الموضوع: تحذير من اتقان ديكوريشن جروب Itqaan

بعد اقل من 20 يوم سكن في الشقه بدات المشاكل التكييفات عندي كلها انفرتر فجاءه جهازين الرسبشن مش بيشتغلو كلمت الوكيل طبعا مشكورين زاروني تاني يوم
المصيبه بقي ان الحقير النصاب ده عامل كابلات توصيل الكهربا 1.5 مم في حين الجهاز 3 حصان محتاج 9 مم و الحل ان يتم عمل وصله خارجيه و طبعا رفضت لاني مش لاقي حل تاني و كده الجهاز يعتبر خرج بره الخدمه او اغيره و اجيب اتفرتر 1.5 حصان
حسبي الله و نعم الوكيل

السلام عليكم

اولا احب اعرفكم بنفسي
انا باسم شوقي الشاعر اللي الموضوع ده كله مكتوب في حقه
اعذروني هطول عليكم شوية

فيما يخص نايل موتورز - انا العضو رقم 35 و تاريخ انضمامي 2007 - اعرف كريم و بقية الاصدقاء ايام مكانش لسة في منتدى
اتعاملت مع ناس كتير هنا في علاقات صداقة و شغل و طلبو مني يردوا عنى و لكن هي مش حرب كلامية
حتى كريم منير نفسه كان بيني و بينه تعاملات مادية - بسيطة - و هو يشهد ان كان شاف منى حاجة او لا....

فيما يخص العبد الفقير لله
انا مهندس مدنى
ماجستير في ادارة الاعمال من امريكا
و 3 دبلومات في الهندسة من انجلترا
خبرة 10 سنين برة مصر
و اول مهندس مصري يشتغل project manager في مجال الهندسة البحرية في اوروبا - و لي ابحاث و اوراق علمية مسجلة باسمي - و لو حد مهتم يشرفنى اديله اللينكات....
و ممكن برضو تسالو كريم...

في 2009 - توفي والدي فقررت افتح مكتب هندسي و ابطل سفر و ارجع مهندس مدني - علشان اقعد جنب والدتى و اخواتي البنات...

في ال 5 سنين دول نفذنا عشرات المشاريع السكنى و التجاري و الاداري - و فتحنا فرع في قطر و فرع في السعودية -
اخر مشروع شغالين فيه - في 6 اكتوبر هو مركز تجاري - على غرار بورتو كايرو- استثماراته 160 مليون جنيه - نمتلك 60% منه و هو تحت الانشاء - ربنا يكرمنا و نخلصه....

عملنا شغل لزملا كتير هنا في نايل موتورز و لقرايبهم و اصدقائهم- ارضينا 90% من العملاء - واجهتنا مشكلتين على مدار فترة العرض الطويلة دي- مشكلة الدكتور امجد - شقته في المعادي - و اتحلت باننا تنازلنا عن 50 الف جنيه من المستحقات اللي لينا مع ان الملاحظات متساويش 10% من المبلغ ده- و ده مش علشان بنلاقى الفلوس في الشارع و لكن قررنا نخسر فلوس مكسبنا + خامات كمان و منقبلش دعوة من حد حاسس انه مظلوم - او قصرنا في حقه.... مع الاعتراف ان كان في تقصير لظروف كتير ...

و مشكلة المهندس محمد خزامي - صاحب الشكوى

نيجي لموضوع الشكوى و التحذير - و كل الكلام ده-

انا هقول نقاط محددة - و مختصرة و مش هارد على اي اساءة هنا - ملكوش ذنب انتو في انكم تتأذوا من كلام ملوش لزمة - و مهما رديت الاساءة بإساءة مش هيفيد في محو الاساءة اللي حصلت لي...

هاقول شوية حقائق:

- الشقة دي طولت جدا - ده حقيقي - و ده خسارة على اللي بينفذ - اكتر من صاحب المكان - بس يا ترى ايه السبب - الحقيقة اسباب كتير -في مرحلة تصميم - و بعدها في تعديلات اتطلبت و احنا شغالين - و حاجات اتغيرت خالص - و اضافات - و في اوقات نقص فيها التمويل -ثم اختلفنا مع العميل و الشغل وقف - ثم رمضان و العيد - ثم اختلفنا تاني - وهكذا.... بجانب تضارب الاراء بين المهندس محمد و من كانوا ينوبون عنه لظروف سفره - المدام و اخوها...

