مشاركة خاطئة
عرض للطباعة
مشاركة خاطئة
مبروك ويديك خيرها ويكفيك شرها
بعد اذن حضرتكوا ياريت تقولولنا ايه هى الصيانات الدوريه للألتو علشان الواحد ديه اول عربيه اجيبها ومش عارف اى حاجه خالص :( يعنى نغير فلتر وزيت والجاجات ديه كل قد ايه وبتتحسب ازاى بالشهور يعنى كل كذا شهر اغير ايه والاسعار والانواع .
شكرا مقدما .
الف مبروك يا باشا على العربية
لو العربية انت شاريها زيرو هيبقى فى صيانة الاف ودى بتبقى فى التوكيل والمصنيعة فيها بتبقى مجانا ... بتدفع انت بس حق الزيت والفلتر ... بيغيرو فيها الزيت والفلتر ويراجعو على ظبط الموتور والانوار ويربطو العفشة لو فيها مشكلة ... بعد كده انت والزيت اللى هاتحطو ... لو حاتحط زيت 5000 كيلو يبقى بعد ما تمشى 5000 كيلو هاتغيره او بعد 4 شهور حد اقصى ... لو 10000 كيلو يبقى هاتغيره بعد ما تمشى بيه 10000 كيلو او 7 شهور حد اقصى ...
بالنسبة للانواع التوكيل بيحط زيت توتال ... وده مش وحش ... ولو هاتحط بره فيه فيه موبيل وشل وحاجات تانية كتير ... الفروقات بينهم بسيطة مش جامدة والاسعار متفاوتة حسب النوع
انا ركبت الكاسيت اول امبارح وبالنسبه للدلايات كنت جايبها من محل ف المرج
موضوع ال5000 ولا ال 10000 ده حسب مشيك انت ... انا مثلا اخترت ال 5000 لانى مشاويرى صغيرة وعشان اعمل 5000 ممكن اقعد 4 شهور ويمكن اكتر ... اما لو مشاويرك طويلة وهاتكسر حاجز ال 10000 فى وقت قليل هات ال10000
بخصوص السعر اولا العربية بتاخد 3 لتر بالظبط ... فى ال 5000 انا دفعت فى الزيت 125 جنيه تقريبا ... مش عارف فى ال 10000 بكام بالظبط بس بيبقى فى حدود 220 تقريبا
ممكن كمان حاجه تانيه عايز اعرف شرح للمبات اللى فى العربيه زى الصور ديه
http://www7.0zz0.com/2014/09/02/12/630389051.jpg
مبدئيا كل اللمب دى بتنور لما تحط مفتاح العربية فى الكونتاكت وتلفه على وضع ال acc ولما بتدور العربية المفروض كل اللمب دى بتطفى ماعدا لمبة فرامل اليد .. بتطفى لما تنزل ايد الفرامل ... لو اى لمبة فضلت منورة والعربية دايرة يبقى الحاجة اللى بتشير اليها اللمبة فيها مشكلة ... ندخل بقى على لمبة لمبة
نبتدى بالعمود اللى على اليمين:
اول لمبة فوق دى لمبة زيت الموتور ... لو فيه تسريب فى زيت الموتور او ضغط الزيت غير كافى او اى مشكلة فى دائرة الزيت اللمبة هاتفضل منورة ... فى الحالة دى لازم تقف وتشوف المشكلة فين وتحلها ضرورى
تانى لمبة من فوق هى لمبة شحن البطارية ( الدينامو ) ... وتفضل منورة لو الدينامو مش بيشحن ... لازم برضو المشكلة تتحل وماتمشيش بالعربية واللمبة منورة
تالت لمبة لمبة التشيك ... وهى لما بيكون فى مشكلة فاى جزء من الموتور او محاور نقل الحركة فى العربية زى الاكسات وخلافه ... دى لو فضلت منورة تروح لاقرب مركز خدمة وهما هايعرفو ايه المشكلة
رابع لمبة من فوق فى العمود اللى على اليمين هى لمبة فرامل اليد وبتطفى لما تنزل فرامل عشان ماتمشيش وفرامل اليد مشدودة
نيجى للعمود اللى على الشمال وده فيه لمبتين
اللمبة اللى فوق دى لمبة المفتاح المشفر ( الايموبلايزر ) ... لو حاولت تدور العربية بمفتاح غير بتاعها اللمبة دى هاتقعد تنور وتطفى والعربية مش هاتدور
اللمبة التانية بتاعة الباور ... وطبعا عشان الالتو اللى نازلة مصر مافيهاش باور اللمبة دى مش هاتنور اساسا ... بس هى عامة بتنور لما بيكون فى مشكلة فى الباور ستيرنج
فى لمبة مهمة جدا مش منورة فى الصورة ... هتلاقيها على اليمين وهى لمبة الحرارة ... بتنور لما تحط المفتاح وتطفى لما تشغل الموتور ... لو فضلت منورة يبقى العربية سخنت ولازم تقف حالا وتشوف المشكلة فين
فيه لمبة تانية بتبقى على اليمين فوق لمبة الحرارة ... دى لمبة النور العالى بتنور لما بتشغل النور العالى
ودى كل اللمبات اللى موجودة فى تابلوه الالتو
نسيت اقول حاجة ان لون الاضاءة بتاع اللمبة بيبين خطورة الموضوع
يعنى اللون الاحمر ( زى لمبة الزيت والبطارية وفرامل اليد والحرارة ) ... يعنى ماينفعش تمشى بالعربية واى لمبة من دول منورة
اللون الاصفر ( زى لمبة المقتاح المشفر ولمبة التشك ) يعنى تمشى بالعربية لغاية ماتروح اقرب مركز خدمة بس مش لازم تقف اول ماتنور
اللون الازرق ( زى لمبة النور العالى ) مافيهوش ضرر على العربية وممكن تمشى بيها عادى فى اى وقت
الالوان دى استاندرد فى عربية ايا كانت ماركتها ... حاجة كده عاملة زى اشارات المرور ... فى اى بلد فى الدنيا هتلاقيها احمر واصفر واخضر