لقيت فى الجزيرة تنويه ان فيه مطر شديد رعدى مر بالاردن مافاتش ربع ساعة لقيت مطر محترم فى مينة نصر وهواء شديد ثم زاد المطر لمرحلة السيول ، ثم دفعات من الثلج صغيرة زى الذرة ، تسمعها على صاج المكيفات ثم سيول والمحصلة شوارع غرقانة ، قعدنا ندعى باللى نفسنا فيه والدنيا بتمطر
اضطريت انزل رمسيس ، الساعة 4:30 قبل المغرب واخذت طريقى حتى صلاح سالم عند الجهاز المركزى للمحاسبات لقيت بركة محترمة تصطاد السيارات
وقفت افكر اعمل ايه لقيت عربيات زيى فيرنا بتعدى قولت يالا يا عديت يا اخذت غوطس
عديت بالعافية والعربيات تعمل امواج وهية بتعدى وكل شوية عربية من فئات الادا والفيات والفيورا و131 تقف والناس جواها محتاسة
نفس الحكاية فى الجانب الاخر من صلاح سالم ثم دخلت على الخليفة المأمون
ساعة الا ربع حتى وصلت لجامع عبد الناصر لاكتشف المفاجأة
المية اعلى مرتيين من صلاح سالم وبتوصل لباب العربيات
كنت دخلت الخية اخذت اقصى شمال وكأنى حاكك فى الرصيف وهوب عربية من السرب 132 عطلت ، ساعدونى ياجماعة ، محدش بيسأل لان الموقف مصيبة فعلا
مسافة 100 متر فى البركة وانقشعت المياة والطريق خالى تماما من المياه
وانا راجع من رمسيس واقفة من قبل غمرة لما وصلت لتقاطع احمد سعيد اخذت يمين سالك وفل حبيت ادخل على صلاح سالم العربيات مرشقة غرقانة فى المية
طيب اعبر المانش ده ازاى لفيت لحد العباسية ودخلت من عند الاتوبيس الدولى ، نصف ساعة واكثر علشان اوصل لنهاية الشارع ، ثم عند نادى السكة بحر محترم ونفس القصة
لحد ماوصلت لتقاطع المترو طلعت تانى على مدينة نصر والستغرقت رحلة المرواح والمجى حوالى 3 ساعات
زمان كان فيه فتحات فى الرصيف تشفط المية ، مع تكرار الرصف طمست حتى فى روكسى التى كانت تشتهر بها وغرقنا احنا فى شبر مية