الموضوع: حوار من القلب للقلب - الجزء الأول

المشاركة الأصلية كتبت بواسطة marsguy

بصراحه أنا مش عارف إيه نظام الموضوع ده، يعني مش عارف مين اللي ليه حق يسأل؟ ومين اللي بيجاوب وإمتى ....

بس انا هافترض إن الأستاذ سبعاوي هو الضيف دلوقت وأنا هافترض إني ممكن أسأل.



بس كفايه كده

إيه هو أسعد يوم مر عليك حتى الآن؟

يوم ما اشتريت اول عربية فى حياتى (كانت سيات 133)

هل تشعر بإنك متحكم في حياتك أم حياتك هي المتحكمه فيك؟
يعني مين فيكو اللي ممشي التاني؟

لا انا متحكم فيها ولا هى متحكمة فيا ، ساعات بقدر عليها وساعات بتقدر عليا، صراع مستمر انتصر فيه احيانا واقبل بالأمر الواقع احيانا اخرى، لكن اقدر اقول انى حتى لو مش متحكم فيها 100% لكنى راضى بيها

هل إنت متفائل بمستقيل مصر أم إنك من أنصار مقولة "ما فيش فايده"؟

مصر عندها المقومات اللى تخليها بلمسات بسيطة ممكن يبقى ليها مكان تحت الشمس، لكنها لن يكون لها مكان تحت الشمس دون هذة اللمسات البسيطة، ونحن لا زلنا فىانتظار ذلك اللذى سيعطيها هذة اللمسات والذى لا يجيء ابدا، حتى تحول فى الوجدان الجمعى المصرى الى"جودو الذى لا يجئ ابدا" او "هراس جاى"

هل إنت متخيل كوكب الأرض بعد 100 سنه ممكن يكون عامل إزاي؟

ممكن يكون عندى شوية تصورات بس مش شرط انها تصدق، انا اعتقد ان بعد 100 سنة دور امريكا العالمى هيتضائل كثيرا وهتظهر قوى مناوئة، عدد البشر هيقل اكثر فى الدول الغنية وهيزيد اكتر فى الدول الفقيره، الهوة الحضارية هتتسع، نضوب البترول سينهى اهمية دول النفوذ العربى،اسرائيل وفلسطين ستندمجان لتصيرا دولة واحدة يهيمن عليها اليهود، افريقيا ستصبح منجم الذهب الذى يتصارع عليه العالم لأن مواردها لا تزال بخيرها ، طفرات الأبحاث فى مجال الطاقة ستجعل هم العالم كله هو توليد الكهرباء من كل مصدر ممكن، وستحل السيارة الكهربائية محل سياراتنا الحالية، الطيران سيكون باستخدام الهيدروجين المسال ، يعنى ده اللى فى بالى ديلوقتى

ما هي أحسن صفه في شخصيتك وما هي أسوأ صفه في شخصيتك؟
قنوع-عصبى
لو عندك آلة زمن وقدامك تختار تعيش في أي زمن ... ها تختار تعيش في أي فتره؟ مع العلم إن آلة الزمن دية صالحه لمره واحده بس، يعني مش هاتعرف ترجع لزمنك تاني.
لو هعيش فى مصر احب اعيش فى عشرينات القرن الماضى، لو هعيش فى مكان آخر فانا نفسى انى كنت اعيش السبعينات فى سنى الحالى

صوتك العالي دليل على ضعف موقفك .... صواب أم خطأ؟

احيانا يكون دليل على ضعف الموقف واحيانا يكون مجاراة للطرف الأخر صاحب الصوت العالى حتى لا يظن انه بصوته العالى قد حسم موقفا هو يعرف ان حجته فيه ضعيفة

لو كل الستات قعدوا في البيوت البلد دية حالها هاينصلح ... هل أنت مؤمن بهذه المقوله؟

