حساس الأضاءة لمن لا يعرفه هو أوبشن بيخلى الأضواء تشتغل تبعاً لشدة الأضاءة الخارجية....يعنى فى الصبح و مع الشمس بيفصل الكشافات و لما الدنيا تبقى غروب يقوم يشغل الكشافات لوحده و هكذا و ده بيخليك تنسى من دماغك موضوع الكشافات ده تماماً....يتم تفعيل الأوبشن بأنك تلف دراع النور لأخر تكه اللى مكتوب عليها auto
لاحظ ان الحساس بيتحكم فى النور الصغير و الواطى مع بعض....يعنى بينورهم سوا او بيفصلهم سوا...لكنه لا يتحكم فى العالى و سايبه للقائد يتحكم فيه براحته
الأوبشن ده كان موجود عندى فى الميجان من 2006 و للأمانة مكنتش بستخدمه لأنه كان بيشغل الأنوار بدرى شويه و بعدين كان لازم تبقى طافى العربية علشان تشغله او تطفيه لو معجبكش....المهم مكنش عاجبنى قوى

لما جبت الفلوانس كان طبعاً فيها نفس الأوبشن مع سهولة أكتر فى تشغيله او فصله و ذلك من خلال دراع النور.....أضف إلى هذا أنوار ال drl
بصراحة انا مكنتش مشغل الأوبشنين دول

بعد ما سافرت بره أخر مرة و أجرت عربية هناك و كان فيها الأوبشنين دول بصراحة حسيت جداً اد ايه هما مهمين للأمان و مريحين فى نفس الوقت

المهم لما رجعت هنا و بما ان الشتا قرب يدخل علينا كل سنة و انتوا طيبيين و اسكندرية الدنيا بتغيم فيها كتير....قلت اشغل الخاصيتين دول و استمتع....اللى هما الأضواء النهارية ال led أو drl و كمان حساس الأضاءة

قوم ايه بأه::::::
- و انا فى الجراج الصبح و ادور العربية الاقى النور الصغير و الزينون اشتغلوا
- قوم اطلع بس من الجراج فى النهار الاقى النور الصغير و الزينون فصلوا و ال drl اشتغل ( أضاءة ال led بقت أقوى و الأضاءة الخلفية فصلت)
- قوم ادخل نفق الاقى العكس الأنوار بتولع لوحدها قوم اخرج من النفق الاقيها بتطفى
ايه شغل الفنادق ده؟
حاجة دلع الدلع بصراحة و استمتاع جامد جداً
بشجع الجميع على استخدام هذا الأوبشن الهائل

تحياتى