الموضوع: يا جماعه الستات والبنات مشكلة السواقه

المشاركة الأصلية كتبت بواسطة دموع الثلج

اسمحلى انا اللى اقولك بصراحه اكثر

انتم فتحتوا موضوع ظريف ولطيف عشان يكون مرتع لكل واحد مخنوق من سواقه الستات يقول اللى فى نفسه

طب ما تشوفوا اخطائكم انتم يا رجاله

لو فكرت فى اخطاء البنات غالبا هتلاقيه سواقه بحذر وهدوء فى سواقتها

هو ده بقى العيب الفظيع اللى مجننكم

طيب يلا لو سابوا لكم الشارع ورونى بقى هتحلوا ازمه المرور فى مصر ازاى ان شاء الله ورونا حوادث الميكروباصات اللى كل يوم هل سببها ستات برضوا
ولا همجيه سواقين النقل برضوا سببها ستات
ولا بلطجيه بتوع التوكتوك برضوا وراها سواقه ستات
يعنى سبتوا سبب الكوارث كلها والسواقين اللى مغلبين الكل فى الشارع ومسكتوا فى سواقه الستات والبنات ...

وبعدين يعنى الكل فرحان بسواقه البلطجه اللى يعرفها الشباب والاغلبيه الان تحت مسمى غرز

ده شى اسمه استهتار باروح البشر واهمال وعدم مسئوليه من الشباب

وبالنسبه للى بيعدوا الشارع ده سلوك عام يا سيدى الفاضل

البروووووووووود المتناهى فى الجميع ويا سخافتهم بئه

لما تلاقى شحط بيعدى قدامك بكل برود وكانك واجب عليك تنزل تشيله تركنه جمب الحيط الاول عشان تمشى بعربيتك وخصوصا لو الشخص الظريف ده شاف اللى سايقه العربيه بنت ينزل عليه عته منغولى ويستعرض جمال خطوته قدام العربيه

وبرضوا فيه بنات بتعمل كده يعنى المجتمع كله دى لا مبالاءه وحاله عامه من الجميع محدش يقولى بنات وستات

وطبعا ناهيك عن موضوع الغرز ده حركه مستفزه لابعد الحدود ده اسفه على الكلمه اسلوب همجى فى القياده

وصاحب الموضوع مضايق وزعلان عشان مش بيعرف يعمل غرز من البنات فعلا مششكله عويصه
اتمنى محدش يزعل من كلامى
وليس دفاعا عن سواقه الستات انا نفسى مش بحب امشى وراء واحده ست

+10000000000000000000000

مية مية عليكي يا دودو

للأسف الموضوع هيتحول لهجوم من الجنسين على بعض

مع العلم بان الراجل زي ما بوسي فاضل ذكرت أعصابه قوية والست أو البنت يعني ربنا خلقها مرهفة الاحساس ودي طبيعتها ..
ويمكن ده الي بيخلي الراجل متفوق عن الستات في القيادة
بس انا عايز الكل يبص للموضوع من وجهة نظر تانيه خالص يعني لف وارجع تاني وتعالى معايا كده وبص على كلامي ده ونرد على شوية أسئلة :

أسئلة للرجال :
*فاكر أول ما اتعلمت سواقة وكنت خايف تجري وتمشي بسرعه وبعدين ربنا وفقك وجبت تالت ؟؟؟؟

.. وعلى فكره انا واحد من الناس دي .. المغزى ان الكل اول ما بيتعلم بيكون خايف وقلقان لايغلط غلط فظيع .. وطبيعي قلق المرة أكتر من الرجل .. ودي مشكلة في حد ذاتها ..

** محصلكش مرة وعربيتك فيها عطل ومش بتسحب وانت ماشي وكل العربيات الي وراك بتزمر لك وانت مخنوق عشان مش فاهمين ده ؟؟؟

(وجهة نظر مش اكتر)
مع العلم اني لما بلاقي واحده سايقه لو حتى على 10 كم / ساعه وماسكه اليمين هي حرة .. بس طبعااااااا بتخنق من الي ماسك شمال وماشي بطئئئئئ بصرف النظر عن جنسه ..