لأ ، وبرغم ان السؤال بنعم او لا لكن انا لا زال لدى المزيد لأقوله هنا، العلم والخبرة لا يتكسبان من المدرسة فقط ، وانما من الحياه، واذا كان من اعظم مهام المرأة تنشئة جيل جديد وادارة المنزل بصورة جيدة، فان المرأة التى انفصلت عن الواقع وعن المجتمع وعن كل مفردات الحياه ،اللهم الا التليفزيون ستعيش فى عالمها الخاص الذى قد لا يكون بالضرورة مطابقا لما يحدث خارج باب المنزل، مما سيؤدى غالبا الى خلل فى الكم والكيف الثقافى الذى ستملأ به عقول اطفالها وقصورات متعددة فى اسلوب ادارة المنزل نابعة من عدم الالمام بمتغيرات الحياه، فى رأييى ان فكرة العمل(بعض الوقت) التى تطبقها معظم الدول الاوروبية هى من انسب الأفكار للأم المسئولة عن تربية اطفال دون سن البلوغ، اما المرأء التى ليس لديها مسئوليات عائلية فبالتأكيد ان عملها(اذا كان عمل جدا وليس بطالة مقنعة تضمن بها الحكومة وجود عدد كافى من الأفراد فى مكاتبها تستطيع شحنهم على صناديق الاقتراع فى اى وقت لتمرير اى قرار) سيكون اضافة للمجتمع والمجتمع فى حاجة اليها

المصريين مش مستعدين للديموقراطيه والدليل على كده أحزاب المعارضه واللي بيعملوه في بعض وهم أول المنادين بالديموقراطيه ... صواب أم خطأ؟
المصريين مكانوش مستعدين للحرب ، علشان كدة خدنا على دماغنا سنة 67
،لكن بشوية تخطيط عملنا معجزة سنة 73، المصريين مكانوش مستعدين للانفتاح علشان كدة فلوس البلد ضاعت فى اللبان والبلوبيف، لكن ماهو احنا النهاردة بننفتح غصب عن عينينا واهو عايشين، صحيح بنعانى لكن ازمة وتعدى، المصريين مش مستعدين للديمقراطية علشان كدة الحل هو حكم الفرد المستنير، لأ انا شايف ان تطبيق كل مبدأ من المبادئ ممكن بس بالتدريج، بس الفكرة هى ان الديمقراطية مع شعب جاهل دى كارثة، لأن الديمقراطية مع عموم الجهل ستاتى الى الكرسى بمن استطاع ان يخاطب غرائز البسطاء، يعنىالناس مش هتنتخب اللى عنده رؤية مستنيرة او منهج واضح او من ينوى الحفاظ على الديمقراطية وليس من يستغلونها للوصول للحكم ثم يقضون عليها، لكن الناس هتنتخب اللى جاب لابنهم وظيفة فى سلسلة المحلات اللى بتبيع الملابس باسعار شعبية او رصف الشارع قدام بيتهم او عمل لهم مستوصف جنب الجامع او الكنيسة او اداهم 50 جنيه عن كل صوت او عشاهم ليلة الانتخابات
إيه هو أكتر شئ مجنون عملته في حياتك؟
فى بداية حياتى المهنية كنت بشتغل فى مجال المصاعد، وعلشان اتعلم فنيات الشغلانة كنت بحب اشتغل شغل الفنيين ، فكنت بقف على سقالة خشبية عرضها هو عرض قدماى بلا زيادة وتحتيها 30 دور من الفراغ التام تهدد بالفناء من يسقط فيها، ممسكا شنيور دقاق هيلتى قدرته 2 حصان لو لأى سبب انحشر فى الحائط هيلفنى معاه ليستقبلنى الفراااااااااااااااااااغ ، واخرم بيه فى الخرسانة لتركيب دعامات قضبان الأسانسير، بس انا كنت بحب اعمل كل حاجة بايدى عدة مرات علشان مافيش فنى يضحك عليا

