الرصيف بقى مقلب زبالة

**melkholy** · 18-09-2014 02:06 PM

السلام عليكم
عاوز اخد رأيكم في حل للمشكلة دي
جنب البيت عندي فيه سور, المشكلة أن الرصيف اللي أودامه بقى مقلب زبالة الناس بترمى أكياس الزبالة و تكسير الطوب و كل الحاجات دي ,ده غير النباشين اللي بيقطعوا أكياس الزبالة عشان ازازة حاجة سائعه ولا كراتين
و كل شوية ننضف الحتة و نجيب بتوع الزبالة يشيلوها و ننبه على البوابين محدش يرمى حاجه بس كلها كام يوم و ترجع ريما لعادتها القديمة و الزبالة ترجع و محدش عارف مين اللي بيرمى

فكرت نشترى سلك شائك و نقفل الحتة دي بس معرفش نجيبه منيين و مين بيركبه
حد يعرف المعلومة دي أو أي أفكار تانية

**bRo** · 18-09-2014 02:51 PM

روحوا للحي هاتوا كونتينر زبالة كبير وشركة النظافة تفضيه كل يوم

**melkholy** · 18-09-2014 04:31 PM

المشكلة أن فى شارع جنبنا فببة الكونتينر ده, مش عايز أقولك شكله اية, بحر من الزبالة حواليه

**ahmedwagdy03** · 18-09-2014 04:43 PM

أوعى تعمل الغلطة دى : السلك الشائك حيخلى الزبالة بدل ما تكون جنب السور حتبقى جنب السلك لإن الناس خلاص حفظت إنها ترمى الزبالة فى المكان ده و للأسف محدش عنده مخ علشان يفهم إن وجود السلك يعنى عدم إلقاء قمامة .

إنت فى مصر مش فى اليابان .

إنت زعلان على حتة جنب السور طيب إنزل إسكندرية و إمشى فى أى مكان غير الكورنيش و إنت تعرف المعنى الحقيقى لمقلب الزبالة الجبلى the Giga Rubbish Mountains و أوعدك ترجع تقول إن اللى عندك ده مجرد سلة مهملات.

**melkholy** · 18-09-2014 04:57 PM

طب و بعدين
فية ناس بتقول نحط زرع و كدة بس انا متأكد انة حيتسرق

**bRo** · 18-09-2014 05:16 PM

ممكن جملة وقحة تتكتب على السور بخط كبير
(ترمي زبالة هنا اذن انت زبالة) مثلا او اي جملة لاذعة اخرى
او ممكن كاميرا نت بعشرين جنيه تثبتها فوق السور وتكتب تحتها
(ممنوع رمي الزبالة المكان مراقب)

**Mohamed Saber** · 18-09-2014 05:40 PM

ممكن تشترك مع السكان وتجيبوا 2 أفراد أمن لفتره من 2:3 شهور ويكونوا مسلحين (عشان الناس تخاف) هتلاقى الناس بطلت ترمى وهيشوفوا مكان غيره،
كان عندى نفس الحكايه ونجيب بتوع الحى وعمال النظافه (تخيل كنا بنشيل الزباله بجرارات ونقل كبير) وبردوا منفعش ،جبنا 2 أمن الناس خافت ترمى ،ودلوقتى مفيش أمن ومحدش بيرمى حاجه

**melkholy** · 18-09-2014 08:24 PM

ﺷﻜﺮﺍ ﻳﺎ ﺟﻤﺎﻋﺔ ﻋﻠﻲ ﺍﻻﻗﺘﺮﺍﺣﺎﺕ
ﻟﻤﺎ ﺍﺷﻮﻑ ﺑﻘﻴﺖ ﺍﻟﺴﻜﺎﻥ ﺍﻓﻜﺎﺭﻫﻢ ﺍﻳﻪ ﻭﺭﺑﻨﺎ ﻳﺴﻬﻞ

**khaled_sabry** · 21-09-2014 11:08 AM

نفس الوضع الى حد ما بقى عندى فى البيت
مشكلتنا ان عمارتنا مافيهاش بواب + سكان معفنين و جلده + العماره اللى جنبنا جديده و فيها شقق كتير بتتوضب و دايما تلاقى رمل قصادهم

بالتبعيه الرمل ده بيخلى الناس ترمى زباله و اكياس بلاستيك - البواب بتاعهم الفجر بيلمها و يزقهم عندنا مع بواقى الرمل
دلوقتى بقى كل كام يوم انزل الصبح الاقى كيس زباله كبيير و القطط بتلعب فيه و تقطعه
كل ده و السكان و لا هما هنا ولو جبت عمال ينضفو الرصيف ماحدش بيرضى يدفع - ده حتى نضافه السلم الداخليه ماحدش دلقوتى بيرضى يدفع لدرجه انى احيانا بقيت انضف السلم و الرصيف انا بايدى
حاجه تقرف - و الله بجد انا دلوقتى بدور على شقه تانيه انقل فيها بسبب القرف ده

**melkholy** · 21-09-2014 11:20 AM

الساكن لما بيدفع فلوس الصيانة و لا اجرة البواب تحس انه بيقطع من لحمه :)
عل فكرة مشكلة السكان اللى مبتدفعشى دى مشكلة عند معظم الناس و الحل عمل اتحاد شاغليين و أشهاره فى الحى بكده اللى ميدفعشى الصيانة تقدر تعملة مخالفة و تصل لدرجة الحجز على الشقة