الموضوع: مشاكل غريبه فى الصنى حدثت معى

المشاركة الأصلية كتبت بواسطة walidadel

اولاً قدر الله و ماشاء فعل
و الله يكون في العون
حوار البطاريه ده طالما اتصلح يبقي كويس بس اهم حاجه تتاكد انه اتصلح و كان في ناس هنا في المنتدي حصلهم مشاكل في العربيه السوبر صالون و وصلو انهم غيروا الدفيره بتاعت العربيه في التوكيل
و من بعدها الدنيا رجعت كويسه زي الاول

بس زي ماقولت لحضرتك تاكد العيب دا مش حيرجع تاني يعني حاول تطلع بالعربيه في طريفق سفر و جربها و كده
بالنسبه لموضوع ان صوت الموتور بيغير هو مش بيغير بالمعني الواضح هو بيعلي شويه و دا العادي
لما العربيه تسخن كويس العدد بينزل عند الشرطه اللي بعد الصفر علطول و بعدين لما مثلا تولع نور التابلوه و النور الوسط تلاقي العداد رفع
دا عادي
و بعدين استني بردوا راي باقي الاعضاء و الاهم راي الاستاذ سبعاوي حيقدر يفيدك ان شاء الله

تمام وليد انا هاحاول اخدها واطلع بيها اسكندريه علشان اجربها بس هل المنطقى لما البطاريه يبقى فيها عيب يعمل كده فى العربيه ؟!!! يا ريت الاخ سبعاوى يفيدنا فى الموضوع ده
شكرا على ردك

الكهرباء لو فيها مشكلة حال العربية بيتقلب

المشاركة الأصلية كتبت بواسطة sab3aawy

انا من قبل ما اقرأ ان بتوع التوكيل قالولك انها البطارية كنت هقوللك غير البطارية قبل اى حاجة
العربيات الحديثة تختلف بشكل كلى وجزئى عن العربيات القديمة اللى ممكن تدورها وتاخد البطارية وتمشى والعربية تفضل شغالة، العربية كلها حساسات كهربائية تناظرية analogue

يعنى ايه حساسات تناظرية، يعنى حساسات بتطلع اما تيار كهربى او مقاومة كهربية او فولت يتناسب اي منهم فى شدته مع الظاهرة المراد قياسها ، امثلة : حساس ال تى بى اس عبارة عن مقاومة متغيرة بتتغير مقدار ضغطك لدواسة البنزين، حساس الإيرماس عبارة عن حساس بيولد مللى فولت بيتناسب طرديا مع كمية الهواء الداخلة للمانيفولد، حساس الأكسيجين عبارة عن حساس يولد مللى فولت يتناسب مع نسبة اكسجين غاز العادم وهكذا، كل الحساسات دى بتشتغل بالكهرباء المولدة من الدينامو والمخزونة فى البطارية، والتى تكون مقننه الكترونيا فى حدود معينة من الجهد وشدة التيار لاتتجاوزها حتى تتناسب مع احتياجات الحساسات، فلو حصل ان البطارية هيست لأى سبب فاللى بيحصل انها بتحط احمال غير محسوبة على الدينامو تضعف المحصله اللى داخلة لمكونات العربية وبالتالى هذة المكونات ممكن تطلع قراءات خاطئة تخلى الكونترول بتاع العربية يهيس، او القراغءات تخرج عن الطبيعى تماما فتخلى الكونترول يقطع البنزين والموتور يبطل ، ده غير انها ممكن تلخبط مواعيد الغيارات فى الاوتوماتيك وحاجات كتير تانية

اما بالنسبة لاختلاف صوت المحرك عند تشغيل النور العالى، فده طبيعى لان النور العالى بيحط حمل على الديانمو اللى بدوره بيحط حمل على المحرك اللى بدوره بيعبر عن احساسه بالحمل من خلال ارتفاع صوته، ده شئ طبيعى جدا، انت لو اشتغلت فى مكان فيه مولدات كهربائية بتلاقى ان المولد (موتور جاز ضخم) لما بيدور فى اللحظات الاولى قبل رفع سكينة الكهرباء وتحميله باحمال كهربائية بيكون صوته عادى جدا، وبعدين لحظة رفع السكينة وتحميل المولد ، المولد بيصرخ كأنه بيتلوى فى اعماق الجحيم ، برغم ان سرعته لا زادت ولا نقصت لان مولدات الكهرباء لازم يكون فيها مثبت سرعة علشان بحافظ على تردد الكهرباء اللى طالعة منها

بالنسبة لسرعة ال 150 فخد بالك ان دى مرتبطة بحاجات كتير جدا، العربية فاضية وللا محملة، الهواء معاك وللا فى ضهرك، الطريق مطلع وللا منزل، حالة البوجيات وفلتر الهواء ، حالة الرشاشات ، الخ ، كمان الموتور لا يصل لسرعته القصوى قبل 5000 كيلومتر استعمال، كما انه لا يصل لسرعنه القصوى من اول مرة قرص عليه، لابد من عدة مشاوير سفر حتى يصل المحرك لسرعة ال175، ومتحاولش تحصل على اكتر من 175 مع الصنى الأوتوماتيك لأن دى السرعة القصوى المقننة بتاعتها فى الكتالوج، هى ممكن تتجاوزها لو الظروف فى صالحك(رياح، السيارة غير محملة، طريق هابط)لكن لا داعى لتجاوزها باى شكل حفاظا على سيارتك

كلام منطقى جدا شكرا سبعاوى باشا افادكم الله
سؤال تانى بالمره اخبار التكييف؟؟ التكييف عندى بيبرد ضعيف بالنهار لما تكون الدنيا حر لدرجه الناس الى ورا يفضلوا يفتحوا الزجاج عن تشغيل التكييف وبيشتغل كويس جدا بليل الكلام ده بعد ما وديته التوكيل مرتين واتحسن شويه والى بقولهولك ده النتيجه النهائيه
فى ناس بيقولوا تكييف النيسان المصرى كده وفى ناس بيقولوا تكيفهم زى الفل

انا الكلام ده حصل معايا في العربية ال byd flyer وفي الاخر العيب طلع في كتاوت الدينامو
http://www.nilemotors.net/Nile/showthread.php?t=42196
وانا كنت عامل موضوع عن اللي حصل معايا ,غير اني غيرت بطارية
واحتمال يكون في وجه شبه بين العيب اللي عندك واللي حصل عندي

[quote=sab3aawy;464452]

اما بالنسبة لاختلاف صوت المحرك عند تشغيل النور العالى، فده طبيعى لان النور العالى بيحط حمل على الديانمو اللى بدوره بيحط حمل على المحرك اللى بدوره بيعبر عن احساسه بالحمل من خلال ارتفاع صوته، ده شئ طبيعى جدا


طب ممكن بس استفسار صغير يا بشمهندس سبعاوى ؟؟

انا لاحظت فى عربية صديقى نيسان صنى ان لما بشغل النور فعلا صوت الموتور بيختلف وعداد الار بى ام بيقل.

ولم الاحظها بتاتا فى اى عربية هيونداى.

ممكن التفسير ؟؟؟؟؟؟؟؟