الخلاصة عاملوا الناس كما تحبوا ان تعاملوا والموضوع هيبقى بسيط
يعني نحاول نتأقلم والموضوع موضوع وقت والستات فيه منهم بيسوقوا كويس جداااا
وفي النهاية (أنا رأيي) ان الست تسوق عند الضرورة فقططططططططط ..


أسئلة للبنات :

*ليه لما حد بيحترم انك لسه بتتعلمي او ماشية على مهلك ويبصلك ويبتسم .. يطلع بيعاكس وينال من الكلام المعسول جانب ؟؟؟

** ليه بتكوني ماشية بطئ وماسكه شمال ؟؟
*** ليه تعرضي نفسك لكلام بايخ وغرز من الي بتكرهيها وشباب رخم من غير ضرورة؟؟ (انا بتكلم عن الي عايزه عربية وبس يعني ليها اخ او اب او اي وسيلة تقضي ليها المشاوير بتاعتها) لكن غير كده طبعااا ليها عذرها

اعذروني ع الاطالة
تحياتي للجميع

لى تعليق على موضوع الغرز

زمان السواق-اللى ادانى حصتين سواقة لا غير قبل ما اخويا يطفشه علشان معرفش اسوق وآخد منه العربية-قال لى جملة لخص لى فيها فن السواق كله، قال لى فيه ناس تفتكر انها حريفة سواقة لما تفضل تاخد فى غرز ضيقة وتقرف الناس كلها والناس كلها تشتمه وهو كدة يحس انه بطل الأبطال، الحرفنة فى السواقة انك تعمل اللى تعمله من غير ما تخلى حد يخرج من حارته او يحط رجله على الفرامل علشان خاطر سيادتك بتاخد الغرزة، دى الحرفنة وما عداها يبقى غشومية

المشاركة الأصلية كتبت بواسطة birdybirdy

انا مش عارفة ليه كل كام يوم يطلعلنا موضوع جديد يقول الستات واللي نزل الستات من البيوت واللي خلاهم يسوقوا وحرام عليهم اللي بيعملوه في الرجالة (الضحايا) ومبيعرفوش يسوقوا وبيتلخموا وهما سبب كل الكوراث اللي احنا فيه يمكن يكونوا هما كمان سبب الأزمة الإقتصادية العالمية برده مش بعيد ويمكن برده هما سبب الإحتلال الإسرائيلي لفلسطين مش بعيد ابدا .

كل الناس دلوقتي بقت تطالب برقاب النساء وعايزين يتخلصوا منهم في اسرع وقت ممكن وكإن ربنا فرضهم عليكم وخلقهم عشان يعذبكم بيهم.

طب دي مجموعة اسئلة محتاجة لحظة تفكير منكوا وبعدها ردوا:

1- سواقين الميكروباص والجمعية التعاونية اللي مقضيين حياتهم غرز ووقوف مفاجئ ونقل بدون ادني تنبيه من اقصي الحارة الشمال لأقصي الحارة اليمين ومشي عكسي دول ايه ستات لابسيين وش رجالة؟

2- ولا سواقين الأتوبيس اللي يبقي ماشي وحادف بوز الأتوبيس بتاعه طول الوقت في الحارة اللي جنبيه وماشي بزاوية لامنه مشي في حارته ولا منه اخد الحارة التانية وخلص ولا منه خلي الناس اللي في الحارتين اللي وراه يعرفوا يمشوا اصلا ده ايه؟ مش راجل برده؟

3- وسواق النص نقل اللي طول ماهو ماشي عمال يديك في كلكسات غير مبررة ويبقي في اقصي الشمال ويحدف عليك ويسدلك الحارة بتاعتك عشان يدخل الشارع اليمين بمنتهي البرود مش برده راجل ولا هو كمان ست لابسة عمة وجلابية؟

4- وطبعا سواقين التاكسي الهايلين اللي يقف وقت مايحب لمجرد ان حد رفع ايده يهرش في شعره وافتكر انه بيشاورله ولا لما حد يوقفه في نص الشارع ويقعد الأول يتناقش معاه ويشوف المكان اللي الزبون رايحه ده يتناسب مع مستوي سائق التاكسي المادي والمعنوي ولا لأ. مش ده برده راجل واحيانا بشنبات ولايكونش ست برده ولازقة شنب زي بتوع السينما؟