- نظرا لظروف شغلى و علشان منساش - فانا مشغل برنامج بيسجل المكالمات - علشان اراجع اي تعليمات من العملاء - او اي امور تخص الشغل - و بالتالي فانا عندي تسجيلات لمكالمات فيها الاتى:
- مكالمات كتير في اوقات كتير مهندس محمد خزامي بيشكر في الشغل و في التصميم و في الناس
- مكالمات كتير و شات على الواتساب فيه تكلفة كل بند و ابلاغه بيه قبل الشغل و تخييره بين الخامات و الانواع و فترات التنفيذ
- مكالمات و شات بيطلب منى المهندس محمد انى ادعمه لانه مقطوع عنه المرتب و طلب مني اصرف لحد لما ظروفه تتحسن - و قد حدث - اكتر من مرة - رغم ان اتفاقنا ان الشغل اشراف فقط و التمويل من عنده.... مع تاكيدات من طرفه ان حقنا محفوظ - و هو مالم يحدث - لان لسة لينا عنده فلوس...
- مكالمات عندما بدأ الخلاف - نتيجة التأخير - مش جودة الشغل - احتد فيها المهندس محمد علينا و شتمنى انا شخصيا بالام - وهو مالم يقله في شكوته - حيث اتصل بي لان صنايعي اتاخر - تطور الامر الي تهديد منه بالاعتداء البدنى عليا شخصيا - ثم قال بالحرف الواحد - هطلع ميتين امك - في الوقت ده كان عندي الف سبب و سبب اوقف الشغل و اتحفظ على كل الخامات و الاثاث اللي عندي - حوالي 75000 ج - الا اني ارسلت المهندسين من عندي ليكملو الشغل و قررت الا اذهب - و ده كان بعد اعتذار مهندس فاضل من طرفه اسمه احمد - رجاني انى اتجاوز و اسامح - و ان دي نرفزة و كده

و بدأنا نكمل الشقة مع المهندس احمد من طرفه - و معايا مكالماته اللي بيقر فيها ان المهندس محمد صاحب الشقة مضخم المواضيع لان ده مش مجاله و مش فاهم فيه - و كتير مهندس احمد تدخل و الحق يقال لكبح جماح مهندس محمد في اساءاته هو و افراد اسرته التى طالت حتى المهندسين اللي جم يكملو الشقة من طرفي..
المهندس احمد - اللي من طرف صاحب الشقة طلب منى باللفظ - اخد مهندس محمد على قد فهمه - و ان الشغل هيخلص و ان ميصحش اسيب شقة في النص - و انا وافقت...
في الوقت ده - سلمت العميل كل ما كان طرفي من منقولات و خامات- قبل ما اخلص حسابي - اعتمادا على ان الموضوع لا يمكن يصل الى اكل الحقوق - و لكن بمجرد تسليم اخر حاجة عندي - اظن كان شاور كابين ب 23 الف ج - تم طرد الصنايعية و المهندسين - و انهاء الاعمال - و شكرا على كده - مع استخدام اسلوب الشكوى و التحذير لارهابنا عن طلب مستحقاتنا - و فيها فلوس صنايعية و خامات اتعملت في شقته
رقم مهندس احمد 01202666135 و ده من طرف العميل - اتمنى اللي حابب يساله يكلمه و عهدي بيه راجل محترم - و انا كلمته بعد البوست بتاع مهندس محمد و انكر ابدا انه قال اننا حراميه و ان ملاحظاته فنية و ليها علاقة بالمدة...

