الموضوع: زيادة عن 1000 موتوسيكل بجاج موقوف ترخيصهم بسبب جواب المصنع المحلى

السلام عليكم شباب المنتدى
نصيحة من اخوكم محدش يشترى موتوسيكل بجاج دلوأتي خالص إلا لما موضوع ترخبص البجاج يخلص
انا واقع في مشكلة علشان جبت موتوسيكل بجاج بوكسر وبقالي شهرين مش عارف ارخصه برغم اني معايا جواب الشركة من غبور الله يلعن دي شركة.. والسبب اني بعد ما استلمت جميع اوراقي رحت علشان اختم الجواب اللى معايا من مرور بين السرايات كان ردهم ان فيه جواب الصانع المحلى لسه لم يتم الموافقه عليه ولم يأتي للمرور وبقالى على الحال ده شهر ونصف ومافيش غير رد واحد من المعرض اللى بايعلى يقولى كمان اسبوع..او بكره او بعده وعلى الحال ده لدرجه اني كلمت مندوب شركة غبور وقلت له انى هعمل محضر في معرض المدينة المنورة بصفته البايع والموزع ومحضر في الشركه بصفتها المصنعه والمشكله دي واقع فيها كل اللى اشترى البجاج اللى ابتدى تجميعه هنا من ساعة ما اغلقوا استيراد الموتوسيكلات ياريت ياجماعة اللى عنده نفس المشكله يشارك في الموضوع علشان لو فيه اجراء قانوني نتخذه ...
والله المستعان

الحمد لله بعد عذاااااب تم ترخيص الموتوسيكل بصراحة انا كنت ظالم شركة غبور ولكن الشكر كل الشكر للاستاذ رامي شكري قسم مشتريات بغبور لمساعدتى في انهاء ما تم تعقيده من اوراق في المرور بصراحة الراجل متأخرش عليا فيما طلبته منه بخصوص استخراج خطاب شهادة المنشأ اللى المرور اتلكك عليه
عموما انا بداية توجهت لمرور بين السرايات لختم الخطاب اللى المفروض اروح ارخص بيه..
بعد ما ختمت الخطاب الضابط الله يكرمة في مرور بين السرايات قال لنا اللى ممعهوش صورة من الكتاب الدوري اللى هي ارقام الشاسيهات المجمعة لازم يروح للشركة يجيب صورة منه بالفعل توجهت للشركة في اكتوبر الكيلو 28 طريق مصر اسكندرية وجبت صورة
بعد كده توجها للمرور بتاعى العقيم طبعااا معظمهم عالم سفلة وطبقة واطية جداا وبيعاملوا الناس بطريقة وسخة وغير ادمية حتى رئيس الوحدة اللى كنت فاكره ظابط محترم علشان رتبة ومتعلم لاقيته اوسخ منهم المهم جبت دوسيه فحص وخشيت على مهىدس الفحص وفحصت الموتوسيكل وعند تقديم الملف للشباك علشان اراجع نتيجه الفحص وقفت الاجراءات علشان صورة الكتاب الدوري دي لم يتم توزيعها على وحدات المرور لي الجمهورية طيب الحل ايه.... الحل اني اطلع على الشركة علشان اجيب خطاب شهادة منشأ ..... اااااااااااه يحكومة بنت تييييييت الواحد يمشي سليم يعقدولوا الإجراءات... طبعا رحت مرة اخرى للشركة علشان جواب شهادة المنشأ ده وعشان كده انا فعلاا بأشكر استاذ رامي شكري علشان هو اللى كلم المسؤولين عنده بالشركة وهو شخصيااا ؤللى كتب لى الجوااب ونسقه وهوووب اطبع اختم بختم غبوور... اخيرااا استلمت الجواب شهادة المنشأ بعدها توجهت للمرور بتاعي ورتهم الجواب قامو مدخليني في دائر اخرى وهي فييييين شهادة البيانات.... بيانات مين يا عم الحاااج ده انتاج محلي... قام الموظف بص على الورق تااااني قااال صحيح انتاج محلى طيب كده تمام .... تمام قمت دافع ضريبة سنة 147 جنيه وهناك في المرور مفيش مكان للكسر عندهم بياخدو ال150 من غير كلام اتاوة ودفعت تأمين اجباري 73 جنيه عشان اول مرة ترخيص المبالغ دي خاصة بترخيص سنة واحدة فقط
بعد كده اديت للموظف اصل التامين الجباري والضريبة وقمت مستني الرخصة والنمر.
الحمد لله ربنا فرجهاااا واستلمت النمر والرخصة
قلت لنفسي ياواد بص على بيانات الرخصة وشوف لو فيها حاجه غلط
وبالفعل سبحااان الله اتفاجأ بأن رقم الموتور غلط اصل الموظفة كتبت رقم فاتورة الشراء بدلا من رقم الموتور وفي ثواني جريت دخلت على وحدة الحاسب وقلت لهم وصححوا الغلط على الحاسب وعلى الرخصة
روحت البيت وانا هطيييير من الفرحة
عموما بناشد كل شاب مقبل على شراء موتوسيكل بلااش علشااان احنا في دولة روتيييييين بحت وجهل متشعب داخل الوظائف الخدمية ده غير انك تبقى صح 100% وكمان لازم تغمس ايدك برشوة علشان متقعدش 5 ايام ترخص موتوسيكل
معلش طولت عليكم بس اكيد الموضوع هيفيدكم جدااا علشان متروحوش وتيجوا كذا مرة