الكلام ده صحيح و انا كل العربيات اللي بتيجي تفحص اعطال عندي جديده بيبقي بسبب ان المعرض شايل فيشة ال abs علشان العربيه ماتحسبش كيلومتر في النقل و مشاوير المعرض
عرض للطباعة
الكلام ده صحيح و انا كل العربيات اللي بتيجي تفحص اعطال عندي جديده بيبقي بسبب ان المعرض شايل فيشة ال abs علشان العربيه ماتحسبش كيلومتر في النقل و مشاوير المعرض
با جماعة انا مش بقول ان كل الناس نصابة في المجال والموضوع الغرض منه انه ما يتنصبش عليك
(( الا من رحم ربي ))
وانت مش هتبطل تتعامل مع النصابين والحراميه الفكرة انك ما تبقاش مغفل وتخليه ينصب عليك
كل الحاجات الى ذكرتها قولت طريقة النصب وازاي بيتنصب عليك فيها وتعمل ايه عشان ما يتعملش عليك مصلحة
ثانياُ : انا مش بدي للناس نصائح مباشرة ولا بتكلم على توكيل او معرض بعينه انا بتكلم في العموم المطلق وعن خبايا المجال ده وانت يبقى في ايدك الاختيار
ثالثا: بعتذر عن الرد عن اي استفسار يخص اي شركة او تاجر او موديل سيارة .... شوف الكلام الى كتبته ومنه اعرف انت المفروض تعمل ايه وربنا يوفقكم ويرزقكم بعربيات ممتازة وما يتنصبش عليكم في الشرا
رابعاً : الى بيتنصب عليه دايماً بيبقى متقمص دور الباشا الواثق من نفسه ومن البائع الى ادامه استلم عربيتك صح وادفع صح وركز في الخطوات الى بتعملها وما تبقاش مهمل في حقك وبس
موضوع جميل جدا ومن اهم المواضيع
بس للاسف اللي انت بتحكي عليه دا بيحصل ف كل مجالات الشغل وف الحياه عامه ف مصر لانعدام الضمير
الزبون اللي بيتنصب عليه بيكون هوا نفسه بيسرق من شغله او فاتح تجاره و بيغش فيها او واخد قرض بالربا
اللي متاكد منه اللي فلوسه حلال ربنا بيباركله فيها
حصل لى حاجه مشابهه لكدة فى المصريه للسيارات
بعد متفقت معاه على السعر
اخد البطاقه يصورها لتكمله الاوراق
وبعد 5 دقائق خرج الموظف يقول . يا بشمهندس لسه جاى فاكس حالا والعربيه ذادت 2500 جنيه . طبعا بعد مشاف المسمى الوظيفى فى البطاقه ..
قلت له لا مش عايزها .
المهم بعدها بساعه اتصلت بيه وقلت له انا فى معرض تانى وقدامى نفس العربيه واقل الف جنيه من السعر الاساسى اللى انت قلت عليه فى الاول . احجزها ولا هتدينى اللى عندك .
قال لى تعالى يا باشا وانا هكلم لك مدير المبيعات
وفعلا اخدها اقل الف جنيه عن السعر الاساسى
الله يبارك لك بجد على الموضوع ده ومستنى بقيه الموضوع وان شاء الله النوريبقى موجود عشان الموضوع مهم للغايه تحياتى
انا مستلم اوكتافيا ٢٠١٥ مخبوطه من تحت الاكصدام الى قدام بسبب طلعت التريلا ونزولها بس اخدتها طبعا لاتى شايفها قدامى وهى بتتحك وهي نازله وطبعا انا مبسوط انى استلمت العربيه فى نفس اليوم الى طلعت فى من الجمارك يعنى انا اول واحد افتح بابها لا وقفت فى معرض ولا حد قعد يفتح ويقفل فيها ولا تتنقل من مكان لمكان ودا بسبب المخاوف الى عنندى من الى بيحصل فى العربيات الى حضرتك حكتها
ربنا يرزقك بالحﻻل
كل نواحي الحياه فيها اشتغاﻻت
اي بياع همه العموله في اي مكان
ربنا يبارك لصاحب الموضوع ويجعله في ميزان حسناته.
