الموضوع: عشان تهاجر بره مصر لازم تفكر بره الصندوق

يعني مش تقول انا عايز اسافر امريكا مثلا ... ليه ؟ عشان اسعار المعيشه هناك غاليه و الامريكيين نفسهم بيتفحتو في الشغل و الضرايب بالعبيط ... ده اصلا لو عرفت تسافر هناك و تلاقي شغل ... طلبات الهجره لامريكا كتيره ... فرصتك هتبقي ضعيفه للسفر و اضعف لايجاد عمل مناسب او عمل مشروع


متفكرش تهاجر دوله انت مش بتتقن لغتها قبل ما تسافر من مصر ... الانجليزي مش هيسعفك في الدول اللي مش بيتكلموا فيها انجليزي ... يعني مثلا لو رايح المانيا يبقي تكون بتتقن الماني و انت لسه في مصر و اتعاملت مع المانيين و اخدت كورسات محترمه


قبل ما تفكر تسافر ... فكر هتشتغل ايه هناك اصلا ... نازل علي شغل معين ؟ تمام بس احسبها بالورقه و القلم ... المرتب هيكفيك الشهر و لا لأ ... هيتخصم من مرتبك ضرايب قد ايه ... في فرصه تترقي و لا لأ ... نازل تعمل مشروع ؟ تمام بس اعمل دراسه جدوي محترمه قبل ما تسافر من مصر عشان متضيعش شقي عمرك علي الفاضي ... لو نازل تتدور علي شغل يبقي خليك في مصر احسن ... الا اذا كان معاك شهاده علميه نضيفه و معاك فلوس كتير عشان لو فشلت في ايجاد عمل مناسب مش مهم القرشين اللي طاروا في السفريه


خلي مصدر معلوماتك هو السفاره فقط ... سيبك من مواقع النت و الفتي اللي بتسمعه من صحابك ... اكسر تنيه بنطلونك و روح السفاره و اسألهم عن اللي انت عايزه ... الملحق الثقافي بتاعهم هيكون عنده الاجابات الكافيه لاسئلتك بس ابقي احجز معاد الاول

المشاركة الأصلية كتبت بواسطة zorg

جربت تروح سفارة وتقابل حد وتتكلم معاه؟

و الله نفسي اروح سفاره تنزانيا و اتكلم مع الملحق الثقافي بتاعهم بس للاسف عايش بره القاهره و مش عندي وقت اروح هناك خالص:(

السؤال التانى لو انتا هتروح تعمل على سبيل المثال مشروع انتاجى هتعمل له دراسة جدوى ازاى يعنى هتحدد ازاى اذا كان منتجكك هيعجب الناس هناك وهيتماشى مع ثقافتهم ولا ثقافتهم هتنبذوا او هتبيع قد ايه الخ

انا لا افهم شئ في المشاريع التجاريه ... اللي اعرفه هو المشاريع الخدميه زي ستوديو تصوير مثلا :)