الموضوع: القواعد الذهبية للذهاب الى شرم

المشاركة الأصلية كتبت بواسطة ahmed12345678

أن لسه جاى من فندق هيلتون لونج بيتش الغردقة
وملاحظاتى
1- كان فى مصريين وكان كلهم أسر وكان بتصرفوا بطريقة محترمة جدااااا ولا شوفت حد بيرمى حاجة على الشاطئ ولا على حمامات السباخة ولا حتى حد بياكل ، وشفت قله ادب من الروس احيانا فى التعامل مع العاملين فى الفندق

2- كان فى سياح روس كتير وفعلا كمية العرى كانت غير طبيعية وفعلا مش هتعرف تغض بصرك لأنهم فى كل حته حواليك لكن مشفتش حد بيعمل علاقات فى الهواء الطلق واقصى حاجة شوفتها البوس وكانت مرة واحده فقط

3- الروس والمصريين كل منهم كان فى حاله ومالوش دعوه بالتانى لدرجة ان لوحدنا كده وبدون اتفاق حمام السباحة اتقسم نصين نص للمصريين ونص للروس

4- مشفتش اى معاكسات حصلت ويمكن ده راجع الى ان كل المصريين كان أسر ومفيش شبابا لوحده

5- الفندق كان فيه خمور ولكن العاملين على البار كانوا بيعطوا كميات محدودة منها علشان محدش يسكر ويعمل مشاكل ومشفتش مصريين بيشربوا غير نسبه قليلة جدا وكانوا بيشربوا بيرة او نبيذ

كلام موزون جدا بدون تحيز, و فعلا فيه نسبه قليله من المصريين بتكون على درجة وعى و على درجة كبيرة من السلوك المحترم و المنظم و دول اللى بيقضوا اجازة سعيدة فعلا ...بس دول قليلين قوى قوى..دول بقى لما بيحجزوا بيبقوا عارفين بيعملوا ايه. بمعنى انه بيختار فندق محترم ليه اسم و سعر ( هيلتون-ماريوت-شيراتون...) و بيبقى عارف ان الفندق بسبب سعره مش هايكون فيه المناظر المنتقدة و المستفزة من الغوغائيين .
و النوعيه ديه من السائح المصرى مرحب بيها جدا و بتيجى فى السنه مرتين لنفس الفندق و بتاخد مميزات اضافيه كنزيل متكرر و العماله فى الفنادق بترحب بيهم و بتفضلهم عن أى سائح.

"العاملين بالفنادق" تشتكي سلوك المصريين في شرم الشيخ
اللينك ده ممكن يوصل وجهة النظر أكتر

المشاركة الأصلية كتبت بواسطة aif

بص يا استاذ مهاب
انا بردو من الناس اللي بتنتقد تصرفات بعض المصريين والعرب في الاماكن دي
وده طبيعي جدا ....
لكن ان الموضوع يوصل لفصل علي اساس الجنسية .... هنا يبقي الامر دخل منحني تاني خالص
فيه حلول تانية
مثلا ان امن الفندق يمنع اي تصرف غير لائق سواء من مصري او عربي او اجنبي
او يغلو سعر الفندق علشان النزلاء يبقو اقل
...
انا اعتراضي الوحيد اننا نطالب بعمل مكان لجنسية دون الاخري
تفرق اني ما أروحش المكان ده عشان ضد عاداتي وتقاليدي وبين انه يتم منعي من دخولها قسرا
ارجو اني اكون قدرت اوصل اللي عاوز اقوله
وتقبل خالص تحياتي