المشاركة الأصلية كتبت بواسطة hanystar

أستاذ / خالد أو سبعاوى
أستمتعت جدا جدا بردودك الواعية المثقفة
والتى تنم عن شخصية ندر تواجدها فى هذه الأيام
أما عن أسئلتى مش هطول عليك
- ما هى طموحاتك المستقبلية وأحلامك التى تود تحقيقها .
- كيف تتعامل مع المهندسين اللى أصغر منك فى العمل .
- ما رأيك فى عمل المرأة .
- وأخيرا هل أستقريت على إسم المولود الجديد أم لا .
( ييجى بالسلامة إن شاء الله )

- ما هى طموحاتك المستقبلية وأحلامك التى تود تحقيقها .
بعد ان اصبحت مشروع اب، فان طموحاتى المستقبلية حاليا تتركز فى تقديم نموذج جيد من افراد الجيل القادم ، نموذج يمكن ان يقدم شئ لبلده ، بالاضافة الى ذلك فان حلم الداراسات العليا يداعب مخيلتى
- كيف تتعامل مع المهندسين اللى أصغر منك فى العمل .
فيه 2 مود، مود المدرس ، وده انا بلاقى نفسى فيه جدا، وكل من هم اصغر منى بيحبوا جدا يسمعونى لما بقلب على مدرس واعلمهم حاجات فى الشغل، والمود التانى هو مود المدير، لكنى بصراحة مدير متساهل زيادة عن اللازم ومبعرفش اشخط و لا اجازى، ويمكن علشان كدة انا ولله الحمد كنت مدير محبوب لكل الناس اللى اشتغلت معايا
- ما رأيك فى عمل المرأة .
مش انا اللى اقد اقول ان المرأة لها حق فى العمل او لأ ، لأنى ببساطة لا انا امرأه ولا انا وصى على كل السيدات، كل امرأة وصلت لسن الرشد هى كائن كامل الأهلية من حقها تماما ان تتخذ قرارها بالعمل خارج المنزل او العمل داخل المنزل بما يتناسب مع ظروفها وبالاتفاق مع شركائها فى الحياه(اي، زوج، ابناء) ، لكن فكرة ان بعض الناس يلوون عنق النصوص الدينية لبيرروا تسلطهم على من حولهم من نساء هى فكرة انا لا استطيع هضمها، يعنى فيه مثالين شهيرين احدهما لحديث عن رسول الاسلام عليه الصلاه والسلام ، احدهما هو حديث(ناقصات عقل ودين) والذى لم يترك الرسول الكريم مجالا لاحد ليسئ تفسيرهما حيث فسرهما بنفسه وربط كلمة (نقص العقل) ببعض التصرفات العاطفية المبالغ فيها فى حالات الحزن الشديد، وربط كلمة(نقص الدين) بالشكل البيولوجى لدورة حياه المرأة والذى خلقها الله عليه فيما يمنعهامن اداء بعض الفرائض فى اوقات معينة، وهذا التوضيح قفل باب التفسيرات الملتوية لم يترك مجالا لمن يرغب فى افراغ عنصريته فى المرأة لكى يمارس هذة الهواية عن طريق لى عنق النص الدينى، ومع ذلك نجد من يتخذه ذريعة ليمارس تسلطه على المرأة ، والمثال الآخر من القرآن الكريم فى ىية"الرجال قوامون على النساء" ومع ان كلمة قوامون تفسيرها واضح جدا فقوام هى صفة مبالغة من "قائم" والقائم على شئ هو الذى يتولى اموره ويتحمل مسئوليته، فيما معناه ببسطة ان مسئولية الاهتمام بكل ما يلزم المرأة يقع على عاتق الرجل الذى يقوم بامرها سواء كان اب او اخ او زوج او ابن، خاصة وان تكملة الآية تؤكد هذا المعنى وتقول"بما انفقوا" ، لكن البعض يصر ان يفسرها بما يخدم تسلطه

