الموضوع: ابيزا ٢٠٠١

السلام عليكم
دي اول مشاركة ليا في المنتدى العظيم دا وان شاء الله شكلي هاقدي وقت هنا أكتر من شغلي على اعتبار ان شغلي ١٢ ساعة
المهم وعشان ماطولش عليكم
انا برجع من شغلي الفجر ومن أسبوعين عملت حادثة على الدائري والحمد لله على كل حال العربية آد شملت
وبما ان ظروفي ماتسمحش بأى شكل من الأشكال أني أبيع وأشتري جديد فأنا كنت عاوز أصلحها وبالمرة بقى اظبطها كلها وأشدها شدة جامدة .. فأنا طامع في خبراتكم ونصائحكم من حيث أفضل وانضف ناس في إصلاح وتجديد وتظبيط العربيات وأرجو أنكم ما تبخلوا عليا بأى نصيحة او أسعار او تكاليف عشان انا محتاج ومحتار ومش عارف اعمل إيه
وخصوصا أنى برجع الفجر من مدينة نصر وانا ساكن في التجمع الخامس فأمفيش غنا عن العربية.
ارجو الإفادة.

المشاركة الأصلية كتبت بواسطة karim ibiza

حمد الله على السلامة وربنا يعوض عليك
احكيلنا ايه اللى حصل فى العربية عشان نعرف ايه اللى محتاج يتغير

الله يسلمك أستاذ كريم والحمد لله على كل شيء والله انا مش عارف أحط الصورة بقالب ٣ ساعات بحوال موضوع أنى أحط صورة من الآي باد صعب جداً .. بس ها حاول اوصفلك الحادث والشكل الى نتج عن الحادث
انا اتفجئت بمقطورة وقفت في نص الطريق جنب مقطورة عطلانة في منزل النفق الى تحت شارع التسعين وانت رايح على التجمع وكان على شمالى مقطورة ماشية بنفس سرعتي فامكاش قدامي غير آني افرمل عشان لو فاديتها الى على شمالى هاتفرومني وفرملت والعربية زحفت كتير بس وانا بقول الحمد .. لاقيت صوت فرملة غبي ورأيا ودب لاقيت عربيتي بتتزرع في المقطورة الى فرملت عليها .. عربية نص نقل محملة كراتين تفاح لبس فيا ولبسني .. الحمد لله "كل دا حصل في ثانية"
الشكل النهائي
الفانوس الشمال بالبطرية بالرفرف بالجزء الشمال من الاكصدام معجونين والكابوت اتثني ورشق في الزجاج .. الشنطة اتعجنت والفانوس الشمال الدغدغ .. الإيجابي في الموضوع ان العربية تتزق.

الحمد لله عرفت احط الصور اخيراً في الرد التالي

المشاركة الأصلية كتبت بواسطة Tamerlithey

دى الخبطة

ودى من قدام

ودى الشنطة

المشاركة الأصلية كتبت بواسطة hossamalsadik

قدر الله وماشاء فعل
والحمد لله أنك سليم ديه اهم حاجه وربنا يخلف عليك بالخير

انتا كده محتاج مبدئياَ إستيراد وديه اسعار تقريبية
شنطه 400-500 ج بالزجاج بفوانيسها
فنوس واحد خلفى 200
فانوس واحد أمامى 200
كابوت 250-300ج
رفرف150-200
زجاج أمامى جديد 300-350ج
للاحتياط
أكصدام خلفى وأمامى 600-700ج
الكويس فى الموضوع أنك أحتمال كبير تلاقى الصاج بنفس اللون بتاعك

مبدئياً أنا متشكر جداً لأهتمامك يا أستاذ حسام
الأسعار دي كويسة بس أكيد العربية ها تحتاج شغل سمكرة ورد وشد والكلام ده .. وانا عارف ان الحرفيين فيها ناس كويسة بس للأسف انا معرفش مين هما وخايف اروح يتلعب بيت كورة هناك .. وما خدش شغل نضيف في الاخر.
فرجاء من حضرتك لو عندك فكرة عن حد ممتاز أكون شاكر ليك لو قلتلي عليه.

المشاركة الأصلية كتبت بواسطة ehab_mansour

السلام عليكم
مبدئيا الحمد لله علي سلامتك و قدر الله و ما شاء فعل و ربنا يخلف عليك بالخير
زي مانا شايف كده فأنا من وجهة نظري انك محتاج ربع امامي عشان تظبط عليه وش العربية لأن كل مكونات الوش من شاسيه اكصدام و اكصدام و وش الصاج الحامل للفوانيس و الفوانيس مكسره فأنصحك بدلا من التقطيع انك تشتري ربع امامي كامل و تبيع اللي انت مش محتاجه من حاجتك لو عندك فوانيس شبورة مثلا او علامة بالشبكة او او ...
في الخلف انت محتاج شنطة و شاسيه اكصدام لأنه اكيد معجون تحت الاكصدام

عموما دي كلها توقعات انصحك تروح للسمكري و هو هيقلك ايه ينفع نستعدله و ايه لازم يتغير
بالنسبة لمين يعملك الشغل فأنا عملت شغل قبل كده في الحرفيين عند ورشة نايل موتورز و صراحة شغل الدهان كان ممتاز و لكن شغل السمكرة كان فيه بعض الملاحظات لكن اعتقد ان كريم بيك اساسا غير السمكري اللي كان عامل عربيتي و اعتقد عنده حد افضل دلوقتي
لكن لازم تكون عارف ان الحرفيين اسعارها اغلي من اي مكان و لكن لها مميزات كثيرة زي توافر قطع الغيار و الامانه موجوده عند كريم بيك اكيد طبعا غير اي حد تاني
طبعا حسب تجاربي السابقة و حسب مانا شايف عربيتك فهي لن تقل تكلفتها عن 10 الاف جنيها تقل او تزيد قليلا عشان تخرج فبريكه و بوية اصلية و شغل عالي

تفصيل ثمن قطع الغيار لن يفيدك كثيرا خاصة انك انت و نصيبك و التاجر و توافر القطع ... كل دي عوامل ممكن تغير السعر و حاول تفاصل و تشتري حاجتك كلها من تاجر واحد و مرة واحده عشان تعرف تنزل في السعر
و بالتوفيق لك و للجميع

الله يسلم حضرتك أستاذ إيهاب
والله انا عاجز عن الشكر على الاهتمام بالرد .. انا ها عمل زى ما حضرتك قلت وهاروح ورشة نايل موتورز "بس محتاج العنوان"
حضرتك متعرفش انت قد إيه ريحتيي والله .. متشكر جداً.