رحت امبارح عملت تست درايف للاتراج الاوتوماتيك اول فئه وقلت انقل لكم انطباعي السريع عنها

العربيه عاليه عن الارض بشكل مرضي جدا ووضعية القياده مريحه والتابلوه منظم وبسيط وفقير نوعا ما نظرا لان اول فئه والكاسيت فيها عادي single din
لاحظت ان مفيهاش زر start engine ولا زر فتح الباب الكهربائي زي الموجود في العربيات بره ومسؤل المبيعات بيقول علشان خفض التكلفه
دورت العربيه وانطلقت صوت الموتور مسموع الى حد كبير وليست هادئه كما كنت اتوقع ومسئول البيع قالي فعلا صوتها عالي عن الطبيعي وانها محتاجه صيانه قلت في نفسي جائز

وانا طالع من المعرض لفيت الدركسيون وطلعت على طول رغم ضيق الشارع ودي ميزه كويسه قطر دوران الاتراج صغير وممتاز جدا
انا اول مره اسوق فتيس cvvt فلاحظت ان تقريبا رينج سرعة دوران المحرك تتغير بشكل بسيط عموما هو احسااس جديد ومحتاج انك تتعود عليه تسارع العربيه كويس جدا ولكن ليس تسارع عنيف ( بالمقارنه بالويرا 1500 اللي معايا مثلا ) لكن باعتبار انها 1200 على فتيس اوتوماتيك فاعتقد انه مش مطلوب اكتر من كده

هواء المكيف كويس جدا في البروده بس الجو مكنش حر قوي علشان نقدر نحكم لكن بودته واضح انها كويسه وتأثيره على الموتور قليل جدا محتاج تركيز علشان تقدر تحس بتأثيره على قدرة المحرك

الباور ستيرنج ناعم اوي اعتقد انه باور كهربائي ومساحة الشنطه الخلفيه كبيره والكنبه الخلفيه واسعه ممكن نقول ان صالونها اصغر من اليارس بحاجه بسيطه اوي
وده تقييمي السريع ليها لانه كان مجرد تيست درايف في وقت قصير
عموما انا متوقع مبيعات كبيره للاتراج بسبب ميزاتها الاقتصاديه وقيمتها مقابل سعرها وننتظر تقييم لمنافستها ال اي 10 جراند سيدان لكي تتضح الرؤيه اكتر