الموضوع: رصيد الستر

"دى قصة حقيقية ممكن الناس لو فهمتها تغير مفاهيمها فى حاجات كتير قى طرق مصر

إنت يا ابنى بتسحب كتير من رصيد الستر!!! ... الجملة دى ما اقدرش انساها من سواق عجوز زمان
ايه ده يا حاج رصيد الستر ده ؟؟ ... حاحكيلكم الحكاية ... زمان كنت متهور بشدة فى سواقتى و صدف ان ركب معايا فى يوم سواق نقل تقيل عجوز و طول المشوار و هو قاعد جنبى ما فتحش بقه لغاية ما وصلنا لقيته بيبتسم و قاللى الجملة الغريبة دى ...
و سألته يعنى ايه ؟؟ ... قاللى اوعى تكون فاكر انك وصلت مشوارك بشطارتك و حرفنتك فى السواقة ... انت وصلت مشوارك لان لسة عندك رصيد من ستر ربنا ..و هو ده اللى منع عنك خطأ الغير ... و ده رصيد زى الرصيد اللى فى البنك ... لو مش محتاجه لحاجة مهمة و طارئة ما تسحبش منه و وفره لوقت ممكن تكون محتاجه فيه جداً و يكون الرصيد وصل صفر و ساعتها اصحابك و حبايبك حيقولوا لا حول ولا قوة الا بالله
طيب و الرصيد ده بييجى منين و نعرف قد ايه ازاى يا حاج ؟؟ ... قال لا مش ممكن تعرف و ربنا بيكرمنا كلنا برصيد منه بنسب مختلفة و الرصيد ده بيكون ببلاش فى الاول و ما بتعرفش الا لما بيخلص و لكن ممكن انك تحاول ما تستهلكوش الا فى الضرورة و ممكن تحاول تزوده!!!
طب ازوده ازاى يا حاج ؟؟ ... قاللى انك تمشى بهدوء و فى حارتك و تبتغى بده مرضاة الله بحيث انك ما تسببش لاى سواق تانى اضطراب او اذى او قلق .... انك تقف و تعدى واحد ماشى على رجليه بأمان ... انك ترفع ايدك بإعتذار لو صدر منك غلطة فى السواقة للسواق اللى وراك ... انك فى الزحمة لو واحد بيحارب علشان يعدى احسن الظن و قول يمكن وراه مصيبة وعديه ... كل ده بيعبى فى حصالة الستر و الغرز و الطيران و اى استياء من واحد وراك او امامك بيسحب منها و الله اعلم قد ايه
الكلام ده عجبنى جداً مع انه بقاله زمن طويل ... و فلسفة هذا الرجل البسيط الغير متعلم قدرت وقتها تغير مفاهيمى لحاجات كتير
لو قسنا على كدة فى كل نواحى الحياة مش السواقة بس ... تفتكروا الحصالة فيها قد ايه ؟؟؟"
‫#‏ن_ن‬

منقول موضوع عجبنى جدا يمكن تكون قصة حقيقية او خيالية بس جميلة