السلام عليكم السادة الافاضل والمحترمين اعضاء هذا المنتدى الرائع
حكايتي النهاردة كانت مع مركز fit & fix توكيل بريدجستون ..
عربيتي اوبترا 2008 66 الف كيلو
اول ما جبتها كانت ثباتها واتزانها وهدوءها زي الفل ..
كانت مسافر الصعيد قولت زيادة امان اظبط زوايا واتزان .. وبالفعل روحت بنزينة كالتكس اللى في اخر جسر السويس اما بنزينة وطنية بعد حديقة بدر ..
ظبطوا زوايا وربطوا عفشة وكل تمام

طلعت بالعربية حسيتها احسن اكتر بس مكنش فيه مكان او طريق للتجربة العربية بشكل اسرع .. المهم بعدها بيوم جت فرصة انى امشي على طريق سريع ولقيت بعد ظبط الزوايا والاتزان ان العربية بتيجي عند سرعة 70 وتبدا تعمل رجرجة تحت رجلي وانا سايق .. استغربت وقولت اكيد مظبطوش الزوايا صح او فيه مشكلة لان العربية قبل ما اظبط زوايا مكنش فيها مشكلة خالص .. ولا رجة ولا غربلة ..
المهم رجعتلهم في البنزينة بعدها بيومين وقولتلهم على المشكلة .. قالولى تقرير الكمبيوتر بيقول ان مقاسات وظبط العربية هو مقاسات العربية وهى طالعة من المصنع وكل حاجة عندك تمام !!

طيب ازاى يا جدعان ؟؟ العربية مكنتش كدة .. ؟؟ قالولى هات حاجة اسمها رينجات وركبها لان العجل مش محتاج ظبط زوايا تانى او ترصيص .. (الجنط بتاعى سبور نوعه RCK اعتقد تايوانى لانى مشتري بيه العربية).. والكاوتش جديد كله ماركة كوموهو سولس

قولت مش مشكلة واديلي فترة متعايش مع الرجة لانها بتختفي او ما اوصل للـ 80 وطبعا هى بتبدأ في 70 ..

لغاية لما روحت فرع FIT&FIX في المنيل وعينك ما تشوف الا النور ..

طلع معايا فنى شكله لا يفقه شيئ في اى شيئ .. جربنا العربية .. وقالى انت مش محتاج ترصص او تظبط زوايا ..

قولتله ازاى يا عم .. لما المشكلة ظهرت بعد بعد ما ظبط زوايا في كالتكس .. ومكنتش موجودة ..

قالى لما نرجع الفرع انزلك تحتها ابصلك عليها ..
نزل تحتها طلع وقالى دى احتمال تكون طنابير او كوبلن او مقص او قاعدة ماتور او مقص !!!!!!!!!!!!

انت هتجننى يا عم ..
ما تحدد حاجة معينة جننتني

قالى مفيش حاجة محتاجة ترصيص عندك .. رغم انى شايف بعيني وانا راجل مش خبير في احدى العجلات الامامية مكان ترصيص كان ملزوق وواقع لانه جنط اسبور ..

المهم خلص معايا وهو مستعجل وطلع يجري على كيس بلح كان زمايله جايبينه وغسلينه في نفس الكيس وقالى روح لمصيرك لف وشوف مشكلتك


ممكن اعرف ايه اللى بيحصل في العربية عندي
والراجل ده فاهم وصنايعي ولا كان مستعجل على البلح وخايف لا ميلحقش نصيبه فحلق لي.