عموما انا هاسوق مثل بسيط جدا انا طبقته فى بيتى، انا وقت الزاوج عقدت اتفاق بسيط جدا، انا عليا التزامات وعلى الطرف التانى التزامات، انا عليا اصرف على البيت ومن فيه بالكامل دون ادنى مشاركة مادية من الطرف الآخر، ولى ان البيت يظل مكان صالح للاعاشة الآدمية، ويوم ان يكون هناك اطفال لى ان يكون هناك دائما من يعنى بهم 24 ساعة فى ال24 ساعة طوال الفترة الأولى من حياتهم حتى يمكنهم البقاء وحدهم فترة من اليوم، اذا الطرف الآخر يقدر يوفق بين ده وبين عمله انا معنديش اى مشكلة، ميقدرش يبقى اتفاقنا له الأولوية، واى تبعات تترتب على عدم القدرة على التوفيق بين مواعيد العمل والتزامات المنزلية انا مش مسئول عنها، يعنى مثلا مصاريف حضانة للطفل بسبب غياب الطرف الآخر فى العمل، انا ممكن ادفعها بشكل ودى او على سبيل المجاملة ، لكنها ليست الزاما على، وهكذا،
يعنى ممكن الخص نظرتى للموضوع فى ان عمل المرأه هو اختيارها الشخصى بشرط ان توفق بينه بوين التزاماتها الأخرى بالاتفاق الودى مع شركائها فى الحياه بما يرضيهم ويرضيها
- وأخيرا هل أستقريت على إسم المولود الجديد أم لا .
يعنى ممكن تكون فيه بعض الاختيارات المبدأية، بس انت عارف ممكن فى آخر لحظة كل حاجة تتغير، يعنى زى ما فى ماتشات الكورة كدة، المباراه لا تنتهى سوى مع صفارة الحكم برضه هنا، الاختيارات ستبقى قابلة للتغير حتى لحظة اخطار موظف السجل المدنى

أود أن اشكر نور علي برنامجها الناجح و القيم الذي طالما امتعتنا به , و اتوجه بالشكر الحار الي ضيفها صاحب المعلومات الغزيرة و الغنية التي طالما اثرت عقولنا , تحية من القلب الي الضيف الكبير سبعاوي

للاسف لم استطع المشاركة بالامس حيث كنت مريض و بحالة لاتسمح لي بالنظر الي شاشة الكومبيوتر لكن الحمدلله اني لحقت اخر حاجة لسبعاوي و علي امل لقاء قريب به ان شاء الله

المشاركة الأصلية كتبت بواسطة Chicco

طب رأيك إيه يا باشا في رتشارد دوكنز ... أنا باحس إنه منطقه مغلوط و حجته ضعيفة لأي حد فاهم شوية ... هو بنفسه بيعترف أنه مش قاري كويس و نظرته أحادية .... بس طبعا الناس بره مجنونة بيه علشان المنطقية و العقلانية اللي بيتكلم فيها .....

ربنا يعينك على "كتاب" ديورانت بس ده محتاج رف بحاله في المكتبة :)

كتاب ياكوف بيرلمان ده ما اعرفوش صراحة .... حاسس اني ما ينفعش أجيبه و إنه كتاب ليه علاقة بالهندسة مش عارف ليه :o

سؤال دسم جدا جدا جدا،
الموضوع فى رأييى مش سهل ،
هقول لك ليه، وطبعا ده من وجهة نظرى التى قد تصيب وقد تخطئ
خلينا نوضح بس الأول لباقى القارئين من هو ريتشارد داوكينز وما هو كتاب صانع الساعات الاعمى علشان كل الناس تستفيد من المناقشة