يا باشا محدش يقدر يمنعك قسرا من دخول أى مكان أنت تنور و تشرف أى حته, يمكن أنا فى حالة ألأحباط اللى حاسس بيها من جهة الموضوع ده كتبت بشكل انفعالى و موصلتش الفكرة صح...أنا بفكر فى منتجعات تكون مفيهاش كحوليات و تكون بأسعار و امكانيات و اصطاف يقدر يتعامل مع مجموعات المصريين و يهندل مشاكلهم و يبقى عارف انه شغله كله هايكون مع نزلاء مصريين فهيكون ده أفضل ليه و للنزيل و فى نفس الوقت مش هايكون فيه تعارض بين سلوكيات النزلاء لأن كلهم هيقدروا يتعاملوا مع بعض . و من ناحيه تانيه الفنادق التانيه متمنعش حد بس اللى هايروح يبقى عارف ان فيه ناس بتلبس مايوهات و فيه كحوليات و فيه نظام ماينفعش يخالفه فى البوفيه و فى ازعاج غيرة و خلافه من السلوكيات المرفوضه.
انا اللى بيحزننى جدا لما حد أجنبى بيسردلى لسته انتقادات و أنا ببقى فى نص هدومى و فى نفس الوقت ماقدرش أقوله انتوا عندكوا كده برضوا لأن هما ماعندهمش كده و هنا اللى بيتصرف منهم تصرفات خارجة بتكون نسبته قليلة جدا جدا...بمعن أن السياح النسبة الغالبة منهم ملتزمة و جزء بسيط جدا بيكون مثير للمشاكل و ده بنعرف نتعامل معاه و بيتشد و و بيتزعق فيه و بينطرد من الفندق بدون مبالغة. و العكس بالعكس بالنسبة للمصريين..أن النسبة الغالبة بتكون فوضوية جدا و جزء بسيط جدا ملتزم. و الفوضويين الفنادق جربت معاهم كل الطرق من عمل لافتات و من توجيه بطريقه لطيفه ألخ..بس للأسف بتلاقى زعيق و صريخ و انا هاعمل و اسوى و أنا دافع فلوس( و الله لسه من أسبوعين بتعشى فى فندق وتابعت نزيلة مصريه أخدت التورتة كلها من على البوفيه و حطيتها على ترابيزة قاعد عليه 6 أفراد و مدير المطعم انتظر لما خلصوا خالص و خدوا بعضهم و قايمين و خد الراجل على جنب بعيد عن الناس و أنا شايف اتسامة مدير المطعم على وشه علشان ما يحرجش النزيل و لفت نظره أن التورتايه هاتترمى بالشكل ده لأن مستحيل تتحط على البوفيه تانى(ماكلوش أكتر من جزء بسيط منها و طبعا بهدلوها من كل ناحيه) فما كان من النزيل المصرى الا انه عمل فضيحة فى المطعم لمدير المطعم....ده موقف من مواقف كتير جدا بيصعب عليا فيها عمالة الفنادق. و الله العظيم شوفت عائلة مصريه كامله رايحين الغرفة و معاهم حامل حقائب واحد و شادد وراه 3شنط كبيرة و بيعافر مع الشنط و تيجى النزيله تقول لأبنها اللى زى الحيطه أنت شايل الشنطه ديه ليه(شنطه هاند باج خفيفة) و تقول لأبنها بمنتهى الجحود اديهاله ماهوا ده شغله...هيا كده بتعلم ابنها الجحود و القسوة فى التعامل مع الناس...
طيب علشان أختم كلامى...النزيل المصرى المحترم بيتقال عليه من ساعة لما بيسكن قدام الرسيبشن" الناس ديه كويسة لازم يتظبطوا" زى ما يكون الأصطاف لقى حاجة نادرة و بيبلغوا بعض..خلى بالك مع غرفة كذا الناس ديه محترمة(مش ماديا بس معنويا أن النزيل مايتعاملش معاهم وحش ).
أنا مش بشتغل فى فندق بس كل يوم بخش فنادق كتير و عايش الواقع ده و بسمع للمديرين فى الفنادق لما بيتكلموا بمرارة عن السياحة الداخليه و ازاى انهم بيشيلوا الهم طول الصيف وفى ألأعياد.
و تحياتى الطيبة لشخص حضرتك الكريم و اوعى تزعل منى ان كنت فى مشاراكات سابقة أسأت اختيار بعض مفرداتى فى عرض وجهة نظرى.