باركولى - عملت أول حادثة

**aratux** · 22-10-2008 09:40 AM

من ربع ساعة عملت أول حادثة من ساعة ما بدأت أسوق (سنتين و نص تقريبا)
فى شارع التحرير فى الدقى, فيه يو تيرن عليه عسكرى مرور, قفل اليوتيرن و فاتحلنا الطريق و العربيات واقفة فى اليوتيرن, فجأة ألاقى موتوسيكل لف اليوتيرن و بقى قدام العربية و مافيش وقت إنى أفرمل حتى
طبعا الباشا واخد طفلين معاه على الموتوسيكل بيوصلهم المدرسة
أنا خفت عليهم همة رحت كاسر الدريكسيون علشان أبعد عنه, ألاقى صوت الخبطة
تاكسى لبس فية من ورا
عندى فانوس شمال ورا اتكسر (الحتة البيضاء اللى فيه)
طبعا سواق الموتوسيكل بصلى من فوق كتفه و كمل طريقه عادى خالص

حد يعرف الفانوس ده يتصلح و لا لازم يتغير؟؟

**MedaSam** · 22-10-2008 11:13 AM

mabrooooooook ya man ........ we rabena yeg3alha 2a7'er el a7zan :D

**r0xer** · 22-10-2008 11:17 AM

هو يوم باين من أوله

لسة واحد حلوف تحت كوبري امبابة كاسر عليا ومبوظلي الاكصدام اللي قدام و نص نقل سوهاج يعني مفيش مجال انك تتكلم و كمان مش عاجبه وبيقولي انتو يابتوع مصر عليكم اختراعات!!

طبعا اللي بيروح هناك عارف ومتخيل أكيد قد ايه الحتة اللي هناك دي صعب جدا انك تخرج منها سليم!

والي زاد وغطى....مفيش باركن في الكيت كات او شارع السودان لأن فخامتها هتعدي من شارع السودان فممنوع إن امثالنا من الرعاع يركن هناك.

ربنا يعوض عليك وحاول تغير الفانوس في اقرب فرصة و لنا الله جميعا!

**mahamedaraby** · 22-10-2008 11:18 AM

مبروووك ياعم انت حققت رقم يعتبر قياسى فى مصر :k20:

وطبعا ربنا يعوضك خير والله اكتر حاجه بخاف منها وانا بسوق الموتسكيل اى خبطه هتلاقي اللى راكبه على الارض وكمان انت بتقول انه كان معاه اطفال يعنى كانت هتبقى مشكله الحمد لله انها جت على كده

**analyzer** · 22-10-2008 12:36 PM

قدر الله وما شاء فعل

**osamaelbaz** · 22-10-2008 12:40 PM

الف مبروك ويارب متعودها دى ايام انا بقى يا دوبك استلمتها وبعد شهر شوطت بيها توكتوك بس الحمد لله كنت حاطط ديفيندر نيكل قدام هو الى خد الخبطة بس بجد سنتين ونص دة رقم قياسى وخاصة لو عايش فى القاهرة ربنا يقدرك وتكسر الرقم دة

**aratux** · 22-10-2008 01:04 PM

المشاركة الأصلية كتبت بواسطة mahamedaraby

مبروووك ياعم انت حققت رقم يعتبر قياسى فى مصر :k20:

وطبعا ربنا يعوضك خير والله اكتر حاجه بخاف منها وانا بسوق الموتسكيل اى خبطه هتلاقي اللى راكبه على الارض وكمان انت بتقول انه كان معاه اطفال يعنى كانت هتبقى مشكله الحمد لله انها جت على كده

و الله يا باشا لولا الأطفال اللى معاه كنت هاشوطه و مالوش دية عندى
انا بس عندى أطفال و بخاف على أى طفل باشوفه

على فكرة, هوة فانوس يمين مش شمال

**aratux** · 22-10-2008 01:05 PM

المشاركة الأصلية كتبت بواسطة osamaelbaz

الف مبروك ويارب متعودها دى ايام انا بقى يا دوبك استلمتها وبعد شهر شوطت بيها توكتوك بس الحمد لله كنت حاطط ديفيندر نيكل قدام هو الى خد الخبطة بس بجد سنتين ونص دة رقم قياسى وخاصة لو عايش فى القاهرة ربنا يقدرك وتكسر الرقم دة

و الله كنت فخور جدا بالرقم ده و كان نفسى أكملها كدة, خصوصا إنى ملتزم جدا فى سوقتى و باكون مركز جدا فى كل اللى حوالية

الحمد لله على كل شىء و العيال اللى كانوا مع الراجل ما جرالهمش حاجة

**aratux** · 22-10-2008 01:08 PM

المشاركة الأصلية كتبت بواسطة r0xer

هو يوم باين من أوله

لسة واحد حلوف تحت كوبري امبابة كاسر عليا ومبوظلي الاكصدام اللي قدام و نص نقل سوهاج يعني مفيش مجال انك تتكلم و كمان مش عاجبه وبيقولي انتو يابتوع مصر عليكم اختراعات!!

طبعا اللي بيروح هناك عارف ومتخيل أكيد قد ايه الحتة اللي هناك دي صعب جدا انك تخرج منها سليم!

والي زاد وغطى....مفيش باركن في الكيت كات او شارع السودان لأن فخامتها هتعدي من شارع السودان فممنوع إن امثالنا من الرعاع يركن هناك.

ربنا يعوض عليك وحاول تغير الفانوس في اقرب فرصة و لنا الله جميعا!

هوة فعلا يوم غريب
واحد صاحبى النهاردة بيحكيلى إن واحد زنق عليه (قاصد) و كان عايز يحكله عربيته علشان ماوسعلوش لما إداله كلاكس علشان ماكانش فيه مكان يوسعله
الباشا خدها على كرامته و راكب عربية موديل سبعينات, قرر يحك عربية صاحبى و خلاه يحك فى الرصيف

مش عارف فيه ايه فى البلد دى !!!