ريتشارد داوكينز احد خبراء التاريح الطبيعى والتطور البيولوجى، ويعتبر من اشهر خبراء العالم الحاليين فى هذا المجال وشهرته فى الغرب اكثر من نار على علم، ريتشارد داوكينز ملحد ، ومن اشد المدافعين عن فكرة الالحاد ويستغل نظرية النشوء والتطور، واسهاماته المتعددة لتطويرها فى الدفاع عن مبدأ الالحاد، وبرضه علشان ما نتخضش ، ففى الغرب فكرة الالحاد عادية جدا وفى اوروبا تتراوح نسبة الملحدين فى كل دولة من 30% الى 70% حسب الدولة وفى الولايات المتحدة التى تفخر بهويتها المتدينة تصل نسبة الملحدين الى 30% ، وبالتالى هم فئة من نسيج كل المجتمعات الغربية مندمجة تماما فى مجمعاتها ولهم افكارهم ونظرياتهم وفلسفاتهم والتى تصب كلها فى الشأن العقائدى ، لكن ليس لها علاقة بأى توجهات سياسية او اقتصادية، يعنى احدنا كشرقيين اعتدنا فى وجداننا الجمعى اننا نربط كلمات مثل(الالحاد، الصهيونية، الماسونية العالمية، بروتوكولات حكماء صهيون) ببعضها ، لكن الواقع غير كدة حيث ان الملحدون فى الغرب ليست لهم اى توجهات سياسية او اقتصادية...الخ تختلف عن اجندات اوطانهم المعلنة، بعكس المنظمات الصهيونية والماسونية وما شابه، فقط المقدمة دى كانت ضرورية علشان افصل بعض الأوراق المخلوطة عن بعضها ، علشان لما اقول ان واحد زى ريتشارد دواكينز ملحد ادمغة الناس متروحش للصهيونية ولا الشمعدانات السباعية ولا الماسونية العالمية، لأنه ببساطة واحد مش بيتكلم غير فى العلم، سواء التفقنا معاه او اختلفنا(وغالبا هنختلف) لكن لا داعى لخلط الاوراق

عموما دى صفحة داوكينز فى الويكيبديا
http://en.wikipedia.org/wiki/Richard_Dawkins

وده الموقع الرسمى بتاعه
http://richarddawkins.net/

نتكلم باه عن كتابه الأشهر: صانع الساعات الأعمى the blind watchmaker
فى هذة الكتاب يضع ريتشارد تصوره الخاص لميكانيكية حدوث النشوء والارتقاء لكل الكائنات الحية الموجودة على الأرض، ويستعرض نماذج للمحاكاه قام بانشائها على الحاسوب لفكرة التطور العشوائى ويرينا نتائجها التى تعضد نظرياته ويتطرق الى حيثيات واسانيد عديدة تؤيد فكرته فى ان الكائنات الحية على الأرض نشات بأسلوب لا علاقة له بفكرة الخلق التى ينادى بها اهل الأديان ، فيما يصوره فى النهاية بأن الآلية التى انشأت كل الكائنات الحية هى اقرب ما يكون الى ساعاتى اعمى، يجرب ان يضع الأشياء بجوار بعضها بشكل عشوائى قد يؤدى الى ان تعمل هذة الشياء او لا تعمل، فاذا عملت ابقاها وجرب ان يضيف عليها واذا لم تعمل هدمها، وألية الابقاء والفناء فى الطبيعة هى فكرة بقاءالأصلح ، فالتطورات التى لا تودى الى خلق كائن افضل ملائمة لما حوله تؤدى الى فنائه ، والتطورات التى تخلق كائن افضل ملائمة لما حوله تجعله يبقى كخامة صالحة لمزيد من التطوير وهكذا

ودى صفحة ويكيبيديا عن الكتاب
http://en.wikipedia.org/wiki/The_Blind_Watchmaker

نيجى باه لسؤال اخونا شيكو :