واضح من التعليقات كلها ان معظم الناس خايفه من معظم الناس وعندهم حق
وواضح كمان ان كل الناس متأكده ان مفيش ضمير عند معظم الناس وبرضو عندهم حق
من هما الناس ؟؟!! للاسف احنا
احنا اللي بنعمل في نفسنا كده :(
نكمل حاجة تانية المفروض انها بتبقى واضحة بس برضه الناس بتقع فيها
ناس كتير بتدخل تتفرج على عربية وتعجبها ويقرر يشتري
طيب انا عاوز اخلص من عربيتي الاول ... هنا طبعاً البائع النصاب ((الا من رحم ربي )) هيتبرع ويقوله يافندم احنا عندنا ادارة للمستعمل استني اكلملك المسئول الى بيبقى في الحقيقة تاجر سيارات مستعمل مظبط مع البائع بالعمولة برضه وطبعاً حساب عربيتك الى هتبيعها هيبقى اقل من السعر المتعارف عليه في السوق بقيمة مكسب التاجر + عمولة البائع طيب ليه ؟؟؟
ليه تخلي حد يبيعلك عربيتك لتاجر
بيعها بنفسك ولو مستعجل روح للتاجر مباشرة على الاقل هيبقى قللت العمولة الى هتتعمل عليك
راعي ان بيبقى في ناس ما تعرفش حاجة ابداً عن العربيات غير السواقة ومش مهتمة بتفاصيل البيع والشراء وبيبقوا فعلاً اجمل ضحية للنصب في المعارض والتوكيلات
مصمم وعاوز تبيع عن طريق المعرض او التوكيل يبقى روح لمكان فعلاً عنده ادارة مستعمل وهتتعامل معاهم رسمي
حاجة كمان ناس كتير بتلجاً للنمر التجارية وديه برضه بيطلع فيها مصالح والعداد بيحسب باليوم وبرضه الحساب شيء وهو هيحاسبك بشيء تاني ... هتستلم العربية اعرف ان هتاخد اقرار استلام هتمشي بيه عادي جداً لغاية الترخيص تقريباً معاك 48 ساعة او 72 ساعة .... ما فيش داعي انك تلجأ للنمر التجارية الا في الضرورة القصوى واستعوض ربنا في المصلحة الى هتتعمل عليك
الكلام ده كله بيحصل فعلا
والدي كان شغال في السعودية في معرض اسمه الجميح و ده توكيل لجينرال موتورز بس ماكانش من البياعين و حكالي علي حاجات زي دي و المصيبة كمان إن ده توكيل يعني قطع غيار اصلية و نضيفة و مضمونة لأ بيشتروا قطع غيار عادية من اللي هي بتتباع في محلات قطع غيار عادية و ساعات قطع غيار مضروبة.النصب شغال زي الفل.
