الموضوع: دعوة صلح ومحبة من وحووووش الرينو الي ابو عبد الله !!

المشاركة الأصلية كتبت بواسطة عمرو عمارة

السلام عليكم

كلمة حق والله مش أكتر.....:

يا جماعة أنا من أشد الناس الي معترضين مع أراء ووجهات نظر أخي أبو عبدالله....مع إن كل إعتراضاته كانت مبنية على الكليو..... ولكن لم ولن في أي مشاركة أخطاء في شخصيه وتصبح المناقشة بهذه المهذلة التي تسمونها مناقشة حرة!!!؟؟....

والله يا جماعة عمر ما ده كان إسلوب في المناقشة.....أنا حاسس إن إحنا لو قاعدين مع بعض هانقوم نمسك في بعض عشان مختلفين في وجهات النظر....ما كل واحد يقول الي هو عايزه....ليه لما واحد بيقول العربية الي إنت راكبها دي تعبانة بتعتبر دي إهانة لشخصك وتقعد تدافع عن العربية زي ما يكون مافيش غيرها في الدنيا؟؟!!
خدو بالكو طريقة الرد الغير لائقة دي إحنا الي بداءنا بيها!!....يعني مثلاً أبو عبدالله قال حاجة مش عجبة أحد مالكي رينو....يقوم رادد بطريقة غير لائقة بالمرة......أخي human12 مع إحترامي الشديد لك وما تزعلش مني بس ردك الأخير على أبو عبدالله فيه شىء من الإهانة ممكن إنت متحسش بيه....بس ممكن ردك ده يجرحه......أيضاً أيمن حبيبي ردك على أبو عبدالله غير لطيف وفيه شيء من القسوة......أخي العزيز هاني محمد الموضوع مش مستاهل كل القهر وسم البدن الي حضرتك ذكرته وزي ما إنت قولت عشان إيه ده كله!!!؟؟؟....وأخيراً أخي العزيز أحمد عبد المقصود.....يا باشا ده أنا قولت عليك في أول لقاء لنا إن إنت عاقل ورزين وكلامك موزون....فميبأش ده إسلوب ردك عالطول مع أبو عبدالله

طيب لو أبو عبدالله شكر في الرينو....تفتكروا ده هيأثر علي الناس في شراء الرينو؟؟؟ ولو العكس هل ده برده هيأثر؟؟....ما أنا قبل ما أشتري الكليو شوفت كل مشاركاته وإحترمتها وده ما قللش إقتناعي بشرائها إطلاقاً

يا جماعة أرجوكم ما تزعلوش مني بس هي دي الحقيقة وأنا شايف إن إحنا لازم كلنا نعتذر لأخينا أبو عبدالله ومايكونش هو ده إسلوب الحوار المتبع....اه نرد على المفاهيم الخاطئة ولو فيه إصرار فده شىء يخصه والي بيخش يقراء أي موضوع أكيد هيميز

أنا شخصياً بعتذرلك يا أبو عبدالله على كل ما صدر من ردود غير لائقة من الإخوة وبقولهالك بالفوم الملياااااااان عربيتي الجاية هاتكون ميجااااااااااان إن شاء الرحمن

بحبكم كلكم في الله

يالله عليك يا بشمهندس عمرو بجد

انا بجد شديد الحرج من ذوقك وادبك بجد

وفعلا خير الأخ المسلم لأخيه
وكما قال رسول الله صلى الله عليه وسلم
انصر اخاك ظالما او مظلوما

ودي شجاعه ارفعها وسام لك بجد
وعلشان كده انا لن ارد على اي تعليق قادم لأي احد
ومش محتاج حد يعتذر لي لأن الكل اخواني ومش بزعل من شخص احد
ولكن ممكن اللي يزعل فعلا انك تبقى بتتكلم في شئ تلاقي الردود بتخليك ترد في ناحيه اخرى تانيه خالص وتطلع انت اللي غلطان
يعني المفروض تسمع الكلام ومتعلقشي عليه

و كلامك ده كفاية لوحده نصره لما احسست به هنا

ولن اوفيك قدرك بجد بكل كلمات الشكر
شكرا لك يا خير اخ

الله يفتح عليك يا عمرو انت راجل بجد والله محترم وزي ما عهدناك راجل تمتاز بالخلق الكريم والاتزان الشديد وبجد والله العظيم مهما قلت فيك مش هاوفيك ربع حقك .

الحمد لله انا بجد مرتاح جداً ان الموضوع انتهى الى هنا بدون خسائر تذكر ولو اني كنت حاطط ايدي على قلبي زي مابيقولوا في معظم مواضيع الجدل اللي زي دي وعارف ان مصيرها دايما في الآخر (الاداره - لجنة فض النزاع ) وكنت بادعي ربنا مانوصلش لكده والحمد لله لغاية دلوقتي الامور ماشيه في نصابها .