انا كتبت المقدمة الطويلة العريضة دى كلها علشان اوصل لأن فيه معضلة تاريخية تمنع حدوث اى نقطة التقاء بين المؤمنين والملحدين، المعضلة دى هى ان مافيش ارضية مشتركة
يعنى لما حد مننا بيتكلم عن فكرة وجود الإلاه وعقلانيتها بيكون مطلوب منه انه يجيب اسانيد ودلائل عليها، فلما بيجيب دلائل بيكون مطلوب منه دلائل على الدلائل ، وهكذا نفضل ننزل بمستوى الدلائل لحد ما نوصل لأرضية من المسلمات التى لا نقاش فيها وكلنا بنعتبرها حقائق غير قابلة للنقاش

لكن فى الواقع ان ما نراه نحن مسلمات يراه الملحدون مجرد نظريات فى حين ان هم ايضا لديهم مسلماتهم التى يرون انه لا نقاش فيها ، ونحن ايضا نراه نظريات وقد نرى انها نظريات لا منطقية ايضا

فبالتالى لا توجد ارضية مشتركة تحتوى قدرا من المسلمات الثابتة يمكن ان يحتكم اليها النقاش بين مؤمن وملحد ليستطيع ايهما اقناع الآخر بحجته

او بلغة ابسط، لا يوجد عالم على وجه الأرض لديه تجربة علمية او دليل علمى غير قابل للدحض يستطيع ان يثبت او ينفى به وجود الإلاه وبالتالى العلم البشرى-وهو كل ما نملك من خبرة-لا يقدر على ان يجيب هذة المسألة

الشئ الوحيد الذى يجيب هذة المسألة هو : الأيمان، نحن نؤمن بوجود الإلاه، لكننا لا نستطيع ان نقدم لهم دليلا يستند على منطق يقبلونه هم يقنعهم بوجود الإلاه(وأكرر كلمة:منطق يقبلونه هم، لأن كل ما نراه نحن منطقيا يرونه هم قابلا للضحد) وكذلك هم مقتنعون تماما بعدم وجود الإلاه لكن ما يقدمونه من منطق يدعم فكرتهم نراه نحن منطقا مغلوطا

وده هيرجعنى لسؤالك تانى يا شيكو: انت وانا شايفين ان داوكينز منطقه مغلوط، ليس لأن منطقه مغلوط ولكن لأن منطقه مبنى على ما يراه هو مسلمات فى حين نراه نحن افتراءات، والناس عندك ، وخصوصا الملحدين منهم يرون ان منطقه قوى جدا لانه فعلا بنى منطق متماسك جدا على اساس من مسلمات يؤمنون بها هم

فالمشكلة هى ان مافيش ارضية مشتركة بيننا وبين دواكينز ومن هم من نفس فكره، وعلشان كدة احنا شايفين ان تفكيره غلط، لكن فى النهاية كوكب الأرض يتسع لنا كلنا طالما ممكن نحترم بعض ونقبل بعض على اختلاف فكرنا

هد حيلى السؤال بتاعك ده يا عم شيكو، بس بصراحة انا كان نفسى فى سؤال زى ده

يبقى ان اضيف ان كتاب الفيزياء المسلية كتاب يخاطب من فى المرحلة الاعدادية فما اعلى منها وهو كتاب ممتع اكتر منه كتاب فنى جاف، يحكى عن بعض الظواهر المدهشة فى الحياه باسلوب سردى خفيف الظل، انا عند الجزء التانى منه مترجم للعربىsoft copy ، لو تحب ممكن ابعتهولى بس قول لى ابعته ازاى

المشاركة الأصلية كتبت بواسطة SE_coralsea

أود أن اشكر نور علي برنامجها الناجح و القيم الذي طالما امتعتنا به , و اتوجه بالشكر الحار الي ضيفها صاحب المعلومات الغزيرة و الغنية التي طالما اثرت عقولنا , تحية من القلب الي الضيف الكبير سبعاوي

للاسف لم استطع المشاركة بالامس حيث كنت مريض و بحالة لاتسمح لي بالنظر الي شاشة الكومبيوتر لكن الحمدلله اني لحقت اخر حاجة لسبعاوي و علي امل لقاء قريب به ان شاء الله

