الموضوع: مساعده في شراء موبايل؟

المشاركة الأصلية كتبت بواسطة mr_who515

تحياتي لأعضاء المنتدى الأفاضل..

هاشتري موبايل Samsung Galaxy Note 3 الـ 4G،

محتاج ارائكو واقتراحتكو من ناحية الأفضلية والسعر وأشتريه منين وأخلي بالي من أيه وأنا بأشتريه وياريت الناس اللي اشتروه يحكو عن تجربتهم للموبايل ويستاهل فعلاً ولا لأ؟

مبروك مقدما بس انا رأيي الشخصي بﻻش ال 4g عشان مصر اساسا شركات المحمول لسه منزلتش سرعات ال 4g ف مصر فمش هتستفاد حاجة من ال 4g غير كدة ملوش ضمان ف مصر فلو ﻻ قدر الله حصله حاجة هتحتاس بيه انا من رايي تشتري ال 3g احسن ليه ضمان ف مصر والتليفون معايا وبصراحة والله رائع الفرق بينهم ان ال 4g البروسيسور اعلي ب 0.4 ghz بس وبيصور 4k وال 4k ﻻزمه تلفزيون 4k زيه ولما سألت الراجل بتاع سامسونج قالي النسخة ال 4g الship بتاعتها ملهاش قطع غيار واسأل بردة ف المحﻻت يمكن يكون حصل جديد بعد اما اشتريت

ربنا يوفقك في الشراء بس مجرد تحذير.
فكر ألف مرة قبل شراء منتجات سامسونج .. ليه تجربة سيئة جداً معاهم في شراء تليفون جراند 2 بعد ما اشترتيه بشهرين ظهر بيه عيوب صناعة كثيييييير ابرزها تسقيط الشبكة .. وبقالي شهرين بتردد على الصيانة وكل ما اروح اقعد هناك حوالي ساعتين من الزحمة وكثر مشاكل وعيوب الصناعة في تليفونات سامسونج وللاسف الشديد خدمات الصيانة وما بعد البيع سيئة جداً جداً جداً ولا تجد ولا تستطيع أن تجد مسئول تعرف ان تتحدث معه.

المشاركة الأصلية كتبت بواسطة mr_who515

إن شاء الله..

أنا فعلا لما بدخل على صفحتهم ع الفايس بوك بلاقي ناس كتير بتشتكي من سوء خدمة مابعد البيع بس كان أغلبها خاصه بأجهزة كهربائية مش موبايلات لدرجة أن كتير بيفكرو يبعتو شكوى مجمعه في الوكيل المصري لـ سامسونج كوريا عشان يتسحب منه التوكيل أو يتفرض عليه غرامات وتعويضات للمتضررين!

لو انت قريب من فرع الصيانة بتاع سامسونج 50 شارع الحجاز مصر الجديدة روح اقعد هناك نص ساعة بس وشوف كمية التليفونات الجديدة اللي فيها مشاكل وعيوب صناعة لا حصر لها .. لدرجة ان احد العملاء "ضابط شرطة" عمل محضر في مدير الصيانة اللي هناك في سامسونج لسوء المعاملة والتحايل والنصب اللي مكتوب في شهادات الضمان وجابله قوة من القسم علشان مدير الصيانة مكنش عاوز يوري للراجل اللي بيعمل المحضر بطاقته .. الموقف دا حصل قدامي .. وطبعا ضابط الشرطة اخد حقه وقالولو هنستبدل لك التليفون .. لازم تكون ضابط شرطة في البلد دي علشان تعرف تجيب حقك.