ابو عبدالله في النهايه برضه مع اني لم اجادل معه كثيراً الا اني اكن ليه كل احترام وشهدت ليه بحسن خلقه في موضوع آخر وأكدت ليه ان اي انفعال بيحصل من اي اخ كريم لنا هنا فابيكون غير مقصود ابداً قد تصل الصوره مختلفه بعض الشيء نتيجة ابداء رأي مش مشكلته ان مخالف ابداً لرأي آخر ولكن مشكلته توقيته ....زي بالظبط ما اخونا المحترم ليمو وضح في مداخلته بالظبط جزاه الله خير وعموماً يا ابوعبدالله للمره المليون انت راجل مخضرم في نايل موتورز أولاً ثانياً لا يختلف اتنين عن احترامك في المناقشات الطويله دي وزي ما عمرو باشا جزاه الله خير قال لم يصدر عنك اي سلوك خارج او كلمه ودي حاجه كلنا نشهد لك بيها ويا رب تكون انت شايف اعضاء القسم ده برضه ناس محترمه وعلى خلق وتحبهم في الله حتى لو اختلفت معهم في رأي او نقطه .

كلمه اخيره في حق وحوش الرينو برضه مع ان شهادتي مجروحه لئني ان شاء الله واحد منهم لو يسمحوا ليه بهذا الشرف.بجد المنتدى هنا اجتمع فيه ناس اقل ما يقال عليهم انهم غايه في الاحترام والاتزان وبجد خوفي وقلقي من مواضيع الجدل دي مش عدم ثقه في اخلاقنا على الاطلاق انما قلق من العصبيه والخروج عن الشعور لئن في النهايه الخسران هو المنتدى متمثلاً في اعضاءه طبعاً اللي هو احنا . هانخسر معرفة بعض . هانخسر مكان بجد محبب الى قلبي وقلب كل من دخله. هانخسر اللمه الحلوه ( التجمع ). هانخسر روح الود والوفاق اللي موجوده. هانخسر روح المساعده اللي بجد افتقدناها كتيييييييييييير خارج المكان المحترم ده . يا جماعه انا لا ابالغ والله في الكلمه دي ... من شهور قبل اتصالي بالمكان ده ومعرفة الناس الجميله اللي هنا كنت اوقات اقلق لئني فعلاً خبرتي لن ادعي انها كبيره في المواضيع دي (ميكانيكا واعطال وكلام من ده ). دلوقتي متخيلين قد ايه الواحد متأمن بوجود اخواته الرينوهاويين والميجانويين بالأخص و باقي الاعضاء المحترمين في باقي المنتدى حواليه كده ؟ بجد شيء لا يوصف بالكلام ابداً حاجه كده بنسميها ( عزوه ) والله ده اللي حاصل وربنا يديمها نعمه .مش عاوزين نخسر ده ابداً ان شاء الله وتظل روح التعاون والاحترام والمحبه موجوده بيننا كده دايما ان شاء الله .

المشاركة الأصلية كتبت بواسطة Ramy_Tantawi

... من شهور قبل اتصالي بالمكان ده ومعرفة الناس الجميله اللي هنا كنت اوقات اقلق لئني فعلاً خبرتي لن ادعي انها كبيره في المواضيع دي (ميكانيكا واعطال وكلام من ده ). دلوقتي متخيلين قد ايه الواحد متأمن بوجود اخواته الرينوهاويين والميجانويين بالأخص و باقي الاعضاء المحترمين في باقي المنتدى حواليه كده ؟ بجد شيء لا يوصف بالكلام ابداً حاجه كده بنسميها ( عزوه ) والله ده اللي حاصل وربنا يديمها نعمه .مش عاوزين نخسر ده ابداً ان شاء الله وتظل روح التعاون والاحترام والمحبه موجوده بيننا كده دايما ان شاء الله .

ياه يا رامى ايه الكلام الحلو ده
ده نفس احساسى حاسس انى لو اتزنقت فى حاجه و عايز اجابه تريحنى و تكون امينه ان فيه ناس هنا هتكون عون و سند من غير مايعرفونى
بجد ربنا يكرمكو و زى ماقال رامى كان ممكم يحصل خساير والله يعلم انا كنت ماسك نفسى اد ايه و افتكرت المثل بتاع بتدل م اتتعاركو ازرعوا الورود و اديت للأخ ابو عبدالله ورده اهى برضه احسن من كلمه الواحد يقولها و هو متنرفز

ابو عبدالله الغالي :

بالنيابة عن وحوووووش الرينو اقدملك دعوة حضور لقاءنا القادم

فرصة نتشرف بيك ... وتشوف الوحووووش عن مقربة ... وتجرب عن كثب

الديوووووك الفرنسية.

دعوة لتهدئة النفوس ... وبث روح التعاون من جديد في منتدنا.... بعيد عن اي اراء ووجهات نظر...

دعوة حب ليك مخصوص يا بوعبدالله ولو سمحت مترفضهاش.