فابيــــا 2001 بتنتش

**mohamed elkady** · 24-08-2014 01:36 PM

لما سالته يا بشمهندس احمد على موضع الجوانين قالى انا ركبت جوانين عشان يعوض فرق الخراطة ... وفعلا لما غير وش السلندر مشيت بالعربية يومين كدة بالزيت اللى كان فيها وبعد كدة غيرناه وغيرنا الفلتر ومشيت تمام ... المهم بقى دلوقتى العربية انا ركنتها ومش عارف امشي بيها وما رجعت للميكانيكى اشترالى بوجيهات جديدة الاصلى بتاعتها ونضفلى فلتر البنزين وبرده العربية مازالت بتنتش ... لاقيته بيقولى الموبينة ممكن يكون فيها حاجة ونظرا لعدم انتشار العربية هنا ولا قطع غيارها مش عارفين نحصل موبينة نجربها حتى _( هيا لها علاقة بالتنتيش اصلا ولا لاء ؟؟؟؟؟ ) يالا الحمد لله اهى مركونة فى الشارع ومش عارف امشى بيها خالص بعد ما عملت نص عمرة وركبتلها ديسك واسطوانة وبرده مش عاوزة تمشى .... الحمد لله
بالنسبة بقى لموضوع التشليح ده :- هنا لما بتغلب فى سيارة ومنتش عارف تصلحها ومش جايبة معاك همها خالص وبتصرف وبس ... التشليح ده مكانها عبارة عن تجمع للسيارات المصدومة والعطلانة والمسروقة واللى ملهاش صاحب وكدة يعنى ... وده قرار لو مظبطتش هعمله ... ويعوض عليا الكريم ان شاء الله

**ahmed el bana** · 25-08-2014 09:05 AM

ممكن الموبينا بس هل هي بتلقط معاك مارش ولا لا ؟ لو لاقطة و في صوت مارش يبقي الموبينا سليمة و هي موجودة هنا جديدة اصلي و استيراد .ربنا يكون في عونك و ما تشلحهاش .ممكن تخليه يراجع علي جوان المانفولد و الشكمان لو فيهم تسريب بيخليها تنتش برضو و ربنا كريم

**Amr_Azab** · 26-08-2014 09:26 AM

العيب اللي عندك ده سببه حاجة من اتنين ان شاء الله
الآول :-
عيب كهرباء يعني بوجيهات او موبينة
فلو العيب بيستمر معاك من اول متدور العربية يعني العربية بتبقي ملحقتش تسخن ومع ذلك تلاقيها بتنتش والسحب ضعيف يبقي بوجيهات مش كويسة
اما لو العيب بيظهر معاك بعد لما العربية بتسخن فقط يبقي موبينة

الثاني:-
عيب الجوانات اللي ركبت
لان طالما حصل خرط لوش السلندر يبقي حضرتك المفروض تعرف من الخراط المقدار التقريبي للخرط قد ايه وليكن 1 مم
يبقي بتعمل جوان بلدي سمكه = سمك الجوان الآصلي + 1مم مقدار الخرط فقط لاغير
لكن اللي حصل ان الميكانيكي حط جوانين فوق بعض وده غلط وأوضحلك غلط ليه
لو الجوان الآصلي سمكه 2 مم وبعد الآنضغاط بيبقي 1.7 مم وده السمك الآمثل المطلوب
يبقي لما حضرتك بتحط جوانين يعني 4 مم وكل واحد فيهم بينضغط ويصبح السمك النهائي 3.4 مم بعيد كل البعد عن السك الآصلي واللي هو 1.7 مم
وبالتالي غرفة الآحتراق حجمها بيزيد وشرارة البوجيه بتبقي بعيد فبتوصل ضعيفة وبالتالي بتنخفض نسبة الآنضغاط في الغرفة وبتضعف قدرة المحرك
بينما الحل الصح كان انك تعمل جوان بلدي بسمك 2.1 مم لانه بعد الآنضغاط حيحققلك فرق الخرط ويحافظ علي حجم غرفة الآحتراق وبالتالي تظل قدرة المحرك كما هي

وطبعا الكلام ده بيأثر معاك في ضعف السحب وخصوصا في المطالع والكباري وبيقلل السرعة القصوي يعني الموتور حتلاقي أخره 100 كم/ساعة مثلا وبيزود أستهلاك البنزين جدا

فشوف الآعراض دي وقولي بتحصل معاك كلها ولا لآ

**Amr_Azab** · 27-08-2014 03:48 PM

تابع موضوع أستهلاك البنزين والزيت وشوف في فرق عن الآول ولا لآ
واتأكد من حالة الفلاتر والرشاشات ( حط منظف stp)
اهي محاولة بسيطة ممكن تحل المشكلة لو الموضوع مش جوانات