على فكرة الحلقة لسة مستمرة اليوم على حسب ما انا فاهم، وبالتالى انا فى انتظار اى اسئلة انت عاوز تسألها

سبعاوي باشا , معلش انا هأسأل سؤال كده علي الماشي بس مش عارف له اجابة و محيرني و مش عارف حد سأله و لا لأ بس لاني ما كنتش متابع من الاول

** ايه رأيك في أزمة المرور اللي عندنا دي ؟ و ماهي أسبابها الحقيقية ؟ و كيف يمكن حلها ؟ و ماهو دورنا نحن كمنتدي في حل هذه الازمة ؟

المشاركة الأصلية كتبت بواسطة SE_coralsea

سبعاوي باشا , معلش انا هأسأل سؤال كده علي الماشي بس مش عارف له اجابة و محيرني و مش عارف حد سأله و لا لأ بس لاني ما كنتش متابع من الاول

** ايه رأيك في أزمة المرور اللي عندنا دي ؟ و ماهي أسبابها الحقيقية ؟ و كيف يمكن حلها ؟ و ماهو دورنا نحن كمنتدي في حل هذه الازمة ؟

ازمة المرور فى بلدنا ربعها مشاريع لم تكتمل، وربعها شوية تنظيم مطلوبين من قبل الحكومة ونصها سفالة شعب اتعود انه لا سلطة للقانون عليه

المشاريع اللى انا شايف انها هتحل الكثير من ازمة المرور فى القاهرة ، وكما اقترحتها فى رسالة سابقة هى:

1- هكمل الطريق الدائرى رغم انف اليونسكو، مش هييجى حاة فى تماثيل بوذا اللى طالبان هدتها رغم انف العالم كله مش اليونسكو بس
2-هحاول احرك مشروع لانشاء قطار سطحى على غرار مترو الانفاق بطول الجزيرة الوسطى بالطريق الدائرى
3- همد مترو مصر الجديدة بتاع مصطفى النحاس لحد ما يقابل مشروع مترو الدائرى عند اكاديمية مبارك واغير عرباته بعربات حديثة
4- هعمل امتداد لنفق الأزهر تحت شارع عبد الخالق ثروت بحيث ياخد العربيات اللى جاية من الجيزة ونازلة من كوبرى اكتوبر
5- هخلى نفق الأزهر للخروج من وسط البلد فقط على ان يكون الدخول الى وسط البلد من شارع الأزهر ويتعمل اتجاه واحد ، والقانة التانية من النفق تتعمل مترو (لاحظ انه بيحتاج حارة واحدة بس رايح وحارة واحدة راجع) وبعدين المترو ده يطلع يمشى سطحى فى صلاح سالم ويدخل من السكة البيضا على الاتوستراد ويمشى فى الجزيرة الوسطى بتاعته وكل كام سنة نمد مرحلة لحد ما يوصل لمساكن شيراتون

6- هعمل كبارى على طول الاوتوستراد لتحويله الى طريق حر

اما الجزء التنظيمى فيتلخص فى عودة الاشارة الضوئية مكان اختراع اليوتيرن (ألشمبرلاح) الفاشل، وعودة رجل المرور، وظهرو الكونستابل الذى يطير بالموتوسيكل وراء السيارة المخالفة ويوقع عليها الغرامة الفورية

اما سفالة الشعب فلا حل لها سوى كرباج المخالفات الفورية على كل قائد يقود بطريقة خطرة او سيارة نقل تسير فى اليسار او ميكروباص يقود باسلوب الهبوط العمودى او قائد سيارة وصل الى التقاطع وهو فى اقصى اليسار ثم تذكر فجأه انه سيدخل يمينا وقطع الطريق على باقىالسيارات، او قائد سيارة على الدائرى شغل الحارة الثانية والثالثة وقفل الطريث كله لأن المخرج متوقف فى الحارة اليمنى