متابع
لأنى شوفت بعينى حاجات من دى كتير
بارك الله فيك وجعله فى ميزان حسناتك
متابع
وربنا يكرمك علي النصايح الجامده دي
بارك الله فيك وحفظك منهم ومن أمثالهم وأعانك عليهم
ربنا يجعل الناصيح والمعلومات دي في ميزان حسناتك لانك بجد افدتنا
متابع
يا نهار ابيض يعني الواحد يخاف من الزيرو اكتر من المستعمل
جزاك الله خيرا علي هذا الموضوع الرائع
ربنا يكرمك و يجازيك خير
اهم حاجة تفضل زى مانت فى شغلك و ماتضغفش
اننت ربنا معاك و تاكد ان حقك هتاخده فى يوم من الايام علشان ربنا مابيسبش حد
السرقة مش شطارة...... اسهل حاجة السرقة
لكن الصعب انك تنجح منغير ماتخالف ضميرك
ربنا معاك و يوفقك فى حياتك
انتم مسنغربين ليه يا جماعه
كل ما الوساخه تزيد فى البلد كل ما مجالات الحياه بتخرب
احنا عايشين فى وساخه توقع تلاقى اى حاجه
متابع
بجد بجد الله ينور عليك و يرزقك من حلال
و يجعل الوعي اللي بتنشره ده في ميزان حسناتك يا رب
الحمد لله
انهارده اول مرة اشوف عميل بعد الموضوع ده بيسأل عن الفلوس الى دفعها وبيطلب الفاتورة وانها تكون بنفس قيمة المبالغ المدفوعة وفعلاً لقى ان الملبغ المدفوع اكتر من مبلغ الفاتورة الرسمية للعربية واعترض على كده :) ... عقبال كل الناس ما تفوق وتعرف تبص وتطلب حقها ... واضح انه من الناس الى ممكن تكون شافت الموضوع هنا لانه سأل متأخر عى الكلام ده ...واضح انه ما كانش في دماغه وبعدين فاق متأخر
المهم ياجماعة برضه نسيت اقولكم على حاجة حلوة الناس الى بتاخد قرارها بناء على الصفحات الرسمية على الفيس بوك احب اقوله ان الصفحة بتبقى معظم التعليقات الايجابية فيها من عاملين بالتوكيل وخصوصاً قسم التسويق والمبيعات وعائلاتهم ... تقريباً ياجماعة 90%من التعليقات الايجابية بتبقى منهم ومن معارفهم ... طيب انا عرفت منين لاني عارف الموظفين كلهم وعارف اسمائهم وبعضهم اسم العائلة مميز فالاقي ان اخوه ومعارفه كاتبين حاجات ايجابية وبيشكروا في العربيات وجودتها بيجاملوه :) .
اكتر حاجة كانت بالنسبالي مضحكة مسئولي التسويق وهما بيسألوا نفسهم من الاكونت الخاص الى مش مذكور فيه وظيفته وبيرد على نفسه من الصفحة :) ... منتهى الغش والقرف
حاجة برده مهمة بالمرة عشان وانت بتستلم عربيتك
بعض التوكيلات تحديداً بتبقى العربية فيها بعض الملاحظات البسيطة واضحة للمشتري ... فطبعاً البائع النصاب ((الا من رحم ربي )) بيقنعه ان يستلم العربية بحالتها وانه هيثبتله الكلام ده في اقرار الاستلام وهيعمله مجاناً في اول صيانة
طبعاً الكلام ده ساعات بيحصل والتوكيل بيعمل الملاحظات ديه في الصيانة بس ساعات بيرفض خصوصاً انه ما فيش ما يجبره على الاصلاح وكمان انت استلمت العربية بملاحظات يبقى موافق على كده وكمان ما فيش تعهد بالاصلاح خصوصاً لو الاصلاح مش هيتلم ببساطة
التوكيل مقابل انه يحافظ على سمعته بيعلم الحاجات البسيطة مثلا ( اعوجاج بسيط جداً مجرد يترد على البارد ، جزء محتاج يتظبط ببولش وهكذا ) لكنه مش هيفتح مقايسة كبيرة عشان ملاحظاتك وتبقى سعادتك لبست العربية بالملاحظات
- الحل : بقى انك لو عاجباك العربية ... لو الملاحظات بسيطة يطلعلك خطاب رسمي بانها هتتعالج في الصيانة مجاناً
او انك مش شايفها مشكلة يبقى تنزل من سعر العربية مقابل الملاحظات ديه ((لاحظ اني بتكلم على مجرد ملاحظات خفيفة بتبان بالتدقيق )) وبعض الناس اساساً مش بتاخد بالها منها
يا اما تطلب عربية تانية بدون مشاكل
متابع ..
الف شكر وربنا يكرمك
متابع
ربنا يديك علي قد نيتك . انت اللي شبهك مبقوش كتير .. ومنتظرين منك كل جديد ﻻن احنا بيضحك علينا فعلاً .