5- وسواقين النقل بقي اللي الحمد لله 3/4 حوادث مصر ده ان مكانش كل حوادث مصر بسبب انهم بيمشوا بسرعات رهيبة وبياخدوا غرز مميتة ويفضلوا رازعين العالي في وشك طول مانت ماشي ويقعد يرعشلك عشان تعديه مش برده راجل؟

ردوا الأول على الأسئلة دي وبعدين تعالوا حاسبو البنات والستات على سواقتهم

وياريت تجيبولنا احصائيات حقيقية عن الحوادث في مصر وخصوصا بقي الحوادث المميتة ونشوف مين كان المتسبب فيها رجالة ولا ستات .

والأخ صاحب الموضوع زعلان ومضايق اوي ان البنت قفلت عليه ومخلتوش ياخد غرزة.
اديك شوفت ردود افعال الشباب في المنتدي على الشخص اللي بياخد غرز ايه وان شباب كتير مش بس البنات برده بيقفلوا عليه وميسمحلهوش ياخد غرزة.

وعلى فكرة انا برده لما بلاقي حد بيغرز برده وعمال يتنطط مابين العربيات بقفل عليه ومش بخليه يعدي مش من حقه ياخد طريقي هو مش مستعجل اكتر مني يعني

انا عن نفسي بحاول التزم بحارتي علي اد ماقدر حتى لو فيها مطبات ولا بلاعات ولا بلا ازرق ومبنقلش من حارة لحارة تانية الا في حالتين يإما الحارة اللي انا فيها عطلت او توقفت تماما ومش هاتتحرك النهاردة ساعتها بفكر اخد الحارة اللي جنبي بعد مادي اشارة (وعيني علي المرايا) واسيب اتنين تلاتة يعدوا لان الناس مش بتستجيب للإشارات من اول مرة والحالة التانية بقي بعملها لما ميكونش في حد ورايا بمسافة قريبة عشان ميتخضش من اي غرزة او اي تخطي للحارات.
وعلى فكرة مش بس الستات اللي مش بتستعمل المرايات لا في رجالة بيبقوا ماشيين قافلين مراياتهم خالص وشوفتها اكتر من مرة (انا عن نفسي مبعرفش استغني عن المرايات ابدا في السواقة)

لكن الناس اللي بتستنصح بقي وفاكرة نفسها مفيش زيها وهما اللي ربنا بعتهم عشان يقضوا على الزحمة دي اخرهم بيقفلوا الطريق خالص على اللي رايح واللي جاي ولا منه عدي ولا منه اتنيل وقف زي ماهو وساب الشارع يسلك

ومصطلح غرز بقي اللي كلنا فرحانين بيه والشد والجري والكلام ده غير معترف بيه في اي مكان في العالم سوى في مصر بس وياريت منتحججش بالطرق بقي لان الطريق مبيقولكش خد غرز طول مانت ماشي ده سلوك بشري

وعلى فكرة اينعم ممكن مشيك ورا عربية ست سايقاها يخنقك شوية لانها بطيئة او حذرة لكن انا شايفة ان دي مش عيوب خطيرة يعني تخلي الناس كلها تلعن سواقة الستات وتصب عليهم كل الغضب ده لمجرد انهم عملوا نشاط فاكرينه مقصور فقط على الراجل الا وهو السواقة وحتى لو اخطأت هو مفيش راجل بيغلط يعني؟ كل الرجالة بتسوق صح بنسبة 100% ومعندهمش اي اخطاء في سواقته تماما وطول الوقت مركزين ومتحكمين في عربياتهم طب بلاش كل عربياتهم ماشية تمام وعمرها مابتحدف يمين او شمال او لا فراملها متكونش مضبوطة؟

يبقي ليه بقي بنفترض ان سبب سواقة الستات هما الستات ليه منفترضش انها اخطأت غصب عنها او عربيتها حصل فيها حاجة مش بإيديها خلتها تغلط؟
ولا عشان هيا ست يبقي هي المخطئة وخلاص لمجرد ان ربنا خلقها ست وبس؟

وعلى فكرة فعلا سواقة الستات بقت وحشة وسيئة وخنيقة (بالنسبة للرجال) عشان مش واخداها عافية وبطلجة ولوي دراع ولا نازلة الشارع بتقول ياأرض اتهدي ماعليكي قدي في السواقة النهاردة ولا نازلة تقول انا هاشد مع كل العربيات واسابقهم على فين مش عارفة المهم اسابقهم وخلاص زي ماكتير من الشباب اللذيذ بيعمل في الشوارع

ياجماعة صلحوا سواقة الرجالة الأول وخلوهم يسوقوا صح وهاتلاقوا الستات بعد كده بتسوق صح برده

الستات مش نازلة من بيوتها عشان تعذب الرجالة بسواقتها ومتنسوش ان مفيش ست بتعلم ست السواقة يعني اللي بيعلموهم هما برده الرجالة

وبعدين معلش يعني ايه اللي مضايق الناس اوي في ان الست بتبقي جايبة الكرسي قدام شوية ولا عاملاه بزاوية قايمة ولا ماسكة الدريكسيون بإيديها الإتنين مزعلكوا في ايه يعني وبيأثر في سواقتها ازاي؟ ولا هي تريقة على اي حاجة بتعملها الست وخلاص
هو يعني الواحدة لازم تمدد وتنام جوه العربية عشان تبقي بتسوق كويس ولا لازم تلمس الدريكسيون بأطراف اصابعها عشان تكون متمكنة من السواقة؟

ايتها الزميله birdybirdy بصى انا مش عاوزك تتنرفزى اوى كده علشان شكلك متعصبه جدا
اولا انا قولت انا مكنتش اعرف ان فى بنات فى المنتدى
ثانيا الموضوع للنقاش مش للخناق وده يقول لده مش عارف ايه .
ثالثا كويس اوى ان فى بنات فى المنتدى علشان النقاش يبقى جاد انما النقاش هيبقى خناق وكده لاء انا احذف الموضوع ونخلينا جروب واحد زى ما احنا وانا سعيد ان فى بنات نورت الموضوع بتاعى
رابعا فى كلمة اسلام اخويا دايما يقولها الله يخربيت قاسم امين .........
خامسا الأسئله اللى انتى طرحطيها فوق ديه كلها على ناس متستهلش ان انا اجاوب عليهم لآن انا بتخنق من الناس اللى قولتى عليهم كلهم سواء بتاع الميكروباص سوء الأتوبيس كل ده لآن كذا موقف حصل وكنت هموت بسبب السوقين الحمير دول
سادسا ..موضوع الغورز ده يا جماعه والله ساعة الضرورة بس مش اكتر انا شوغلى فى الخليفه المؤمون فا كل يوم فى صلاح سالم وكلو عارف صلاح سالم عامل ازى ولازم اروح الشغل فى المعاد علشان كده هو ده موضوع الغورز وكلو فاهم موضوع الغورز غلط على فكرة واللى عملو فينا كده بتوع الميكروبصات الزباله لآن اللى بيخدوها ديه مش غورزة ده هبل على فكره
سابعا ياريت متكونيش زعلاااااااااانه ولو انتى زعلانه بجد حقك عليا علشان كلنما اخوات فى المنتدى ده وان شاء الله كلنا هنتقابل واحنا رايحين الأوتو كروس اللى هو يوم 21/11 ان شاء الله وهنبقى جروب جااااامد وشكرا

المشاركة الأصلية كتبت بواسطة sab3aawy

لى تعليق على موضوع الغرز

زمان السواق-اللى ادانى حصتين سواقة لا غير قبل ما اخويا يطفشه علشان معرفش اسوق وآخد منه العربية-قال لى جملة لخص لى فيها فن السواق كله، قال لى فيه ناس تفتكر انها حريفة سواقة لما تفضل تاخد فى غرز ضيقة وتقرف الناس كلها والناس كلها تشتمه وهو كدة يحس انه بطل الأبطال، الحرفنة فى السواقة انك تعمل اللى تعمله من غير ما تخلى حد يخرج من حارته او يحط رجله على الفرامل علشان خاطر سيادتك بتاخد الغرزة، دى الحرفنة وما عداها يبقى غشومية

RESPECT !!!
متفق عشرتاشر مليون المية