مسافر الامارات ومحتاج مساعده

**حماده المصري** · 10-08-2014 07:28 PM

السلام عليكم

ان شاء الله مسافر الخميس الجاي الامارات زياره 3 شهور

هو غرض الزياره اني اروح لاهلي اقعد معاهم

بس بصراحه انا نفسي اطفش من البلد دي واشتغل هناك ان ابويا نفسه بيحبطني يقولي هنا البلد مقفوله ولو في شغل بيبقى مرتبات تعبانه

في نفس الوقت شايف ناس هناك بتروح وبتروح السعوديه ومحدش بيرجع طب ايه مصبرهم على المر
مفيش مقابل مادي

انا اهلي قاعدين في ام القيويين ودي اماره هناك لان ابويا شغله هناك

انا عايز من اخواننا الي عاييشين هناك يقولولي ممكن اعمل ايه ادور على شغل فين

انا خريج اعلام قسم اعلانات وعلاقات عامه اشتغلت مساعد مخرج وكول سنتر موبينيل وتور ليدر واوبيريشن في في شركه سياحه وطبعا كورسات انجليزي وتسويق الكتروني وكمان شهاده في الموارد البشريه من الجامعه الامريكيه ف هل المجالات دي مطلوبه هناك وايه ظروف المرتبات والحاجات دي وادور على شغل فين او ازاي

انا ختمت شهادتي من الخارجيه وهختمها من السفاره الاماراتيه وكمان هطلع رخصه دوليه

ياريت ياجماعه الي عندي معلومه ميبخلش عليا بيها

**M.Elwan** · 10-08-2014 08:17 PM

الامارات فيها شغل كتير وان شاء الله مترجعش وتتوفق هناك
بص في مواقع معتمدة للوظائف هناك لازم تسجل فيها وتاخد مواعيد مقابلات وانتا هناك وربنا يكرم
حاحاول اجيبلك المواقع لاني مش حافتكرها دلوقتي

**ZAMTRANS** · 10-08-2014 10:12 PM

توصل بالسلامة ان شاء وربنا يوفقك

افتكر فترة 3 شهور كافية ان شاء الله انك تلاقي شغل في دبي ودبي بس لان الفيز مفتوحة فيها لو هتعمل إقامة لأول مرة

اول متوصل ان شاء الله اتحرك في كذا اتجاه يعني جهز السي في بتاعك كويس وممكن تعمل 2 سي في واحد تسويق ومبيعات والتاني كول سنتر المهم تحدد انته عايز ايه

ثانيا اعمل اعلان ف الجرايد منها طبعا الخليج والوسيط والجلف نيوز

ثالثا سجل في مواقع التوظيف واشهرهم Naukrigulf, Monstergulf, Byte وغيرهم

رابعا ممكن طبعا تنزل توزع السي في بتاعك شخصياً بس تحاول تروح المناطق اللي فيها شركات كتير وكبيرة زي ميديا سيتي وانترنت سيتي وشارع الشيخ زايد وشارع خالد بن الوليد وغيرها

طبعا هتابع الجرايد كل يوم واهمها الخليج والجلف نيوز

حاول تسكن في دبي مشاركة وبجانب محطة مترو لسهولة التنقل

اخر نصيحة اهتم جدا باللغة الإنجليزية يعني لو لغتك كويسة ومعاك خبرة كول سنتر ممكن تشتغل كول سنتر او خدمة عملاء في شركة المهم اللغة

وبالتوفيق

**حماده المصري** · 12-08-2014 02:10 AM

شكرا ليكم جدا

واتمنى برضو لو في حد معاه معلومه مش يبخل عليا بيها

**Ahmed_Rahem** · 12-08-2014 07:43 AM

سبيك من ام القوين خالص وركز فى دبى.
البداية من قبل متسافر، جهز اكتر من CV لكل وظيفة انت ممكن تشتغل فيها.
دور على شركات التوظيف، خش على سايت yellowpages دبى واكتب شركات التوظيف، وابعت ليهم وانك هتكون فى الامارات وممكن تعمل مقابلة عمل، مع CV كاملة عنك.
وربنا يوفقك