طول عمري بحب الحاجه المستعمله عن الجديده
جزاك الله خيرا
متابع
لو احنا فى بلد من الدول المحترمة مينفعش انك تلاقى كده فى جهاز حماية مستهلك له صلاحيات كبيرة و بيدور فعلا عن الحاجات دى لوحده و ممكن توصل انه يقفل الشركة كلها لو احتاج لكده وزى ما شفنا فى امريكا ازاى بيحصل استدعاء للعربيات اللى فيها عيوب صناعة مهما كان العيب تافه وده بيكلف الشركة ملايين واكيد طبعا الشركة مش بتعمل كده من نفسها . الدولة بتلزمها بكده لانه لو ثبت وجود عيب معين و ثبت معرفة الشركة بالعطل ولم تتحرك الشركة فى خلال 20 يوم يتم محاسبتها قانونيا
فيه ناس كتير مش متصورة ليه كل ده ..او ايه ياعم الحوارات ديه كلها مش معقولة فيه كده
الموضوع ببساطه ان المعارض والتوكيلات ديه بتربي حراميه ونصابين على فكرة فيه توكيل مشهور جداً ان كل الى اشتغلوا فيه نصابين رسمي وموظفيه بيتوزعوا على باقي التوكيلات بعد كده ((معظمهم بيمشي بسرقات )) وهما حاملين شعار النصب والغش وشايفين ان السرقة رسالة ...وللاسف المعارض والشركات فاكرة انها لما تجيب واحد صايع ونصاب وتشغله في المبيعات انه بكده هيساعدها على البيع وهيلبس الزبون ومش عارفه انها بتربي تعابين اول حد هتقرصه هو انت
المعرض او التوكيل بيبقى عارف الناس الى شغاله عنده كويس بل على العكس بيشجع الناس ((المفتحة )) من وجه نظره انها تبيع وتنصب باسم المعرض او التوكيل وهو كل الى بيعمله انه بيربي نصاب وحرامي بيسرق باسمه
بس الى الناس ديه نسيته ان النصاب ده هيسرقه وبيسرقه فعلاً في فواتير مضروبة بيقدمها للشركة مقابل حاجات اشتراها وبينصب على شركته ليل نهار ولان الشركة او المعرض نفسهم نصابين فمش بيعملوا حاجة معاه حتى لو اكتشفوا سرقته ونصبه عليهم واصبح النصب ليل نهار من كله ((الا من رحم ربي ))
افتكر اني اول ما جيت الشغل ولقيت القرف ده كله كنت في حيرة كبيرة بين اني اعترض واني اسكت واخترت الاختيار الاول وعملت مذكرة بالكلام ده واستأذنت مدير من الكبار وبعتله الكلام ده تفتكروا ايه الى حصل ..الراجل طبعاً كانت علاقتي بيه كويسة وبيقعد معايا احياناً ويتكلم بود ... يكفي اني اقول انه بيسلم عليا دلوفتى وبيهرب من امامي ولما زنقته مرة قالى ان مقترحاتي جيدة ومحتاجين نتناقش فيها وبقالى سنة مستني النقاش ...مش عاوز اقول اني تقريباً اتأذيت من الكلام ده بس اهه عملت الى عليا والحمد لله
رسالة للناس الى بتشغل نصابين بجد النوعية ديه من الناس قذرة وعمرها ما بتبني كل الى بتعرف تعمله هو السرقة والفساد ومع الوقت بيدمروا سمعة المعرض او التوكيل
قناعه بتترسخ في وجداني
المصري عدو المصري
احنا شعب نستحق بعض
Sent from my SM-N900 using Forum Runner
اولا انا حابب اقولك جزاك الله خيرا على الموضوع المفيد لان ناس كتير بتبقى كل همها تركب الزيرو ومش بتركز مع تفاصيل كتير تبينلك قد ايه وسط السيارات ده مليان نصب
