قرعة كأس العالم .. !!

**MoToRiZeR** · 23-10-2008 04:45 PM

غريبة محدش إتكلم علي قرعة تصفيات كأس العالم :d دحنا لو كنا عملناها بنفسنا مكناش هنعملها كدة :d

مجموعة مصر : مصر - الجزائر - زامبيا - رواندا

هدية علي طبق من فضة للمنتخب .. يا رب المرة دي

علي الصعيد الأخر المغرب لبست في الكاميرون و تونس لبست في نيجيريا
تونس ممكن تعملها بس المغرب في ورطة لأن الكاميرون مش سهلة

و يا مسهل و هيلا هيلا يالا يا عفروتو

**waled369** · 23-10-2008 04:53 PM

و الله كنت ناوي اكتب عنها من امبارح بس كنت مشغول شوية
عموما شكرا لك
و ربنا ينفخ في صورة المنتخب بقى . بقى لنا 18 سنة بعيد و آهي ماشية حلاوة مع ( المعلم ) يبقى انجاز تاريخي مرتين بطولة افريقيا و ندخل كأس العالم للمرة التالتة معقول ( دي تبقى أحسن من عيد العمال )
ربنا يتمها على خير

**Ramy_Ali** · 23-10-2008 05:01 PM

طب لو اخدنا كاس العالم
مصر هتستفيد ايه ؟
انا شخصيا هستفيد ايه ؟
هل استفيد 1/100 من الملايين اللى الاعيبة والجهاز الفنى هتاخدها مثلا ؟
هل دمى مش هيتحرق لما اقابل اضعف دولة فى كاس العالم وتخرجنى بمنتهى السهولة ويسر؟
ولو جبنا جون وحيد من ضربة جزاء مش هنعيدة 100000 مرة مع اغنية المصريين هما ؟
وبردة دمى هيتحرق

---دا رأى شخصى --

hh · 23-10-2008 05:13 PM

انت يا استاذ رامي فكرتني بفيلم "ليلة سقوط بغداد"
حسن حسني ادى لأحمد عيد شريط فيديو و قاله "لو حسيت باحباط اتفرج على الشريط ده فيه اهم انجازاتنا في العشرين سنة اللي فاتت"

الشريط طلع عليه الجون بتاع ضربة الجزاء بتاعت كاس العالم دي:)

**Ramy_Ali** · 23-10-2008 05:19 PM

الفيلم دا انا بحبة جدا جدا
وبحب اشوفة كل فترة فعلا جميل ومضحك قوى
وبيناقش موضوع مهم جدا وهى الغيبوبة اللى مصر بتعيشها فى ظل الكوارث المحيطة بينا

**shanodaa** · 23-10-2008 09:24 PM

ان شاء الله نتاهل وندخل كاس العالم
الحلم المصري

**TaoTao** · 24-10-2008 08:50 PM

دي أحسن قرعة ممكن نقع فيها وحظنا حلو والحمد لله .. شوية شغل بقى عشان نتأهل.
أنا لما سمعت إن آخر ماتش في التصفيات مع الجزائر استبشرت خير وجه في دماغي جول حسام حسن في الجزائر سنة 90 اللي اتأهلنا بيه لكاس العالم (يا رب المرة دي).. وكنا بنغني "حسام حسن يا رايق .. الجول في اربع دقايق" .
بالنسبة لما سيعود علي في حالة التأهل لكاس العالم .. هافرح، وده سبب كفاية إن 30 لاعب وإداري ياخدوا الملايين اللي أكيد يستاهلوها (في حالة تأهلنا لكاس العالم).

**MoToRiZeR** · 25-10-2008 01:47 AM

إنهاردة أثناء الدردشة مع أحد الأشخاص سمعت وجهة نظر خزعبلية شوية إنما تستحق الطرح

قالك إيه .. الموضوع كله سياسة ! الحكام أما لقوا الشعب بيكح تراب و ظروفه زفت .. إيه اللي ينسيه ؟ الكورة ! و إن كنت ناسي .. أفكرك بأفريقيا 2006 و 2008 اما كانت العيشة و كل حاجة في عز أزمتها و الناس طلعت ترقص في الشوارع شايلة العلم! فا تم تدخل سياسي عشان قرعة مصر تطلع سهلة و نوصل كأس العالم فا الشعب يتلهي في حاجة

**TaoTao** · 25-10-2008 02:06 AM

لو الحكومة تقدر تأثر في قرار زي ده، تبقى حكومة مالهاش حل !
الحكومة اللي خدت صفر المونديال وشايلة قفة اصفار في بكين أثرت في سيب بلاتر اللي هو أقوى من أي رئيس جمهورية؟! يمكن !