الموضوع: تقرير الى كل مقبل على ترخيص الزيرو & ترخيصى للفلوانس 2015 يارب يفيدكم

بسم الله الرحمن الرحيم

في البدايه احب ارحب بأحلى جروب و احلى اسره اسره رينو

ودا تقرير بسيط لمحاوله لأفاده المقبلين على ترخيص الزيرو يعنى بنحاول نساعد :)

اول يوم : ( ملحوظه دا مرور طنطا الغربيه )

الحمد لله استلمت ورق العربيه و رحت سحبت ورقه فحص وورقه طفايه من المرور و طلعت على مكان الفحص ..

رحت للمهندس بعت معايا واحد اخد البصمه بتاعت المتور الشاسيه

الصراحه انا كنت مصدوم من التعامل المحترم لأول مره في حياتى و السهوله مع العلم انى نازل رايح الفحص الساعه 11 ظهرا يمكن العربيه ليها تأثير برضو :)

المهم اخد البصمه و واخد المهندس الورق وكتب فيه كل البيانات وانا وضحتله موضوع الستاير بص في شهاده البيانات بتاعت العربيه الى جت مع الورق من المعرض
قالى هي مش واضحه بس انا هكتبهالك مفيش مشكله :)

المهم رحت بالطفايه القديمه في مكان الفحص علشان اختم الورقه و امضيها خلصتها تمام بالرغم ان الطفايه محتاجه تجديد بس محدش علق خالص وختم وتمام

رحت للمرور عملت تأمين على العربيه الى هو الاجبارى لمده 3 سنين دفعت مبلغ 360 جنيه

لحد هنا اليوم الأول عندى خلص لانى كنت نازل متأخر

اليوم الثانى :

الحمد لله انا خلصت انهاردا تانى خطوه من الترخيص و هي انى رحت الصبح معايا ورقى
( ورق العربيه كامل الى استلمته من المعرض + شهاده التأمين الاجبارى + ورق الفحص + إيصال الطفايه + نموذج 351 + طابع شرطه + 3 صوره بطاقه + دوسيه اصفر علشان الورق )

نموذج 351 لمده 3 سنين ب 8 ج تقريبا
طابع شرطه مده 3 سنين ب 12 ج تقريبا

دى كل الأوراق المطلوبه اخدتها وقدمتها على الشباك بعدها عملى ورقه او إيصال بالضريبه الى المفروض تندفع و اوعى تنسى تمضي الورقه دى من المراجع قبل ما تطلع الخزنه وانا كنت عامل الرخصه 3 سنين دفعت مبلغ 715 ج بالظبط

طلعت دفعت في الخزنه اخدت وصل الخزنه سلمته لنفس الشباك الى سلمت فيه الملف بتاعى وقالى اعدى عليه بكره الساعه 11

بس انا مستحملتش الصراحه انى اخد يوم تانى في نفس الموال دفعت لوحد هناك 50 ج علشان يزق الورق بتاعى لحد الكمبيوتر بسرعه شويه .

فعلا كلمنى على الساعه 11 قالى ان كله تمام ورقك خلص

المهم الورقه خلص والرخصه طلعت الحمد لله بس مستلمتهاش في ساعتها

ادالى وصل بأستيلام اللوحات المعدنيه بالرقم الجديد

رجعت على الفحص و هناك لقيت واحد بيكتب النمر و بيعملها الدمغه و اخد إيصال الاستيلام وعملى عليه بصمه سريعه وادانى النمر ودفعت 30 ج

اخدت النمر و الايصال الى كان معايا بعد ما عملى بصمه النمره عليه ورجعت تانى المرور

الموظف قالى اطلع لشباك النمر الى هنا في المرور و اثبت النمره الجديده عنده بالأيصال الى معالك الى عليه البصمه
طلعت اثبت ان الرقم دا بتاعى في مكتب الوحات و اخد منى نسخه من الوصل و النسخه التانيه ختمها وقالى انزل استلم الرخصه

ونزلت والحمد لله استلمتها و كان يوم ابن تييييييت اوى لانى حسيت اننا لسه قدمنا كتييييير اوى اوى على ما ينصلح حال البلد :) والحمد لله تم اثبات الشمسات الخلفيه والجانبيه على الرخصه

أتمنى انى أكون قدرت افيد أي حد بيرخص جديد وربنا يوفقكم :)

اخوكم ايمن عامر