- الشقة اتكلفت كتير - و في بنود عالية - بس مثلا ما تم ذكرة من الاوناش و خلافه - الونش كان بيجيبه حارس العمارة و بنحاسبه عليه امام مهندس محمد - و خيرناه بين اننا نجيب من الحارس علشان نعرف نستفيد منه مع فرق السعر - لاننا في الدور ال11 و ممنوع الاسانسير لكن كان بيسهل لنا الحاجات الخفيفة --- او نجيب من برة و نخسر الميزة دي - و مهندس محمد اختار الحل ده بنفسه و دلوقتى بيلومنا عليه - الله المستعان
- حاجة تانية - في وسط الشغل و بعد ما بلطنا - اتطلب مننا تعديل كبير - فيه تكسير ثم تشوينات - فطلبنا الونش تاني مرتين -

- الشقة اتكلفت كتير برضو لان مهندس محمد اختار حاجات غالية - لما نجيب شاور كابن ب 25 و جاكوزي ب 12 و وحدة حمام ب 6 مثلا و ماشابه في بنود كتير مش ممكن الشقة هتتكلف 150 الف ج + ان اللي رفع التكلفة برضو طلبات نجارة كتير و دواليب و تعديلات مطبخ و خلافه - و عدد 2 انتريه و ترابيزات ووحدات اضاءة و و - الموضوع مكانش تشطيب بس.... و انا هنزل صورة المستخلص هنا لكل الناس و اكيد في زمايلنا يشوفوا و يستفسروا و نوضح كل بند حصل فيه ايه..

- في تاخير حصل برضو في تسليم بعض البنود - زي النجارة - و ده كان من عندنا - و ده حصل منه لاول مرة - بس احنا اعتذرنا عن ده و ضغطنا على الراجل قد قدرتنا - بالمناسبة كل صنايعي او مورد كنا بندي ارقامه لمهندس محمد و عنوانه و مكانش في بند خبيناه عليه او كان غير واضح...

مهندس محمد جايب صور مقربة لبنود اثناء التنفيذ و في وسط الشغل - و بيقول عليها عيوب قاتلة - ممكن يورينا صورة للشقة يوم ما طردنا منها - او ننزلها احنا؟
انا برضو هنزل صور التصميم للحكم على مستوى تنفيذ الشغل...

- انا كمان هكتب رقم الشركة اللي وردت الانتريهات و اللي مهندس محمد بيقول اننا واكلين عليهم فلوس - 01113367789 مهندس محمد الشرقاوي - الحقيقة ان الموضوع ده مفارقة مضحكة مبكية - احنا بناخد منهم خصم 17% خصم تجاري المفروض لينا احنا على السعر كعموله - احنا اهدينا الخصم ده لمهندس محمد - صاحب الشقة - و فهمناه الموقف - و هم عرفو فطلبو مننا نلغى الخصم لانه مش للعميل - و ناخد بالسعر الرسمى لان العميل له السعر الرسمي- و فضلنا في المشكلة دي شوية علشان خاطر صاحب الشقة و رفضنا نستلم غير بسعر الخصم - و زعلو مننا - و بالمناسبة الحاجة راحت من مصنعهم على العميل مباشرة....

- بالمناسبة احنا بندي كل الاسعار في الخامات بسعر الخصم التجارى - طالما نظام الشغل اشراف - لان ده حق ربنا - حتى المصنعيات بنحاسب عليها بقيمتها....

استأذنكم انا خلصت كلامي و تفسيري للخلاف اللي حصل 4 حاجات:
- عدم معرفة العميل بالفنيات مع كلام كتير من ناس سخنوه من غير ما يعرفو التفاصيل
- استسهال التعديلات و اعتبار انها حاجة هتتم في يوم و ليله
- الاسلوب السيئ في التعامل اللي خلى كل الناس مهندسين و صنايعية مش عاوزين يشتغلوا في المكان - محدش بيحب يتشتم
- رغبة العميل انه ميدفعش اللي عليه

و اخيرا انا مسلمتش الشقة - مخلصتش الشغل - علشان اتحاسب على الفينيش النهائي
لكن حاسبونا لغاية ما كنا موجودين....

اسف لانى طولت - و لي بقى رغبة عند الادمن - خلى الشكوى موجودة بس خلى المهندس محمد يحذف الاساءات - دي قواعد المنتدى - و ده حقى...

لاي استفسار - رقمي 01111194660
سبحانك اللهم و بحمدك - اشهد الا اله الا انت - استغفرك و اتوب اليك