باركولى اخيرا استلمت الكروز

**Mahmoud_Yassin** · 03-09-2014 07:32 AM

النهاردة رحت التوكيل واستلمت العربية اخيرا .انا كنت حاجز من اكتر من اسبوعين ودافع تمنها ومستنى الشحنة اللى جاية . انا كان نفسى فى اللون الابيض بس ما فيش وجبت الفضى هو حلو برضة عشان مبين ابعاد وحجم العربية .
المهم وانا با شيك على العربية لقيت عيب فى الكاوتش عامل زى بالونة كبيرة فية . مش فاهم ازاى عربية لسة كل اللى ماشياة على العداد 12 كيلو والكاوتش فية العيب دة . بصراحة حاجة تضايق جدا . بصيت على التاريخ الصناعة بتاعة لقيت الاسبوع ال16 2014 . رحت جبت مدير الفرع ومدير المبيعات ووريتهم العيب دة . . المهم الناس بصراحة كانوا ذوق جدا وكلموا الادارة وقالولى احنا حنغير الكاوتش بس لازم يبعتوة الاسكندرية الاول فى مخازننهم هناك .
وحييجى يوم الاتنين وخيرونى بين انى استلم وهما يجيبوا الكاوتش او اسيب العربية واستلمها لما يجيبوا الكاوتش . قلت استلمها وخلاص
شوفوا بقى حركات منصور الزبالة : بعد موضوع الكاوتش هما ماكانوش عارفين يعملوا اية وعايزين يراضونى بأى شكل . قلت بس . ادوس عليهم . مش عارف جة فى بالى فجأة الموضوع اللى كان كاتبة استاذ حسام علوانى وانهم اعطوة غطا للعربية قلتلهم فين الغطا بتاع العربية . فى ثوانى لقيت غطا العربية جة وهو بتاع الكروز لانة جاى على مقاسها بالظبط . وشيك وحلو . قلت اتك عليهم تانى . قلتلهم فى التوكيلات المحترمة بيكون فية ميدالية وفى ثوانى لقيت علبة شيك جدا و كبيرة فتحتها لقيت فيها ميدالية ومكان فاضى دة بتاع الكتالوج . وهما كانوا حاطين الكتالوج فى درج التابلوة .
بصراحة متغاظ جدا من الحركات الزبالة دى بتاعة منصور . واكيد كل الوكلاء كدة
دى حاجات جاية من برة للعميل . ودافع تمنها لية بيسرقوا الناس حتى فى غطا وميدالية .
ويمكن يكون فية حاجات تانى واحنا ما نعرفش .
واخيرا . انا بأشكر كل اعضاء المنتدى وكل واحد كتب معلومة هنا اوشارك برأية لانكم انتم اصحاب الفضل بعد ربنا فى اتخاذى قرار شراء الكروز

**aymanshebl** · 03-09-2014 07:40 AM

الف مبروك بس حكاية الكاوتش و المراضيه ديه مش مرييحانى غالص خصوصا ان العربية جديدة زيرو

**Mahmoud_Yassin** · 03-09-2014 07:45 AM

الله يبارك فى حضرتك .
مش عارف بصراحة اية سبب موضوع الكاوتش دة . هل دة عيب ممكن يحصل عادى فى الكاوتش ولا اية

**Mahmoud_Yassin** · 03-09-2014 07:49 AM

هو ال ESP بيبقى مكتوب فى عدادات العربية ولا لية رمز انا اللى اخدت بالى منهم فى العدادات ال ABS وال tc

**mhkorayem** · 03-09-2014 08:17 AM

1000 مبروك عليك العربيه وربنا يباركلك فيها

**Moratoz** · 03-09-2014 09:43 AM

1000 مبروك

**aymanshebl** · 03-09-2014 10:05 AM

المشاركة الأصلية كتبت بواسطة mahmoud_yassin

الله يبارك فى حضرتك .
مش عارف بصراحة اية سبب موضوع الكاوتش دة . هل دة عيب ممكن يحصل عادى فى الكاوتش ولا اية

اصل مش طبيعى ان عربية زيرو و الكاوتش فيه بلونة البلونة ديه بتحصل لما تكون خت مطب اوحفرة جامد؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟!!!!!!!!!!!!!!!!!!!!!!!

**skoda1996** · 03-09-2014 11:06 AM

مبرووووووك و عقبال ما تمشي بيها مليون كيلو ان شاء الله

**hany63** · 03-09-2014 11:09 AM

الف مبروك على العربيه
بالنسبه للبالونه سيدي الفاضل لازم تعرف ان عربيتك كانت جايه من بلادها و عدادها زيرو
المفروض الوكيل دايما بيستعمل كساحات في نقلها من الجمرك لمركز الخدمه عشان يعمل شيك عليها و هنا بتتساق حوالي ٢ كيلو و بعدين كساحه تانيه تنقلها على معرض او مخزن يعني تقريبا برضه على الزيرو بمعنى الكلمه
العشره كيلو اللي عند حضرتك بيقولوا انهم اشتروا دماغهم في اخر مرحله و في واحد ساقها و طبعا كان طاير بمعنى الكلمه و خد بيها المطب و ده سبب البالونه
انا لسه مستلم عربيه بيجو زيرو و فعلا كانت ماشيه ٢ كم لاغير