ثانيا احب اؤكد على كلامك لانى كنت شغال فترة مهندس صيانة فى احد التوكيلات الشهيرة فى مصر والحمد لله ان الفترة كانت صغيرة مش كبيرة نظرا للمهازل اللى كنت بشوفها هناك ( مع العلم انى كنت شغال فى التوكيل ده فى 2009 بس الوساخة موجودة لغاية دلوقتى وهاتفضل موجودة طول ماحنا بنغلب مصلحتنا الشخصية على الحق ) .... طبعا المواقف كتير والواحد مش عارف يحكى ايه ولا ايه
- يعنى مثلا كان فيه عربية جاية فى حادثة وقاعدة بقالها شهر عشان مشاكل مع التامين وكده ... العربية دى كانو مسمينها فى التوكيل ( المخزن الورانى ) لما يكون فى عربية عاوزة قطعة غيار ناقصة من المخزن بياخدو القطعة دى من العربية اللى عامله حادثة ويركبوها فى العربية التانية بدل ما يقولو للعميل ان قطعة الغيار ناقصة .... والعميل طبعا مش هايعرف اذا كانت القطعة دى جديدة ولا مستعملة ... طالما العربية شغالة يبقى تمام وخصوصا ان التوكيل ده كبير والعربيات فيه غالية جدا ... يعنى مش معقول واحد هايجيب عربية معدية 200 الف وهايقعد يبص فى تفاصيل صغيرة زى قطعة غيار جديدة ولا مستعملة وفين الكرتونة بتاعتها والكلام ده ... والتوكيلات للاسف بيلعبو على النقطة دى
- مثلا عربية فيها عيب ومش عارفين العيب منين بالظبط ومش باين على الجهاز عيب محدد ... بتبدأ بقى فكرة المحاولة والخطأ :
" دى شكلها موبينة ... روح يا فلان هاتلى من المخزن موبينة نجرب بيها ... ركب يا فلان الموبينة ... لا مش هى المشكلة ... طب هات لى طقم حساسات نجرب ... لا مش هى ... هات طقم بوجيهات من اللى فكيناهم من العربية الفلانية وكان لسه فى الروح .... لسه برضو المشكلة ماتحلتش ... طب خلى الكهربائى يراجع كده على الويرينج بتاعة العربية ... اه شفت بقى ... فى سلكتين ملمسين ... رجع بقى كل الكلام ده المخزن وظبطته كويس فى علبته قبل ما ترجعه وهات ضفيرة كهرباء وركبها" ... و كع بقى يا عميل 3 او 4 الاف جنيه وقطع الغيار التانية برضة هاتتباع على انها جديدة عادى
-عريبة اتخبطت قدامى من الرفرف الامامى بسبب زحمة العربيات جوه راحت قسم السمكرة واترشت واتظبطت ولا كان فيه حاجة
- خدو بقى الكبيرة ... مدير الورشة ومعه لفيف من 2 مهندسين يستنضفو اى عربية من اللى بايتة خميس وجمعه ويروحو بيها اسكندرية ... يقضو الليلة ويستمتعو بالهواء النضيف على البحر ويرجعو يحطو الفيشة اللى شالوها عشان العربية ماتعدش كيلوهات ... ولا اى اندهاش
طبعا اللى حكيتو ده مايطلعش نقطة فى بحر التوكيل ده وغيره من التوكيلات ... نصب وسرقة واشتغفال للناس واستغلال الاسم الكبير بتاع التوكيل واستغلال غلو تمن العربيات واللى بيخلى اللى شغالين فى التوكيل معندهمش غير كلمة واحدة ... " يا عم واحد شارى عربية بربع مليون جنيه ... فارقة معاه اوى يعنى 5 او 6 الاف جنيه يدفعهم فى الصيانة "
يلا هما هايروحو من ربنا فين .... الحمد لله الواحد طلع من المستنقع ده وسبت مجال السيارات كله ...
