الموضوع: جوليتتي حبيبتي اتباعت ... واليكم التجربة ... وعمرى ماهقول وداعا لقسم الدايو

الحمد لله ... عربيتي الجوليت اتباعت في اقل من 24 ساعة ... وطبعا حزين جدا لاني سبتها بس هى دي سنة الحياه :) :) :) التغيير قادم قادم

مبدأيا ده لنك الموضوع اللى تم فيه تسعير السيارة بعد وصف حالتها بالتفصيل واتسعرت ب 43000 من السيد شريف وهبة استشاري التسعير

http://www.nilemotors.net/Nile/439427-a.html

عملت اعلان بالمواصفات على جروب سوق السيارات على الفيس بوك وعلى كونتاكت كارز ومعاه الصور دي وطلبت 44000















الاعلان اتحط يوم الاتنين الساعه 2 ظهرا ... من الساعه 2 وربع بلا مبالغة والله العظيم كل 5 دقايق تليفون ... لدرجة انى اديت 4 مواعيد يوم الاتنين و 6 مواعيد يوم التلات وبدأت ادخل في يوم الاربع كمان ... وخد بقي ضحك للصبح ... واحد بقوله انا اسف النهاردة وبكرة اديت مواعيد معاينات كتير .. يقولى ياخسارة ياخسارة .. مش هتستنناى .. هتتباع ... انا حظي كده ...

المهم 3 من ال 4 بتوع اول يوم جم فعلا شافوا العربية وطلع منهم 2 تجار ... بيبانوا اوى التجار .. بعد ما يتفرج على العربية يوقلك ياباشا العربية دي فايدتها كام ؟؟؟ تعرف انه تاجر ... قلتلهم اخرى 43000 اللى قال بقي 37 حلو عليها واللى قال 38 كفاية .. قلتلهم لا اخري 43000 .... المهم الشخص التالت كان عاوز العربية لزوجته ... جه واتفرج عليها وقالي خلاص انا شاري .. بكرة هجبلك الفلوس واخلص معاك .. قلتله بس مع احترامي ليك لو جالى حد بكرة قبلك وطلع فلوس قدامي مش هستناك ... لو انت جاد في الشراء ادفع انشالله 500 ج ربط كلام عشان اقول للناس العربية اتباعت ... قالي مش معايا ومش عارف ايه وكلام من ده وكنت وصلت معاه في الفصال ل 42500

تاني يوم من الساعه 9 الصبح جالي ناس عند الشغل اتفرجوا عليه ... وقالوا احنا هنجيلك تاني الساعه 5 بالفلوس ونرفعها في بنزينه وميكانيكي تبعنا يبص عليها .. قال تمام هنخلص .. قلتلهم ماشي معنديش مشكلة ... وصاحبنا بتاع امبارح اتصل بيا الصبح وقالي انا خلاص اشتريت وشيل الاعلان من عالنت .. قلتله اما نتقابل ونخلص هنشيله من عالنت لكن لحد دلوقتى انا ولا خدت عربون ولا كتبت عقد

جالي كمان 3 اشخاص خلال اليوم من الساعه 10 لحد 2 ظهرا اتفرجوا وبرضوا طلعوا تجار ... واخرهم كان 39 الف ... وبعدين كلمنى شاب بيشتغل في وزارة الكهرباء قالي انا بكلمك من امبارح وانت مش بترد قلتله انا جالي كمية تلفونات ولا كانى خدمة عملاء في فودافون ... المهم قالي انت فين قلتله في الحتة الفلانية ... قالي انا جايب ميكانيكي وجايلك نص ساعه واكون عندك ... وفعلا جه الساعه 3 والميكانيكي فحص العربية بمنتهى الدقة وبامانة ربنا طلع كل اللي فيها حتى كمان الجزء بتاع الركبة اللى تحت المقص اللى انكسر مني ... والشاب وافق ياخد العربية على حالتها دي وبدأنا الفصال

انا مسكت في ال 43000 على اساس ان ده اخري وهو مسك في 42000 ... المهم وصلنا ل 42500 قلتله هتعمل توكيل ولا هتسجل .. قالي لا هسجل وده اللى أكدلى انه عاوزها لنفسه مش تاجر ... قلتله على البركة قالي يلا عالبنك نلحقه قبل ما يقفل ... وفعلا رحنا فرع بنك اسندرية قريب ودخل سحبلي 40 الف جنيه واداهملى وكتبنا عقدين وخد العربية وصورة الرخصة ومشي .... اتصلت بالناس اللى كنت مديهم مواعيد واعتذرت ان العربية اتباعت ... صاحبنا اللى كان قايلي هيجلي الساعه 5 ومعاه الفلوس تقريبا كده شتمني في التلفون لما قلتله انها اتباعت .. وقلتله انا قلتلك لو حد طلعلى فلوس انا هخلص معاه ... مش عارف انا كده غلطان ولا لا ؟؟؟

المهم النهاردة الصبح قالبت المشتري وجبتله شهادة مخالفات ... ورحنا عالشهر العقاري سجلنا العقد ودفع هو رسوم 520 جنيه نقل ملكية وخدت انا باقي الفلوس ... وخد رخصة العربية والمفاتيح الاحتياطي وتوكل على الله

وبكده بقيت انا من غير عربية مؤقتا لحد اما اجيب عربية جديدة لكن مش هسيب قسم الدايو ابدا :) :) :) هفضل على قلبكوا كده