عريس مش من جهة امنية

**pioneerahmed** · 18-09-2014 06:46 PM

مشكلة حصلت معايا و انا مسافر تايلاند شهر العسل
و الى عمل الحوار دة معايا fly emirates
معاد الطيارة الساعة 8 الصبح طبعا انا رحت الساعة 6 المطار
لقيتهم في البوردينج بيقولولي حصل delay في معاد الطيارة و مش هتلحق الوصلة من دبي لبانكوك
طيب و اية الحل يا انسة ؟؟؟
استني طيارة الساعة 4 الضهر و خد الوصلة من ابو ظبي قلت اوكي و مش مدي خوانة
قلنا نفطر و نتغدي في المطار و نلفلف شوية نعمل شوبينج من السوق الحرة قال يعني واد فييس

طلعنا الساعة 4 لابو ظبي لقينا ان لسة فاضل على معاد الطيارة التانية الى هتوصلنا بانكوك 5 ساعات ترانزيت
المهم ركبنا الطيارة بعد خمس ساعات بالتمام و الكمال و وصلنا بانكوك و رحنا الفندق نبيت ليلة و بعد كدة ناخد طبارة تاني لبوكيت
لقينا ريسيبشن الفندق بيقول انتو اتاخرتو و الاوضة اتاخدت لاننا افتكرناكو مش جايين و مفيش غرف فاضية عندنا (طبعا محنا مبلغين اننا جايين الساعة 3 الظهر بس بعد دة كلة و صلنا نص الليل)
طيب نعمل اية قعدنا في لوبى الاوتيل لحد الصبح و خدنا تاكسي تاني للمطار عشان نروح بوكيت و منها على الميناء عشان ناخد باخرة تودينا جزيرة بيبي طبعا الطيارة خدت ساعتين لحد بوكيت و بعد كدة ساعة مستنيين معاد الباخرة
و اخيرا الباخرة خدت حوالى 5 ساعات عشان تودينا الجزيرة

و من الجزيرة بقي خدنا لنش بوص طويل كدة حوالى ساعة عشان الفندق في ضهر الميناء بتاع الجزيرة و الجزيرة مفيهاش اي وسيلة مواصلات
و بعد ما وصلنا الفندق انا كنت حاجز حاجة اسمها superior villa
و دي بقي تعتبر شالية بس على اعلى قمة فى الجزيرة على البحر و طبعا عشان نوصلها لازم نطلع القمة دي و بالشنط
و مراتي بقي كعادة كل المصريين كانت واخدة عزال و كل الهدوم و الله كان ناقص التليفزيون و العفش و تقولى دة احنا قاعدين 15 يوم
و شيل بقي يا عريس و اطلع القمة
طبعا هو كان في شيالين معايا من الفندق
بس اكيد في شوية رفايع كدة و شنط صغيرة انا شايلها
و الله يا جماعة طلعت نمت يومين من التعب
بصراحة كان شهر عسل جميل

و الله نفس الرحلة بتاعة فيلم عريس من جهة امنية

الي فقعلى المرارة بقي انى لما رجعت اتصلت بفلاي امارتس اعمل شكوي قالولى اة هو كان في احتمال متلحقوش الوصلة بسبب الديلاي بس الحمد لله الناس الى قررت و سافرت لحقوها و كان عندهم وقت حوالى نص ساعة و احنا ندهنا في الميكروفون عشان نبلغ ان الديلاي اتظبط بس اكيد انتو مسمعتوش
طبعا محنا كنا في السوق الحرة بنتسوق

مالها شرم الشيخ مش فاهم انا

الواحد مبيتعلمش ببلاش

**Khaled Online** · 18-09-2014 07:14 PM

حمدا لله على سلامتك ويارب تكون اتبسطت بغض النظر عن أول يومين :) ومبروووووووووك! احكيلنا بقى :)) عن الجزيرة وتايلاند مش حاجة تانية! هههه اوعى تزعل

**pioneerahmed** · 18-09-2014 07:21 PM

الله يسلمك يا خلود
و الله البلد جميلة بس عيبها حاجتين
حر جدا طول السنة لانها بلد استوائية
و الاكل هناك مش عاطفي خالص

**بحار** · 18-09-2014 07:33 PM

ياعنى لا جو حلو ولا اكل كويس .. دى عقوبه بقه مش شهر عسل !!!
عموما مبروك .

**Adnfalcon** · 18-09-2014 07:59 PM

نصيحه لأي عريس جديد ناوي علي شهر عسل ف أسيا
بلاش تايلاند . . ماليزيا الأفضل

**pioneerahmed** · 18-09-2014 08:06 PM

معرفش اية ظروف الجو في ماليزيا
بس الى اعرفة ان الاكل وحش بردو

بس عامة عندهم فواكة غريبة كدة بس تحفة
حتي الفواكة الى عندنا . عندهم طعمها حاجة تانية في منتهي الجمال
انا كنت مقضيها فاكهة