انا عاوز اشترى عربيه نيسان صنى او rb وبعد الكلام دا مش عارف اشتريها منين
مصدقا لكلام الاخ الكريم، أنا كنت عند بوهيجي محترف مرمات بوية في الحرفيين، ولقيت عند كذا عربية زيرو بترش مرمات خرابيش وحكات كده. فباقوله ايه ده، قالي ماليش دعوة، واحد بيحي يقولي اعملي المرمة دي. انا اعملها له تمام، هو بقى ياخدها يبيعها يقول للزبون، ميقولوش، ماليش فيه. كذا عربية شوفتها أقلهم لانسر شارك!
الكلام دا حقيقى ولا بجد☺
عموما: ربنا يسترك والله معلومات أول مره أعرفها
على نفس وزن شركات التأمين بتيجي البنوك والتقسيط مع البنوك
البنك برضه عامل تكويد للمعارض والتوكيلات وعامل معاهم اتفاقيات الغرض الاساسي مش خدمة العميل ((الزبون )) الغرض انهم يجيبوا العميل ويظبطوه
اغلب البنوك في مجال السيارات عامله انظمة بتطلع عمولة محترمة للبائع والتوكيل او المعرض
ياعنى حضرتك تروح للمعرض او التوكيل وتختار العربية وتقرر تشتري ..... وهنا هتسأل ايه هي البنوك الى بتتعاملوا معاها وايه احسنهم وقيمة الفائدة اد ايه ؟؟؟ تفتكر البائع هيرد عليك ويقولك ايه ؟؟
هيشوف المصلحة فين ومش هيدلك على افضل عرض وافضل فايدة .... كل الى يهمه انه يطلع بالعمولة
هيقنعك طبعاً بالبنك ويقنعك ان ده لينا فيه ناس وهنخلصلك شغلك بسرعة وسهولة و24 وتكون الاجراءات خلصت وشوية كلام فارغ وتلاعب بالارقام ... وغالباً العميل ((الزبون )) مش بياخد باله من الفائدة الحقيقة او الفروقات في المصاريف الادارية واشتراطات البنك وبيتعامل مع البنك ويروح يمضي ويطلع الشيك بتاع العربية ومعاه شيك البائع والمعرض او بيتحط في حسابهم مباشرة ... وبالهنا والشفا اخدت اعلى فايدة في السوق
الموضوع في بعض الاحيان بيبقى مجزي في التأمين والبنك اكتر من مكسب العربية نفسه تصور ان بعض المعارض الى بتشتغل جامد ممكن تضحي بهامش ربح العربية في مقابل سبوبة التأمين والبنك :) .
ربنا ولك الحمد والشكر
الموضوع انتشر على الفيس بوك وناس اعرفها عملت شير للموضوع وبعضهم اخد كلام من وسط الموضوع كوبي وبيست وعمله شير وشوفته اكتر من مرة على التايم لاين .... طبعاً لولا اني فعلاً ما ينفعش اقول اني صاحب الموضوع كان زماني فرحان وانا بقول ليهم اني صاحب الموضوع ده
يارب الناس كلها تستفاد وتفيد الى يعرفوهم وكل حد في في مجاله غش وعنده ضمير يكتب للناس ويوعيها وده اقل حاجة ممكن تعملها
جزاك الله خير ... موضوع مفيد جدا
ولا اى اندهاش
المصريين مسجلين نصب واحتيال وخيانة امانة. الا من رحم ربى. ربنا يعفو عنا ويثبتنا على الحق وينجنا من شرور خلقه.
ربنا يباركلك وموضوع ممتاز .... وعلى فكرة فعلا ده بيحصل مع الاسف في كل المجالات في مصر مش بس السيارات عشان ما فيش رقابه على السوق من اول الجمارك الى نهاية مطاف السلعه ... وده عن تجربة كبيره في عالك الالكترونيات و الكمبيوتر و اللي مليان بلاوي اكتر من كده بكتير .. وحسبي الله في كل واحد مش بيراعي ضميره و بيلبس الللي قدامه