الموضوع: أخيــراً روحــت لــ عفشـــجي عشان اطمن على كــوكــي

بسم الله الرحمن الرحيم

فى البدايه احب اعيد على كل رجاله المنتدى واخص بالذكر عصابه الاوبل ، كل سنــه وانتم جميعاً طيبين وربنا يجعله عيد سعيد عليكم وابقو افتكرونى ف لحمه الخروف

ندخل بقـا ف الموضوع

النهــارده الصبــح كان نص يــوم شغل فقلت اخد كوكى ( العربيه يعنى ) لاى عفشجى يكشفلى على العفشه لانى بقالى فتره مش مريحانى وبحس باقل مطب وناشفه بغباااء

وطبعاً دى كانت اول مره ليا اودى كــوكــي لعفشجى من ساعه ما اشتريتها من شهر يناير تقريباً ، وللأسف معرفش عفشجى ثقه ، فسألت كتير وكل واحد يوصفلى واحد شكل ، فقلت اروح لاقرب واحد من بيتى واسمع منه مش هخسر حاجه وكدا كدا مش ناوى افتح شغل كتير فيها

وكنت بشتكى من الاتــي : صوت صوصوه من العجله الشمال سعات ف المشى الطوالى وطبعاً بتبان اوى فى الطرق المكسره ، صوت تخبيط فى الطرق المكسره والمطبات وكأن العفشه مفككه ، المطبات كنت بحس بيها كلها ف الدريكسيون ، واكتر حاجه كانت بتضايقنى المراجيح اللى كنت بحس بيها لما اعدى على طريق متكسر

المهــم الراجل سمع منى وقالى تعالى نجربها وركب العربيه وانا جمبه ، وفحت العربيه جرى ومطبات وحفر وطرق متكسره واللى غاظنى انه كان بيتعمد ياكل الحفر والمطبات

رجعنا الورشه قلتله انت شاكك ف ايه ، قالى جلب المقصات ، بس الاول انا هكشفلك ع العفشه كلها واقولك اللى فيها

رفــع العربيه من قدام وفك العجلتين ، اولى شىء لاحظ ان العجله الشمال سايبه خالص ، فقام ربــط على البليه شويه والصوت راح والعجله مسكت نفسها ، وبالكشف على جلب المقصات لقاها سليمه ، بس لاحظ ان كاوتش الميزان متقطع فقام مغير الاتنين بكاوتشه من عنده ودا شكلها


صـــــوره قريبــه من على جوجل

كمل كشف على العفشه ، المساعد قالى كويس ، الكبالن شكلها كويس برضه ، الاسكاترا قعد يكشف عليها ولقاها جايبه زيت بس الزيت مش بينقص ف القربه ، وقالى دا اوليسه حاجه بسيطه متخفش تتعمل ومش هتضرب تانى ومش محتاجه اسكاترا جديده

قالى برضه ان العربيه من قدام محتاجه صدادات للمساعد عشان تحميه لانى لما باكل حفر المساعد بيقفل لحد الاخر ودا غلط وهيبوظه ، قلتله هتأثر على الثبات ، قالى لا دى مش بتعلى العربيه ولا بتأثر على الثبات متقلقش

المهــم قعد يربط العفشه كلها وراجع على كل المسامير وبعدين طلع هو يجرب العربيه ومشى فى شوارع متكسره واتعمد تاااانى ياكل بيها مطبات

وبعدين قالى تعالى جرب انت ، ركبتها ومشيت بيها ، طبعاً مجاليش قلب اكل المطبات على سرعه زى ما كان بيعمل ( خاصه انى متعود اكون حنين اوى ع العفشه ف المطبات ) بس لاحظت ان العفشه مسكت نفسها عن الاول ، بقت ناعمه شويه ، المراجيح راحت خااااالص الحمد لله ، صوت التخبيط راح ، صوت الصوصوه والخشونه اللى كان ف العجله الشمال راح ، احساسى بالمطبات قل بس لسه برضه بحس بالمطبات فى الدريكسيون بس على خفيف

رجعنا على الورشه ، شيكلى تانى عليها وركبلى الطاسات وقالى دلوقتى بالكشف الظاهرى العفشه تمام بس عشان نعرف سبب احساسك بالمطب الخفيف دا فى الدريكسيون يبقى لازم نحل العفشه قدام ونكشف على البيض كله ( قال اسامى كدا نسيتها الصراحه ) وعلى علبه الدريكسيون والبايظ نصلحه ونظبط العفشه كالزيرو ، اعمل حسابك وابقى تعالالى ف يوم من بدرى ونحل ونشوف

المهم ، طب الحساب ايه ، الراجل قالى 40 جنيه ( مصنعيه و 2 كاوتش ميزان ) ، بصراحه ذوقه وطوله باله واحترامه معايا خلانى مفاصلش

خلصت مع العفشجى وجريت على البنزينه فولت كوكى وروحت وركنتها وغطيتها

معلشى طولت عليكم انا عارف انى رغاى بس حبيت اشاركم التجربه كامله

ويا ريت كل واحد يقولى راييه ف اللى حصل ، والمصنعيه كويسه ولا انضحك عليا فيها عشان ابقى عارف بعد كدا

وبالنسبه لانى بحس بالمطبات فى الدريكسيون ايه السبب ؟!! وكمان فى حاجه انا بلاحظها بس نسيت اسأله ، انى لما بعدى على طريق متكسر جامد الدريكسيون ممكن يتحرك لوحده يمين وشمال ، فدا ايه سببه !!! وحوار الصدادات دا ايه نظااامه !!

وشكراً ليكم مقدمــــاً ، تقبلـــوا مرورى ،،

المشاركة الأصلية كتبت بواسطة ayman hamdy

مصنعية كويسة وشغل كويس وشكرا على نقل التجربة
تقبل تحياتى

شكراً لمرورك استاذ ايمــن ، نـــورت الموضوع ،،

ممكن صليبه دركسيون وتقدر تكشف عليه بنفسك حترجع الكورسي ورا وتغطس في الدواسه بضهرك ايد علي الطاره وايد علي الصليبه لو فيها بوش بيظهر وممكن بارات دركسيون مبوشه

المشاركة الأصلية كتبت بواسطة hagagatc

ممكن صليبه دركسيون وتقدر تكشف عليه بنفسك حترجع الكورسي ورا وتغطس في الدواسه بضهرك ايد علي الطاره وايد علي الصليبه لو فيها بوش بيظهر وممكن بارات دركسيون مبوشه

ان شاء الله ناوى افك العفشه واكشف على الصليبه والبارات عشان ارتاح من الترزيع اللى بحس بيه ف ايدى

مع انى لما ابقى راكب جمب السواق ف عربيتى لا بحس بالمطبات ولا الهوا والخبط دا مش بيحس بيه غير اللى ماسك الطاره

شكراً على الافاده ،،

المشاركة الأصلية كتبت بواسطة a.sattar

كل سنة وانت وكل الأعضاء بخير ومبروك علي الصيانة
بس كنت حابب اعرف العفشجي ده وعنوانه وتليفونه عشان عايز اشيك علي العفشة

وانت طيب وبالف صحه وسلامه ، العفشجى اللى روحتله فى طنطا ، لو حضرتك من مكان قريب تعالى وانا اوديك لحد عنده ، اما لو حضرتك من القاهره ، فالاخوه الافاضل هيقدروا يفيدوك اكتر منى وينصحوك باقرب عفشجى كويس لمكان سكنك

تحيــــاتى لحضرتك ،،