صوت تكه خفيفه مجننى

**mirra** · 11-09-2014 12:53 AM

مساء الفل على احلى جروب..انا معايا لادا 2107 موديل 2007 روسى انجكشن..انا محافظ على العربيه جدا جدا جدا بمعنى انى بعملها كل الصيانات قبل ميعادها و بمون 92 و بربط عفشه مع كل غيار زيت من 2700 الى 3000 كم. بقالى كام يوم بسمع كده صوت تكه غريبه فى الجنب اليمين من قدام مع المشى و موش عارف ده جاى منين..الصوت بحس اكنه من جوه العربيه مش من العفشه...لما العفشجى ركب معايا ما سمعشى الصوت و قالى ابقى غير المناول بمناول على رولمان بلى...انا مش مقتنع بالكلام ده و فى نفس الوقت مش عارف احدد الصوت ده مصدره ايه..ياترى ده البيض؟؟؟ و لا ممكن يكون ترييحه من الباب..انا قفلت ازاز العربيه كله و مشيت و مع ذلك سمعت الصوت من جوه العربيه مش من بره...افيدونا يا خبراء الجروب.

**ahmscu** · 11-09-2014 01:08 PM

ياريت حضرتك تحدد الصوت بتسمعه امتى بالضبط ( مع المطبات او االغيارات او الملف)

**mirra** · 11-09-2014 03:33 PM

المشكله ان الصوت ده خفيف قوى و مش مرتبط بأى حاجه من اللى سعادتك قلتهم انا بسمعه و انا ماشى بالعربيه و لما بغير من سرعه لسرعه و بشد بالعربيه و عشان كده انا بقول يمكن يكون من الباب.

**yoyo_esna2** · 11-09-2014 03:59 PM

متشغلش بالك باى صوت تسمعو من اللادا هية الادا كدة مسلية علشان متصرفش الى وراك والى قدامك نصيحة

**mirra** · 11-09-2014 06:59 PM

و الله كلامك ده زى الفل و فعلا ده اللى انا ناوى اعمله.

**abokoko** · 11-09-2014 07:29 PM

بالنسبة لتغيير المناول
مش هتخسر حاجه
لانه مش غالى وتركيبه مش هياخد وقت
ونتيجنه احسن للدركسيون هيخف التقل شوية بسيطه
والاهم انه هيبقي معمر عن الفبره

الاصوات فى ال لادا كتير جدا
بس ايه اللى يتطنش وايه الصوت اللى لازم ندور وراه - ده السؤال ؟

**Zing0** · 12-09-2014 05:46 PM

كان عندى صوت تكه أول مجبت اللادا (مستعملة طبعاً) و رحت بيها لكهربائى كنت بأغير عوامة البنزين و سألته
طلع ذراع المساحات اللى على اليمين معلق و عامل الصوت ده
ممكن يكون ده اللى قصدك عليه
و زى ما الناس هنا بتقول اللادا كلها أصوات, ده كفاية صوت الموتور بتاعها, الناس بتعرف إن فى لادا جاية من آخر الشارع !!!

**Abo_Mazen** · 12-09-2014 10:12 PM

إغسل وشحم ..بس غسله حلوه ..ورشة جاز عفيه ..وتشحيم كويس

أنا عارف إن كلامي ممكن ما يكونش ليه علاقة بالموضوع ..بس جرب ..والله ممكن تلاقي الصوت راح ..كان عندي 128 ..كانت أحيانا بتطلع أصوات غريبه ..جات فتره كده كان في صوت زي ورقه سلوفان بسمعها بتتكرمش كده جاي من الناحيه اليمين..كان صوت غريب فعلا ملوش أي مبرر..وملوش أي علاقه بالمادة اللي مصنوعه منه العربيه ..اللي هو الحديد ..وخصوصا إن الصوت كان صوت ورقه سلوفان ..وأروح لعفشجي سمكري ميكانيكي ..محدش عارف إيه ده ..وبعدين في مره بعد ما غسلت ورشيت جاز من تحت الصوت راح ..فتره ..ورجع تاني ..من يوميها بقى عرفت اللي فيها ..كل ما أسمع الصوت أقوم أروح أغسل وأرش جاز من تحت ..الصوت يروح ..فتره كده ويرجع تاني ..أقوم رايح البنزينه ..غسيل رش جاز من تحت ..تضبط ..وهكذا لغاية ما بعتها ..جرب ..مش هتخسر حاجه ..بس ياريت تقول على النتيجه

**ahmdmagdy** · 13-09-2014 03:10 AM

المشاركة الأصلية كتبت بواسطة abokoko

بالنسبة لتغيير المناول
مش هتخسر حاجه
لانه مش غالى وتركيبه مش هياخد وقت
ونتيجنه احسن للدركسيون هيخف التقل شوية بسيطه
والاهم انه هيبقي معمر عن الفبره

الاصوات فى ال لادا كتير جدا
بس ايه اللى يتطنش وايه الصوت اللى لازم ندور وراه - ده السؤال ؟

ممكن اعرف من حضرتك لما ركبت مناول الدركسيون حسيت برعشه في الدركسيون و العربيه ماشيه عشان انا كنت ناوي اركب المناول بس العفشجي قالي بلاش احسن فكنت عاوز اعرف من حضرتك النتيجه ايه

**Zing0** · 13-09-2014 01:28 PM

ممكن اعرف من حضرتك لما ركبت مناول الدركسيون حسيت برعشه في الدركسيون و العربيه ماشيه عشان انا كنت ناوي اركب المناول بس العفشجي قالي بلاش احسن فكنت عاوز اعرف من حضرتك النتيجه ايه

طيب أنا هأضحكك
بأروح للعفشجى بتاعى (أحسن واحد فى المنطقة كلها) بقالى 3 سنين
و جيت فى مرة بأقوله عاوز أغير الفبرة بمناول على رولمان بلى, قعد يسب و يلعن فى الرولمان بلى و يقولى ده هيعمل و يسوى
دارت الأيام و رحت لنفس الصنايعى اللى كان صاحب العربية اللى باعهالى بيتعامل معاه
بأقولة عاوز أغير, قالى أنت اللى عندك أصلاً رولمان بلى !!!
طيب أنا روحت البنزينه بناءاً على كلام العفشجى و شحمت البيض و الصلايب .... قالى البيض مالوش مشاحم و الصلايب ملهاش بنز تشحيم !!!!

عرفت أنى خواجه و بيتعمل عليا أحلى شغل