ماروتي بتسخن مع السرعة

**ismail.dakrory** · 16-09-2014 09:18 PM

السلام عليكم

انا كنت عملت حادثة بالعربية غيرت بسببها الرادياتير ، بعد فترة لاحظت ان العربية بتسخن لما امشي على سرعة فوق الثمانين ، يعني لو تسعين او مية تفضل تسخن لغاية ما توصل للخط بتاع الخطر ده ، المية بتبقى مظبوطة مدام معديتش التمانين بس طبعاً لما بتسخن البخر بيزيد والمسة بتنقص.

زمان كانت مظبوطة وعمرها ما عدت نص المؤشر بتاع السخونة ، هل ده عيب في الريدياتير الجديد ولا ثرموستات ولا مروحة ولا ايه بالظبط ؟؟

**na3m977** · 16-09-2014 11:35 PM

نفس المشكلة معاية بس الفارق ان عربيتى 128 متابع معاك حل المشكلة

**egyptiandiver** · 16-09-2014 11:41 PM

عربيتك خايفة عليك يا أستاذ... بمعنى آخر رادار أوتوماتيك :)) ربنا يبعتلك إلي يحليلك المشكل دة إن شاء الله.

**amagroup** · 17-09-2014 09:39 AM

ممكن يكون الكلام اللي هقوله ده مش دقيق لكن جرب ورد عليا
كلامك ببساطه معناه انك لما بتحمل علي الماكنه بسرعة عاليه دورة المياة مبتقدرش توفر تبريد للماكنه وهي علي السرعه دي

يعني مثلا طول ما الrpm علي 3 هي كويسه
اول لما يوصل ل 4 تسخن

اذن في حاجه في خنقه في دورة التبريد او مشكلة في الطرمبة

لازم تراجع الدورة ممكن يكون في صدأ او حاجه اتحركت من مكانها بسبب الخبطه او الراديتير اللي انت جبته معندنه مش مناسب لتبريد العربيه او فيه عيب

**ismail.dakrory** · 17-09-2014 07:41 PM

شكراً ياباشا ، فيه ميكانيكي قال انه ممكن يكون ثرموستات بس عندي شعور ان كلامه مش مظبوط .. ايه رأيك اشيل الثرموستات خالص فعلاً ؟؟

**memoo305** · 18-09-2014 01:41 PM

غالبا الريداتير فيه مشكلة

**dadofranz** · 19-09-2014 11:05 AM

المشاركة الأصلية كتبت بواسطة ismail.dakrory

شكراً ياباشا ، فيه ميكانيكي قال انه ممكن يكون ثرموستات بس عندي شعور ان كلامه مش مظبوط .. ايه رأيك اشيل الثرموستات خالص فعلاً ؟؟

ممكن يكون الردياتير الجديد فيه عيب

او ممكن فعلا ترموستات الكوع فيه مشكلة وعايز يتغير

لو الترموستات انصحك تغيره وما تشيلوش علشان احنا داخلين على الشتاء ولو شيلته العربية هتتعبك على ما تسخن الصبح وهتاخد وقت وهتبرد منك في الطريق لو البرد شديد

**dr.hazem** · 19-09-2014 11:52 AM

جرت العادة ان مشكلتك دي اما المروحه تعبانه او الراديتير في سدد وده الغالب لو بتستخدم مية حنفية
نصيحه لو بتستخدم مية حنفيه تروح تعمل تنظيف للدورة بالكامل...
تحياتي

Sent from my mobile using Forum Runner