الموضوع: تجربتي مع الفتيس dsg

النهارده ناوي انقل تجربتي عن الفتيس dsg وارد حاجه من جمايل المنتدي العظيم ده وانا عايش في سلطنه عمان احنا اشترينا جيتا 2011 dsg 7
اولا اول ما جبنا العربيه وكانت في 600 كيلو واتصل التوكيلو بوالدي قالوله هنغير الفتيس ده وهنحط فتيس جديد عشان فيه عيوب اللي عندكم والمهم طبعا وافقنا عشان منلبسش في العربيه و قعدت عندهم العربيه يجي عشرين يوم و اول طبعا ما اخدنا العربيه كان مفيش نتشه او هبده بس بعد اسبوع بدأنا نحس بنتشه لما نضرب فرامل و دايما بتحصل في التاني و رحنا ودينا العربيه التوكيل وقالونا عادي جدا و قالولنا هنبعت تقرير لالمانيا ( هجس) ..... احنا اخدنا العربيه علي عمانا و منعرفش اي حاجه عن عيوبها وبدأت ابحث عن ايه سبب النتشه و هل فيه عيوب في الجيربوكس ده و اتفاجئت بالناس بتشتكي منه بالاخص اللي في مصر واللي مغير فتيس علي 6 الاف و غيره بعديها علي 20 الف ... طبعا انا مكنتش مصدق لاني عارف فولكس عمرها ما تعمل حاجه معيوبه لان احنا مجربين جولف 4 و اسكودا a4 وكانو كويسين جدا و بسبب العربيتين دول خلانا نشتري الجيتا واحنا مطمنين!! و بدأت اعرف ايه اسباب انه بيبوظ واللي عرفته ان الكلتشات بتبوظ بسرعه وحلها انك تسوق علي مانويل و طبعا ده حل غير مريح لوالدي لانه اصلا مش بيطيق المانويل و لقيت انك لازم في الاشاره تجيب الفتيس علي n و ان وحده ميكاترونكس بتبوظ ... انا كنت عارف ان s مود اللي فيها بيأخر النقلات و طبعا اهم حاجه ان النقله تتأخر و من هنا والدي بقي بيسوقها علي s مود دايما مع ان هناك الزحمه مش قد كده بس برضو بنسوقها علي s مود لان الفتيس بينقل بسرعه جدا يعني ممكن تكون ماشي علي سرعه 70 وتلاقي العربيه علي النقله السابعه فكده بتهلك الكلتشات ....... احنا سافرنا بالعربيه مصر من سنتين مسافه 3400 كيلو وكانت العربيه ماشيه 45 الف كيلو وكنا لسه عاملين صيانه في التوكيل واحنا في طريقنا في السعوديه في حتة اسمها تبوك وكلها صحرا المهم لقينا محطه بنزين وفولنا و ريحنا العربيه نص ساعه ولما جينا نجبها علي d ابدا العربيه مش عاوزه تتحرك لما تجيبه s تقوم متحركه العربيه وبعد عشرين كيلو بعد قلق وخوف قفلنا العربيه وفتحناها لقينا d اشتغل و الفتيس قشطه مفهوش حاجه و وصلنا مصر وكله تمام و لما وصلنا مصر كنا بنطلع بالعربيه عادي جدا و بعد عشرين يوم في مصر وكنا مسافرين جيزه لزياره الاهرامات D: قام الفتيس علق علي النقله الرابعه بس العربيه كانت علي s و العربيه ابدا مش راضيه تجيب الخامس طبعا هدينا السرعه جابت التالت وبعد كده زودنا برضو مش راضيه تجيب العربيه الرابع بدرجه ان الار بي ام وصل لريد زون ومرضتش تنقل في الاخر راكنه و قفلنا وفتحنا راحت اشتغلت خلاص بقي عرفنا سر الخلطه D: بعد ما قضينا اجازه شهرين ونص في مصر ورجعنا بالعربيه سلطنه عمان كانت العربيه وقتها وصلت ل 57 الف كيلو واتبقي علي الصيانه تلات الاف كيلو و بدأنا علي 59 الف نحس برجه خفيفه في الطلعه و قولنا لما تيجي صيانه 60 الف نودي العربيه ونشوف ايه السبب ولما رحنا هناك قالونا دي الكلتشات عاوزه تتغير و طبعا سبنلهم العربيه لمده 8 ايام ( خدمه مقرفه) ... غيرو الكلتشات و الامور اتظبطت و الحمدلله الان العربيه عامله بالظبط 113 الف بدون مشاكل وتم تغيير الكلتشات علي 60 الف فقط
هذكرلكم عيوب الفتيس ده:
١- نتشه او هبده بتحصل بالاخص لما تعمل تسارع وتيجي تضرب فرامل وبتحصل دايما في النقله التانيه والنتشه مش بتحصل دايما
٢- بتنقل بسرعه جدا جدا يعني لو ماشي سواقه عاديه وهاديه هتلاقي العربيه علي نقله الخامس وانت علي سرعه 50 كم/س
٣- اصوات غريبه زي شخلله كده و دي تلاحظها لما تكون فاتح الشباك او قفله وبتحصل لما تكون ماشي براحه وتضرب سنه فرامل عشان مطب او بتمشي عادي وبتنقل لنقله اعلي وبتظهر في سرعه التاني والتالت لما تكون ماشي براحه ومش بتظهر دايما
٤- الكلتشات اللي بتتغير كل خمسين او ستين الف حسب استخدامك

بعض مميزات dsg7
١- تسارع ممتاز
٢- مش بيتغير زيت الفتيس
٣- لما تحب العربيه تكون بقوه اعلي من قوتها بمراحل جيب s مود وهتشد مع اجدعها عربيه حتي لو 2000cc برضو مش هتحرجك لان العربيه بتبقي مجنونه بجد بتقلب لوحش
٤- سلاسه النقلات

معلش لو فيه خطأ في الكتابه وانا عامل التقرير بدون انحياز و معلش بقي فيه حاجات نسيتها لان العربية بقالها اربع سنين هفتكر ايه ولا ايه D: