الشتا بالنسبة لك ايه؟

**lancerevolution** · 02-03-2009 03:36 PM

أكتر حاجة بحبها فى الشتا المشى فى الشارع بالليل فى السقعا و لواحد يبقى ماشى سقعان و تدخل البيت تلاقيه دافى إحساس رهيب
المشى فى المطرة جامد بيخلينى عايز أجرى و أطنطط شوية أحاسيس جامدة
كوباية كاكاو شخن و مع المذاكرة رهيييييييييييب
و أحلى حاجة كانت فى ثانوى طرقع للحصص و أنزل أعمل أى حاجة فى الحوش أو أطلع أتشمس على السور و الى دلوقتى بنوا مدرسة تانية جنب الصور و حرموا الأجيال القادمة من النتط و الهروب و التشميس
دلوقتى بقى بطرع للمحاضرات و أروح أقعد فى ملعب الكورة الى فى الكلية فى النص عشان أخد كل الشمس لعدم وجود كافيترا و ساعات بطلع أقعد على القهوة الى قدام الكلية و الى لسة فيها كوباية الشاى ب75 قرش و حجر القص ب50 قرش "مع إنى ما بطلبش غير شاى "
و يا سلام على القعدة مع أصحابى فى أى قهوة نلعب كوتشينة
و أكتر مكان بحب أروحة كافتريا فى وسط غيطان أينعم بعيدة و مشوار مؤرف و كله كلاب بتجرى وراك "الحمد لله بقالهم بكام شهر مختفين" بس القعدة هناك فى السقعة جميلة و كمان فى الصيف بس الصيف بتبقى مملة عشان بتبقى زحمة
أحلى حاجة فى الشتا تتلف ببطانية و تتفرج على التلفزيون بس عيبها إنى مبعرفش أغير القناة بكسل أطلع إيدى و أجيب الريموت
ياه على الشتا و أيام الشتا و تسمع فيروز فى الشتا شعور تانى غير الصيف
الحمد لله على الشتا و الصيف

**pro_samir** · 03-03-2009 05:48 AM

المشاركة الأصلية كتبت بواسطة lancerevolution

و أكتر مكان بحب أروحة كافتريا فى وسط غيطان أينعم بعيدة و مشوار مؤرف و كله كلاب بتجرى وراك "الحمد لله بقالهم بكام شهر مختفين" بس القعدة هناك فى السقعة جميلة و كمان فى الصيف بس الصيف بتبقى مملة عشان بتبقى زحمة

هيا فين دى ؟

**mesaharaty** · 03-03-2009 11:02 AM

طبعا أنا باحب الشتاء (الكلمة دى أقولها لو صيف) ولو جه الصيف أقول إمتى الشتا ييجى لأن الصيف بالمقارنة بالشتاء طبعا الشتاء يكسب .
أنا مابحبش الصيف خالص وحاسس دايما إن نهايتى حتكون فى صيف ما .
عرق وسوء تنفس وحر يااااااااااااه آخر تعب
أما الشتاء فينقضى فى المذاكرة (مش أنا إللى باذاكرإنما العيال ) والشعور بأن الدنيا كلها منكمشة .

ذكرياتى مع الشتاء كالآتى :
أنفلونزا - رجل بنطلون متسخة .