا بالمقارنة بأول يوم

مبدئيا كويسة ومش ناشفة ولا حاجة ... بس برضه لسة ما أقدرش أحكم قوي إلا مع السواقة المطولة والقعدة الكتير فيها


9- كل الناس دلوقتي بقت بتفهم في شغل الحساسات والإنجكشن ... بس المهم الواحد يروح للناس اللى بتفهم دي ودول للأسف قليلين ... حتى في التوكيلات قليلين ...

10- أنا نزلت في اليوم اللى اتخبطت فيه ده وسط البلد في رمسيس ورجعت التجمع تاني ما حستش بأي مشكلة في أبعادها ... والهاتش باك عموما ركنها أسهل من السيدان في أي عربية

11- بالنسبة لي أنا عايز عربية صغيرة لمشاوير وسط البلد والزحمة ولأني هاركبها لوحدي فمش عايز سيدان ومش فارق معايا الشنطة ودائما بفكر في مبدأ التوفير ... يعني أمشي بعربية فيها شنطة ليه وأنا لوحدي ومش محتاجها الأولى إني أوفر المساحة أو الحجم اللى الشنطة هاتاخده لفرد آخر في المجتمع ممكن يكون محتاج المساحة دي في الطريق العام عشان يمشي فيها ... وبنفس المبدأ ليه أستهلك وقود كثير في عربية كبيرة 1600 أو غيرها وأنا سايقها لوحدي وأنا ممكن عربية تانية وفيها نفس الكماليات والشروط اللى بتوفي متطلبات راحتي اللى أنا محتاجلها وتكون موفرة في كل ده ... لو ما عملتش كدة يبقى بالنسبة لي إهدار لموارد الطاقة اللى احنا كدولة بنستوردها ويندفع ثمنها من دم الغلابة عملة أجنبية ممكن نشتري بيها حاجة أهم كسلعة ضروروية أكثر من الوقود

وفي المقابل في ناس تانية عايزة عربية عائلية مش عربية لوحدها فقط ... يبقى مش هاينفعها الهاتش باك وهاتبقى محتاجة السيدان ... برغم إني كان عندي الألتو وهي عربية ضيقة بكل ما في الكلمة من معاني وكنت بركب فيها أنا والمدام والأولاد .. بس كان الأولاد صغيرين وبيعرفوا يعقدوا على الكنبة الضيقة بتاعتها ... دلوقتي كبروا شوية ومابقوش يعرفوا يقعدوا فيها ... وده كان أحد الأسباب إني أغير الألتو

ومافيش إطالة ولا حاجة وأي استفسار تاني تحت أمرك

المشاركة الأصلية كتبت بواسطة shedoz

مفيش اخبار عن ديزاير ؟؟؟

هي نفس ظروف الهاتش باك .. وإن كان الاقبال على الهاتش باك أكثر من كلام مبيعات الوكيل

المشاركة الأصلية كتبت بواسطة شريف

الحمدلله على كل حال . وألف مبروك على العربية وربنا يديك خيرها ويكفيك شرها .

حضرتك انا حاجز بردة من 20 يوم تقريبا لون احمر من التوكيل
هل تقريبا الاحمر علية اقبال كبير فعلشان كدة فية تأخير ؟
و هما كلموا حضرتك قبل الاستلام بفترة أد اية ؟
و هل لو كلمتهم دلوقتي أسال عن تغيير اللون ممكن استلم اسرع
و سؤال كمان بعد اذن حضرتك هو حضرتك استلمتها من فرع اية لان تقريبا احنا جيران انا في التجمع برضة

هو كلمني قبل الاستلام بيوم واحد وكان بيكلم حد وأنا قاعد معاه بيقوله لو يقدر ييجي يستلم الإرتيجا في نفس اليوم لكن الاتفاق طبعا إنه هاييجي في اليوم التالي

المشاركة الأصلية كتبت بواسطة ahmed shams

استاذ ايمن معلش هى الكنبة الخلفية قابلة للطى ولا لا و جزء واحد ولا جزئين و هل فعلا الكتينة بتعتها جنزير مش سيور ولا ديه اشاعة

ده كان ردي على حضرتك يافندم في الموضوع التاني

الكنبة الخلفية بتفتح كلها جزء واحد ... وسير الكاتينة جنزير فعلا ... وده مؤكد عشان هاتلاقي ناس كتير بتفتي في النقطة وهي مش عارفة حتى الموظفين الإداريين في التوكيل

لأن كله فاكر إن الكاتينة هي السير بتاع الدينامو والتكييف اللى من برة

المشاركة الأصلية كتبت بواسطة abdulkhaleq

اه وسؤال تاني معلش انا عارف انها لسه بتلين
بس التكييف ايه اخباره ؟ كتسقيع وكأثر على قدرة الموتور ؟؟
معلش بقى انت اول حد يجيبها هنا فاستحمل الاسئله :)

أداؤه كويس بالنسبة لليومين الحر اللى فاتو دول ومرضي جدا (مع ملاحظة أني بحب البرد جدا) ... مش هاقدر أجاوبك دلوقتي على الفرق بينه السحب بيه أو من غيره .. لأني تقريبا كنت مشغله على طول عشان ما خرجتش بيها غير بالنهار فقط ولسة ما اتعودتش على عليها من غيره

الف مبروك و ربنا يكفيك شرها
بالنسبه لواحد تخين الكراسي هاتكون مناسبه ولا ضيقه

المشاركة الأصلية كتبت بواسطة timodax

الف مبروك و ربنا يكفيك شرها
بالنسبه لواحد تخين الكراسي هاتكون مناسبه ولا ضيقه

أنا طولي 170 سم ... وزني 77 كيلو ... وانا قاعد كنت مرتاح مش متضايق سواء ورا أو قدام ... بس لازم في جميع الأحوال حضرتك تنزل تقعد فيها بنفسك وتشوف