الموضوع: ***هل نظام الاوتو ستوب في مصر آمن ؟***

انا كل يوم حالة الرعب اللي عندي بيزيد من حالة عدم الأمان اللي بقت في البلد .

بجد مبقناش عارفين نفرق بين واحد غلبان فعلا ومحتاج مساعدة مالية وواحد عامل نفسه غلبان ونصاب ولا بقينا عارفين نفرق بين حد محفظته اتسرقت بجد وبين واحد بيشتغل الناس عشان ينصب عليهم في فلوس برده ولا واحد محتاج توصيلة بجد وواحد تاني بيركب عشان يقلب الناس ويسرقهم.
بجد حاجة تحزن وربنا يسترها علينا يارب

انا حصلت معايا مرة 3 بنات كانوا بيشاوروا لتاكسي ومحدش راضي يقف وبعدين انا كنت بهدي عشان اريح شوية عشان حسيت بإني مشدودة وتعبانة لاقيتهم بيقولولي ماتوصيلنا في طريقك لو رايحة وسط البلد (كانوا بيهزروا ومتوقعوش اني هاقف اصلا) بس انا كنت كده كده هاقف عشان اريح شوية فقللتهم انا للأسف مش رايحة وسط البلد بس ممكن اوصلكوا لمحطة المترو وتركبوا المترو ايه رأيكم وافقوا وركبتهم ووصلتهم وشكروني والموضوع الحمد لله عدي علي خير بس انا كنت مرعوبة الصراحة بس بعد مالموضوع خلص وعدي على خير حمدت ربنا ودعيت اني يكون في ميزان حسناتي.

ومرة كنت في مدينة نصر وكنت بضبط زوايا وكاوتش وكده وكنت بسأل على المحل لاقيت بنتين قالولي ممكن لو رايحة عباس العقاد توصلينا في طريقك قلتلهم للأسف انا بضبط حاجات في العربية لسة والله لو كنت خلصت كنت هاخدكم في طريقى بس انا لسة جاية معلش فقالولي ميرسي ومشيوا.
بصوا يعني الموضوع مقلق فعلا وخصوصا على الطرق السريعة ده رعب لوحده (فكرتوني بفيلم ابوعلي) بس بتحصل مواقف حقيقية ومع البنات بالذات وبيبقوا متأخرين بجد ومفيش تاكسي راضي يقف عشان الباشوات بقوا ينقوا الزباين والمشاوير طبعا بس الصراحة الموضوع غير آمن بالمرة.
انا قبل ماجيب عربية كنت بتذل عشان اوقف تاكسي ولا ميكروباص يوصلني للمكان اللي رايحاه وكنت ببقي متأخرة جدا وهاعيط عشان اروح بس الصراحة عمري مافكرت اوقف ملاكي يوصلني ابدا حتى لو اللي فيها بنت عن نفسي اخاف برده.

الموضوع ده بيحصل معايا تقريبا شبه يوميا بحكم ان اغلب مواقع الشغل بتاعتى فى اماكن مقطوعة مفهاش مواصلات و الاغلب بيبقوا امناء شرطة ، يعنى اول اسكندرية الصحراوى عند موفنبيك ناس كتير الصبح بتبقى رايحة لحد البوابات او القرية الذكية ، بداية طريق الواحات عند حدائق الاهرام ناس بتبقى رايحة اكتوبر او القمر الصناعى ، الكمين اللى ف اول شارع التسعين ف التجمع الخامس بيبقوا نازلين ع الدايرى عند المنيب ده غير طبعا المنطقة الصناعية ف اكتوبر بعد الساعة 7 بتبقى مهجورة و الله ربنا اللى بيسترها وز الواحد بيبص انه يعمل خير بس فعلا فى ناس من اشكالها مينفعش خالص تقف.