الموضوع: يا جماعه الستات والبنات مشكلة السواقه

انا متابعة الموضوع ده من أول مشاركة فيه و ملتزمة الصمت عشان ما يبقاش تاني موضوع بنفس المحتوى أشارك فيه و يتقفل.. انما شكله كده فعلا هايلقى نفس مصير أخوه اللي اتقفل من كام شهر.. بس المرة دي انا براءة

مش عارفة إذا كان ده ممكن و لا لأ.. انما شايفة ان الإدارة متهيألي ليها دور في إنها تقلل من حجم المواضيع الخلافية جدا زي دي.. خصوصا ان عدد النساء في الموقع في ازدياد.. و كل مرة يتفتح موضوع زي ده لازم يتحول لخناقة.. طبيعي ما دام الموضوع هجومي بالشكل ده على احد طرفي الموقع و طبعا المجتمع.. و برضه كنت هتلاقي نفس الخناقة دي لو كان الموضوع بيهاجم سلبيات فئة معينة أيا كانت.. يعني انا متأكدة ان لو كان سائقي التاكسيات من أعضاء الموقع و اتعمل موضوع عن بلطجة سواقين التاكسي أو طمعهم أو او.. كنا هنلاقي أعضاء الموقع من سواقين التاكسي داخلين منفعلين و بيدافعوا عن نفسهم و بيرفضوا التعميم الجائر و الهجوم بالإسلوب الغير لائق ده.

عندي إقتراح.. ليه مثلا ما تتحذفش المواضيع اللي من النوعية دي أول بأول و السبب هو موضوع مكرر؟ يعني الموضوع ده قتل بحثا (هو الصراحة مش بحثا عشان هو مش مطروح عشان صاحب الموضوع عايز يلاقي حل.. هو قتل خناقا) و يعتبر مستفذ لأي واحدة بتسوق و بتقرا الكلام ده.. فليه يا جماعة نحرق في دم بعض و نعكر جو المنتدى؟ يعني احنا بنحاول نلم الشمل.. مش ناقصين المواضيع اللي زي دي تنغص علينا تجمعنا و تفسد علاقتنا ببعض.

معلش.. رجاء من الإدارة الكريمة محاولة احتواء النوعية دي من المواضيع و لهم جزيل الشكر.

رد الادارة: نوعية هذا الموضوع لا مشكلة منها طالما ظلت محتواه داخل اطار النظام وعدم الخروج عن القواعد ، تتدخل الادارة فقط لحفظ النظام دون ان تمارس دور الرقيب على الأفكار او تقوم بتوجيه الآراء فى اتجاه معين ، اما غلق المواضيع فيتم فى حالة اتساع الخلاف فى الموضوع الى درجة الاشتباك بشكل لا يمكن السيطرة عليه سوى باغلاق الموضوع

المشكلة لن تحل بقفل المواضيع
"ومايلفظ من قول إلا لديه رقيب عتيد"
لازم كل واحد يكون رقيب علي نفسه
سياسة غلق المواضيع مسكن و ليس علاج
سبب المشكلة الأساسي افتقارنا لثقافة الإختلاف
كيف نختلف دون أن نخسر بعض
"تبسمك في وجه أخيك صدقة" و التبسم في المنتدي ممكن بكلمة أو برمز
أكرر غلق المواضيه أداه سلبيه و هروب من المشكلة

المشاركة الأصلية كتبت بواسطة haneena

كلامك تمااااااااااااااااااااااا ااااااااام والله
وانا فعلا كمان باتعمد انى اقفل الطريق على اللى عايز يعدى بالعافية
بس انا شايفة ان الاستاذ اللى طرح الموضوع ماطرحوش بشكل صحيح لان فعلا سواقة كتير من الستات والبنات بتبقى مزعجة جدا وده مش عشان الغرز والكلام ده لا عشان الوقوف المفاجئ الغير مبرر لان بصراحة ده بيعمل مشاكل كمان يعنى انا كتير الاقى واحدة قدامى جابت فرامل على الاخر بدون داعى لان لسه قدامها مسافة تكفى عربيتين وبالتالى بتقف فجأة وده بيعمل مشاكل وانا عن نفسى لما الاقى اللى قدامى ست باطلع منها على قد مااقدر ومش بامشى وراها
وكمان فيه ستات بيمشوا براحة جدا وتلاقيهم حاضنين الدريكسيون زى مايكونوا خايفيين عليه ليجرى واللى يغيظ انهم ماشيين شمال وده غلط المفروض لو عايزة تمشى على مهلك يبقى تاخدى يمينك وده الصح

طب بالمناسبة بقي انا هاحكيلك على موقف حصل معايا امبارح واشوف رأيكوا إيه.
وانا راجعة من شغلي وماشية في صلاح سالم العربية وانا ماشية العربية الدنيا اتزحمت كلنا وقفنا وبعدين الطريق فتح وانا عربيتي وقفت مني
كل اللي شايف الموقف من ورا هايحكي الموقف كالتالي :

