فك بطانة الباب الجانبى

**danash** · 20-10-2008 04:58 PM

إخوانا إزاى الواحد يفك الكسوة اللى فى الباب من الداخل لقيت طبة بلاستيك وشوية مسامير وفكيتها لقيت المقبض إتفك وما إتفكتش الكسوة نفسها عايز أصلح لوك الباب الخلف السواق كل شوية يعلق على قفل وبيبقى عايز 15 واحد عشان يرفع اللوك ومرة مايعلقش ويتفتح لوحدة واضح إن فيه حاجة بسيطة معلقة

**ENG\AHMED** · 20-10-2008 05:31 PM

الطراز والموديل ؟؟

**danash** · 20-10-2008 06:02 PM

فيكترا 96أوبل

**ENG\AHMED** · 20-10-2008 08:16 PM

-اول حاجة المقبض وانت فكيتة خلاص
-تحت جيب الباب فى 3 مسامير هتفكهم
-لو الزجاج عادى هتفك دراع الزجاج عن طريق السوستة بتاعة الدراع من ورا الدراع نفسة (هتقرفك شوية)
-لو الزجاج كهربا هتفصل الفيشة وانت بتطلع فرش الباب
-هتفك الكلبسات بتاعة الفرش (هتمد صوابعك بين البطانة والصاج وهتشد البطانة لبرة)
-فى كلبسات معدن تانية من فوق على حرف الشباك ودى غالبا رخمة شوية وبالذات لو الباب اول مرة يتفك ( بعد مافكيت الكلبسات فى الخطوة السابقة شد البطانة لأعلى )
-بعد مافكيت الفرش شيلة بحرص واقلبة على ضهرة وفك مسامير جيب الباب من جوة علشان تفك الفيشة بتاعة نور الباب

غالبا بيتبقى مشكلة التعليقة من التراب وكدة (ميكانيزم السنتر غريب شوية ) بيبقى محتاج يتزيت بس , wd-40 وتعامل

**danash** · 20-10-2008 11:26 PM

الله ينور حاجرب واضح إن حضرتك حاطط إيدك فى كل حاجة فى العربية ماشاء الله

**ENG\AHMED** · 20-10-2008 11:41 PM

المشاركة الأصلية كتبت بواسطة danash

الله ينور حاجرب واضح إن حضرتك حاطط إيدك فى كل حاجة فى العربية ماشاء الله

هى العربية بتشتكى من شوية :D

بلاش حضرتك والالقاب دى :)

**danash** · 21-10-2008 12:02 AM

لا والله لما قرأت شرحك لموضوع البيل فى جسم الموتور عرفت إنك لا تقف تتفرج على الميكانيكى بدون فهم الله يبارك لك ويكفيك شر الطريق والعالم اللى بتستهبل فى السواقة

**ENG\AHMED** · 21-10-2008 01:33 AM

المشاركة الأصلية كتبت بواسطة danash

لا والله لما قرأت شرحك لموضوع البيل فى جسم الموتور عرفت إنك لا تقف تتفرج على الميكانيكى بدون فهم الله يبارك لك ويكفيك شر الطريق والعالم اللى بتستهبل فى السواقة

انا مهندس (بعيد عن السامعين :D ) وبغض النظر عن انا بشتغل اية السيارات هوايتى من زمااااان من وانا صغير والدعبسة بردو هواية :D
بالنسبة للميكانيكى انا بطلع عينة :) ومحبش حد يمد ايدة فى العربية وانا مش شايف هو بيعمل اية لدرجة مرة اتخانقت فى التوكيل علشان بيقولى ممنوع تدخل جوة .. ودخلت :D

لازم تبقى واقف مع الميكانيكى وهو شغال فى العربية وعارف هو بيفك اية ويعمل اية متسيبوش بدماغة ولازم تبقى مقتنع باللى بيعملة
وشكرا على الدعوة :) وربنا يكفينا كلنا شر الطريق وشر اللى بيمشوا علية

**M.Mokhtar** · 21-10-2008 01:42 PM

المشاركة الأصلية كتبت بواسطة NoNaMe

-اول حاجة المقبض وانت فكيتة خلاص
-تحت جيب الباب فى 3 مسامير هتفكهم
-لو الزجاج عادى هتفك دراع الزجاج عن طريق السوستة بتاعة الدراع من ورا الدراع نفسة (هتقرفك شوية)
-لو الزجاج كهربا هتفصل الفيشة وانت بتطلع فرش الباب
-هتفك الكلبسات بتاعة الفرش (هتمد صوابعك بين البطانة والصاج وهتشد البطانة لبرة)
-فى كلبسات معدن تانية من فوق على حرف الشباك ودى غالبا رخمة شوية وبالذات لو الباب اول مرة يتفك ( بعد مافكيت الكلبسات فى الخطوة السابقة شد البطانة لأعلى )
-بعد مافكيت الفرش شيلة بحرص واقلبة على ضهرة وفك مسامير جيب الباب من جوة علشان تفك الفيشة بتاعة نور الباب

غالبا بيتبقى مشكلة التعليقة من التراب وكدة (ميكانيزم السنتر غريب شوية ) بيبقى محتاج يتزيت بس , wd-40 وتعامل

مش عارف فى الموديلات 96- 99 موجوده ولا لأ
بس بيبقى فى لمبه فى الباب من تحت بتنور لما الباب يفتح
لو عندك افصل الفيشه بتاعتها بعد ما تفك الكلبسات اللى تحت عشان ما تتقطعش منك