بنت سايقة عربيتها في صلاح سالم وطبعا بما ان البنات كلها مبتعرفش تسوق الهانم وقفت في نص الشارع بدون اي مبرر مع ان الطريق قدامها فتح وفضي وهي واقفة بمنتهي البرود وكله طبعا هايسب ويلعن في سواقة البنات (او الحريم في مقولة اخري)

لكن الموقف داخل العربية كان مختلف اللي حصل اني لما الدنيا وقفت رجعت الفتيس على وضع المور وبعدين الدنيا اتحركت جيت اجيب الأول العربية مبتتحركش يخرب بيتك عربية اتحركي الشارع مشي ودي ابدا راسها والف جزمة ماتتحرك وكمان فصلت حسيت ان الغيار بييجي غلط يعني صوت البنزين بيعلي والعربية واقفة في مكانها والفتيس بينط تاني على المور أو ييجي على التالت احيانا والعربية بتفصل المهم شغلت الإنتظار وقعدت احاول اتعامل فيها مرة الغيار ييجي صح والعربية تتحرك ومرة تانية يرد تاني والعربية تقف (طبعا منظر زبالة ومبقتش عارفة اعمل ايه ) لا والأدهى من كده انها عملتها وانا طالعة الكوبري كمان عشان الأية تكمل وطبعا كل الناس اللي في الشارع مش هاتبقي فاهمة ده بيحصل ليه ولا هاتحاول تفكرله في مبررات اساساً غير السواقة السيئة للبنات
انا حاولت بقصاري جهدي وقعدت اقول شوية أذكار وادعي ربنا انها متقفش على الكوبري واني امشي العربية على اي غيار وخلاص لمجرد اني اقدر انزل من الكوبري وبعدين اتصرف والحمد لله ربنا استجاب و قدرت انزل من على الكوبري على انهي غيار مش عارفة بس نزلت ومسكت يمين المهم ركنت على اليمين بالعافية وقلت اشوف هاتصرف ازاي وقفت شوية احاول اعمل اي حاجة فطفيتها وقعدت احاول اشوف الغيارات وبعدين شغلتها تاني وقلت هادخل البنزينة بتاعة موبيل يمكن الاقي حد يساعدني وفعلا دخلت وعامل البنزينة ندهلي واحد نزل تحت العربية واكتشف ان مسمار معلقة الفتيس فك شوية (انا كنت لسة مغيرة شداد الفتيس ومركباه من يومين بس واضح إن الميكانيكي مأرطش عليه كويس ففك وعشان كده كان في بوش في الغيارات وربطهولي واتزبطت ومشيت والحمد لله الموضوع عدى على خير وكملت طريقي بسلام.

عارفين اكتر حاجة كانت منكدة عليا عيشتي اثناء الموقف ده ايه :
احساسي بالناس اللي حواليا اللي زمناهم مخنوقين مني وفاكرين اني بوقف العربية بمزاجي واني مش راضية اتحرك برود وتناحة مني او عشان مبعرفش اسوق زي ماكل البنات مبتعرفش تسوق من وجهة نظرهم وقعدت احاول امشي العربية بس عشان اوسع الطريق لغيري مش اكتر.

يعني ياجماعة ياريت نعذر بعضينا شوية وبلاش نحكم على الناس بالظاهر ممكن يكون اللي بيقف فجأة ده حصله حاجة في عربيته او اللي قدامه وقف فجأة أو في حد بيعدي قدامه وبيفاديه او حصله مشكلة في طريقة سواقته معطلاه او لسة بيتعلم وغصب عنه الطريق حدفه شمال (وكان هو عايز يمسك يمين) ممسكش شمال بمزاجه يعني وغصب عنه وقف او بطئ سرعته هو عنده مبرر لكن اللي حواليه مش فاهمين مبرراته دي واظن كلنا معرضين لده سواء ستات او رجالة مبتدئين سواقة أو متمرسين يعني.

"التمس لأخيك سبعين عذرا"

معلش انا طولت عليكوا بس ياريت نصبر على بعض شوية وعلى اللي بيتعلم السواقة برده ونفتكر كلنا كان حالنا ايه واحنا بنتعلم السواقة وكام مرة العربية فصلت مننا وقد ايه كنا مضايقين ومخنوقين من الناس اللي حوالينا اللي مش صابرين علينا لحد مالعربية تدور ولحد مانتعلم ونسوق كويس زيهم

ومحدش يقولي اللي عايز يتعلم السواقة يتعلم في حتة فاضية كلنا سوقنا في حتت فاضية في البداية بس عشان نعرف نحرك العربية من مكانها ازاي ونجيب سرعات ازاي لكن السواقة في الزحمة ضرورية عشان ده حال كل شوارع المحروسة واللي ميسوقش في الزحمة كام مرة وهو بيتعلم عمره ماهيعرف يسوق في مصر لو اخد 300 حصة سواقة في اماكن فاضية ولا إيه؟؟؟؟؟؟؟؟؟ :) :Angel_anim: